Kigali: Ntakirutimana yujuje ingoro ya 2PAC ifite agaciro k’arenga miliyoni 15Frw

Yanditswe na Nsengiyumva Emmy
Kuya 18 Kanama 2020 saa 02:37
Yasuwe :
0 0

Ntakirutimana Diogène umenyerewe ku izina rya Caguwa wo mu Karere ka Kicukiro, mu Mujyi wa Kigali, yujuje ingoro y’amateka y’umuraperi w’Umunyamerika, 2PAC, ifite agaciro k’amafaranga y’u Rwanda arenga miliyoni 15.

Kuva mu 2008, Ntakirutimana yaguze ikibanza cya miliyoni 7Frw mu Kagari ka Karembure, Umurenge wa Gahanga mu Karere ka Kicukiro nyuma atangira kujya agura ibiti abiteramo kugeza ubwo atangiye kubaka iyi ngoro. Muri rusange, ikibanza n’imirimo yo kubaka bimaze gutwara arenga miliyoni 15Frw.

Mu kiganiro na IGIHE, uyu mugabo uvuka mu Karere ka Muhanga, yavuze ko kuva yamenya ubwenge bwo kumva umuziki yisanze akunda 2PAC, bitewe n’indirimbo yakoraga zirimo ubutumwa bumufasha.

Uru rukundo afitiye 2PAC rwamushinzemo imizi guhera ku myaka icyenda ubwo yari avuye iwabo akiyemeza kujya gushakishiriza ubuzima muri Kigali, aho yabanje kugorwa n’ubuzima agasigara afashwa n’indirimbo z’uyu muhanzi zamuteraga akanyabugabo n’ibyiringiro by’ejo hazaza.

Ati “2PAC ni igisobanuro cy’urukundo kuri njye ,yanyigishije byinshi mu buzima kubera indirimbo ze, nabaye ku muhanda igihe kinini ariko iyo numvaga indirimbo ze buri gihe byatumaga menya uko nakwitwara mu bihe binkomereye.”

Ntakirutimana yageze muri Kigali ubuzima buba bubi kuko yatangiye atwaza abantu imizigo ndetse anazunguza amasashi. Yavuye ku masashi atangira ibyo gufunga impano zitangwa mu birori kugeza ubwo afashe umuryango mu nyubako yo kwa Rubangura, aho acururiza ubu.

Yabwiye IGIHE kandi ko igitekerezo cyo kubaka iyi ngoro cyanaturutse ku kuba yarajyaga ategura ibitaramo byo kwibuka 2PAC ariko bikabera mu tubari. Iyi ngoro ikaba ari yo izajya iberamo ibi bitaramo.

Ati “Nababazwaga cyane no kuba umuntu yansanga mu kabari ndi mu gitaramo cyo kwibuka 2PAC akanyitiranya n’umusinzi kuko abona ko byabereye mu kabari.”

Avuga ko kugeza ubu ingoro yubatse ifasha abana batuye mu gace iherereyemo, bakunze kuhatemberera bakahidagadurira kandi bahigira ibintu bitandukanye.

Usibye ibi yavuze ko ingoro ya 2PAC yifashishwa n’ubuyobozi bw’akagari yubatsemo. Kenshi niho habera inama cyangwa ibindi bikorwa bisaba guhuza abaturage.

Ati”Uwo nawo ni umusanzu wanjye ku gihugu, noneho kuba bibera kwa 2PAC ni iby’agaciro kenshi cyane.”

Iyi ngoro ya 2PAC ifite ubusitani, ibikinisho by’abana ndetse n’inzu irimo imitako, ibitabo na album z’uyu muhanzi wabaye ikirangirire hambere.

Ntakirutimana yahishuye ko urukundo akunda 2PAC rwatumye atekereza kubaka ingoro y’uyu muraperi ataratangira kubaka aho azatura. Icyakora nubwo ibikorwa bye bigenda neza ngo ababazwa bikomeye n’abantu bamufata nk’uwasaze cyangwa wangiza amafaranga ye muri ibi bikorwa.

Ati “Buri gihe nterwa imbaraga n’abanzi, iyo umuntu ambwiye ko ndi kwangiza amafaranga aba antera imbaraga kuko bituma ndushaho gukunda ibyo nkora.”

Nubwo ariko iyi ngoro imaze kumutwara arenga miliyoni 15, Ntakirutimana avuga ko hakiri indi mirimo kuko hari byinshi atarashyiramo kandi bikenewe kuko aho yubatse ashaka kuhagira ahantu abakerarugendo bajya batemberera.

Tupac Amaru Shakur [2PAC] cyangwa se Makaveli, amazina yose yakunze kujya yiyita mu bihe bye, yavutse tariki ya 16 Kamena 1971, avukira Harlem agace ka Manhattan muri New York. Ni umwe mu baraperi bamamaye cyane mu myaka ya 90, yagurishije amakopi asaga miliyoni 75 y’album ze ndetse kugeza ubu aracyafatwa nk’umuraperi w’ibihe byose.

Amateka yerekana ko mu ijoro ryo ku ya 07 Nzeri 1996 ari bwo uyu muraperi yarashwe arakomereka bikomeye ndetse nyuma y’iminsi itandatu aza gushiramo umwuka.

Kugeza ubu impaka ziracyari zose ku rupfu rwa 2PAC, hari na bamwe bavuga ko yaba akiriho babishingiye ku ngingo nyinshi zitandukanye bagenda bagaragaza.

Ikiganiro na Ntakirutimana wujuje ingoro ya 2PAC mu Mujyi wa Kigali

Ibirori byo kwibuka 2PAC byari bisanzwe bibera mu tubari
Ntakirutimana usanzwe azwi nka Caguwa niwe usanzwe ategura ibi bikorwa
Iki kigo cyubatse ku buso butari buto mu karere ka Kicukiro
Mu nyubako ziri muri iyi ngoro harimo imitako itandukanye
Ntakirutimana Diogène umenyerewe ku izina rya Caguwa wo mu Karere ka Kicukiro mu Mujyi wa Kigali, yujuje ingoro y’amateka y’umuraperi w’Umunyamerika, 2PAC, ifite agaciro k'amafaranga y'u Rwanda arenga miliyoni 15. Imitako ya 2 PAC, ibitabo bivuga ku mateka ye ndetse na album ze biri mu byiganje muri iyi nyubako

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .