Mu mpera z’icyumweru gishize ubwo yari i Dallas muri Leta ya Texas yitabiriye Rwanda Convention 2025, yongeye kwambara inkweto ndende nyuma y’igihe kirekire.

Abinyujije ku mbuga nkoranyambaga, yashimiye Imana yongeye kubimushoboza.

Uyu munyamideli wari wahuye n’uburwayi bwo kubyimba cyane cyane amaguru n’amaboko, yabwiye IGIHE ko byamubayeho ari mu bihe binakomeye cyane ko yari amaze kwimukira muri Amerika atarabona ibyangombwa.

Byatumye agorwa no kubona ubuvuzi bukwiye.

Ati “Nyuma y’umwaka urenga ntashobora kwambara inkweto ndende nyamara ari zimwe mu byo nkunda, ndashimira Imana ko mu mpera z’icyumweru gishize nongeye kwibona nzambaye. Ikiruta ibindi ni uko nongeye kuzambarira mu gikorwa gifite icyo gisobanuye ku gihugu nkomokamo, u Rwanda.”

Heard yavuze ko atazi neza icyamuteye iyi ndwara ubusanzwe ifata abageze mu zabukuru, icyakora ahamya ko kimwe mu bishobora kuba byarayimuteye ari imihangayiko yari amazemo igihe n’ubuzima yabayemo bwo gukoresha ibiyobyabwenge no kunywa inzoga nyinshi.

Ku bijyanye n’uko ubuzima bwe buhagaze, yavuze ko nubwo atarakira neza, ku buryo afite icyizere ko mu minsi iri imbere azaba yakize neza.

Judith Heard yari amaze igihe yivuza ubu burwayi bwatumaga atabasha kwambara inkweto

Judith Heard yari amaze umwaka afite uburwayi bwatumye amaguru ye abyimba

Judith Heard yageze ku rwego agendera ku mbago

Si amaguru gusa yari yabyimbye, n'amaboko yari arwaye

Judith Heard yishimiye kongera kwambara inkweto ndende nyuma y'igihe arembejwe n'uburwayi bwo kubyimbagana amaguru

Ibyishimo byari byose kuri Judith Heard witabiriye Rwanda Convention yarakize uburwayi