Kevin Kade yageze muri Canada nyuma ya DJ Brianne, mu gihe hagitegerejwe Element EleéeH na Nel Ngabo, na bo biteganyijwe ko bazahagera mu minsi ya vuba.

Ibitaramo aba bahanzi bategerejwemo biteganyijwe kubera mu Mujyi wa Ottawa ku wa 26 Nzeri 2026 ndetse n’i Montréal ku wa 3 Ukwakira 2026.

Kevin Kade yerekeje muri Canada avuye muri Leta Zunze Ubumwe za Amerika, aho amaze iminsi aba ndetse ari naho ari gukorera umuziki we.

Mbere yo kwerekeza muri Canada, Kevin Kade yari aherutse gusohora indirimbo ye nshya yise ‘So Close’, iri mu ndirimbo zigezweho muri iyi minsi.

Kevin Kade ni umwe mu bahanzi bamaze iminsi bagezweho mu muziki w’u Rwanda, cyane cyane nyuma yo gukora indirimbo zirimo ‘My Bae’, ‘Ibirara’, ‘Umuana’, ‘Amayoga’, ‘Pyramid (Tata)’, benshi bamenye nka ‘Ndamutatamura’, ‘Munda’, ‘Jugumila’ na ‘Folomiana’, yahuriyemo na Chris Easy ndetse na The Ben.

Yanakoze kandi ‘Sikosa’, na yo yahuriyemo na The Ben.

Si izo ndirimbo gusa, kuko Kevin Kade yanakoze ‘Bébé’ yahuriyemo n’umuhanzi wo muri Tanzania, Alikiba.

Uyu musore ni umwe mu bahanzi bize mu Ishuri ry’Umuziki ry’u Rwanda rizwi nka La Petite École de Musique, cyangwa The Nyundo, aho yasoreje amasomo mu 2019.

Ibi bitaramo byitezwe ko bizatangirira muri Ottawa

Kadada wahoze ari umunyamakuru mu Rwanda (wambaye umutuku) yari mu bagiye kwakira Kevin Kade ku kibuga cy'indege

DJ Brianne ni umwe mu bakiriye Kevin Kade muri Canada

DJ Ferrydee wateguye iki gitaramo yari yagiye kwakira Kevin Kade