00:00:00 IGIHE NETWORK KN KINYARWANDA EN ENGLISH FR FRANCAIS

Kate Bashabe yahishuye igikorwa yakoze kimutera ishema kurusha ibindi

Yanditswe na Léana Bisa
Kuya 5 August 2022 saa 07:32
Yasuwe :

Umunyamideli Kate Bashabe yatangaje ko aterwa ishema no kuba hari abana batatu arihira amashuri bari hafi gusoza ayisumbuye, avuga ko ari kimwe mu bimutera ishema yakoze kuko bamaze gukura kandi nta kintu baramuburana.

Yabigarutseho ubwo yari mu Murenge wa Kanombe aho yakuriye. Yari yagiye gufasha abatishoboye bahatuye ku munsi w’Umuganura. Yafashije imiryango 127 igizwe n’abantu 600 ayishyurira ubwisungane mu kwivuza ‘Mutuelle de Santé’ bufite agaciro ka miliyoni 1,8 Frw, anabaha ibikoresho by’isuku.

Aba baturage bahawe ubufasha ntabwo ari ababarizwa mu cyiciro cya mbere cy’ubudehe kuko cyo gifashwa na Leta ahubwo bari mu cyiciro cya kabiri n’icya gatatu.

Mu kiganiro yagiranye na IGIHE, yavuze ko yifuje kugira icyo yamarira abaturage cyane ko muri uyu murenge haboneka abaturage benshi badafite Mutuelle de Santé kurusha iyindi mirenge yo muri Kicukiro.

Umunyamabanga Nshingwabikorwa w’Umurenge wa Kanombe, Idrissa Nkurunziza, yavuze ko kugeza ubu abaturage 49,7% aribo bafite mutuelle muri iyu murenge.

Ati “Hari abantu benshi batarafata Mutuelle de Santé muri uyu murenge kuko abamaze kuyishyura ari 49,7%, urumva ko tugifite abantu benshi batarishyura. Turifuza kurangiza uku kwezi tumaze kugera kuri 80%.”

Yakomeje avuga ko hakenewe abaterankunga kugira ngo abaturage badafite ubushobozi bwo kwiyishurira babone uburyo bwo kwivuza.

Mukakananura Beata utuye mu Murenge wa Kanombe mu Kagari ka Kabeza mu Mudugudu w’Akagera ni umwe mu bahawe ubufasha. Yavuze ko iki gikorwa cyamukoze ku mutima cyane kubera uburwayi afite.

Ati “Nari maze iminsi naravunitse akaguru ndetse no mu gatuza [...] Numvise nishimye bindenze, Imana ni igisubizo cya byose. Iki gikorwa kimpaye umutima w’urukundo. Mu ntege nke zanjye simfite icyo nakora gihambaye ariko uwo mbasha gufasha nanjye nzabikora.”

Kate Bashabe yavuze ko ibikorwa byo gufasha yabitangiye akiri muto kuko yabitojwe n’ababyeyi be.

Ati “Nabitangiye nkiri muto mbona mama wanjye [afasha], nkuze ngize ubushobozi niyemeza ko kabiri cyangwa gatatu mu mwaka hari ikintu ngomba gukora. Njye biranshimisha kurusha abo nabikoreye ngira ngo ni njye uba wishimye cyane.”

Uyu mukobwa ufite inzu icuruza imyenda yitwa “Kabash Fashion House Shop” yahaye umukoro abanyarwanda, abasaba kugira umutima wo gufasha.

Ati “ Mu gihe umuntu yariye n’umuryango we wariye, yambaye, aba yumva ari ibyo ibindi ntabwo bimureba. [Bamwe] Nta nubwo [gufasha] banabitekereza, igihugu nticyafasha abantu bose, twishyize hamwe nk’Abanywarwanda tukagira umutima wo gufasha abandi badafite ubushobozi twagera kure.”

Yavuze ko kugeza ubu igikorwa yakoze kimurutira ibindi ari abana batatu yareze, ku buryo amaze imyaka umunani ntacyo baramuburana.

Ati “Bamaze gukura, mbishyurira amafaranga y’ishuri kandi sinigeze nanirwa, umwe ageze no mu mashuri yisimbuye. Nibarangiza kwiga bakaba bakuru ni cyo kintu nzajya ndeba nkumva ko hari icyo nakoze.”

Yabwiye IGIHE ko hari bamwe bumva ko ibikorwa bye byo gufasha biba ari ukwigaragaza ariko ko ntacyo yabivugaho kuko icyo agomba gukora we aba yagikoze.

Kate Bashabe yatangiye kumenyekana mu 2011 ubwo yari arangije amashuri yimbuye, akitabira irushanwa rya Miss MTN Rwanda ndetse akanaryegukana. Mu mwaka wakurikiyeho, yitabiriye irya Miss Rwanda gusa ntiyagera kure. Kuva ubwo yahise yinjira mu bucuruzi bw’imyenda.

Imiryango 127 yafashijwe na Kate Bashabe yahawe ibikoresho bitandukanye by'isuku
Abahawe ubufasha basazwe n'ibyishimo, bashimira Kate Bashabe
Abaturage bafashijwe ni abadafite ubwishingizi bwo kwivuza cyane
Bashabe yashimishijwe no kubona abo yafashije banezerewe
Kate Bashabe yasabye abanyarwanda kugira umuco wo gufasha kuko byatuma iterambere ry'igihugu ryihuta
Kate Bashabe yatangiye gufasha akiri umwana muto abikuye ku byakorwaga n'ababyeyi be

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .