00:00:00 IGIHE NETWORK KN KINYARWANDA EN ENGLISH FR FRANCAIS

Israel Mbonyi, Riderman na Adrien Misigaro mu bakoze mu nganzo… Indirimbo nshya za Weekend

Yanditswe na Uwiduhaye Theos
Kuya 1 June 2024 saa 03:04
Yasuwe :

Mu gihe iminsi igize icyumweru iri kugana ku musozo, benshi mu bakunzi b’umuziki bakomeje kuryoherwa n’ibihangano bishya by’abahanzi b’Abanyarwanda.

Urutonde rw’indirimbo nshya za buri Cyumweru ruba rurimo iz’abakizamuka n’abamaze kubaka izina, ikigamijwe ni uguteza imbere umuziki Nyarwanda.

Muri iki Cyumweru dusoza, abahanzi batandukanye bakoze mu nganzo bashakira ibyishimo abakunzi b’umuziki Nyarwanda binyuze mu ndirimbo nshya zabafasha kuryoherwa na weekend.

Riderman yahuje imbaraga na Bulldogg

Abaraperi Riderman na mugenzi we mugenzi Bulldogg ku nshuro ya mbere bashyize hanze album bahuriyeho, igizwe n’indirimbo zirindwi; ikaba yarakozwe biturutse kuri Mico The Best.

Ni album aba bahanzi bise "Icyumba cy’Amategeko’". Iriho indirimbo zirimo iyo bise ‘Hip Hop’, ‘Miseke Igoramye’, ‘Amategeko 10’, ‘Nkubona Fo’, ‘Muba Nigga’ na ‘Bakunda Abapfu’. Indirimbo zakozweho n’abatunganya indirimbo barimo Knox Beat, Inthecity, Firstboy, Dr. Nganji na K DaGreat.

Riderman mu minsi ishize yabwiye IGIHE ko izina ‘Icyumba cy’Amategeko’ barihaye iyi album biturutse ku ndirimbo iriho aba bahanzi bise ‘Amategeko 10’. Ati “Bulldogg niwe wavuze ati reka album tuyita gutya.’’

Aba bahanzi ni ubwa mbere bahuriye mu mushinga mugari wa album gusa bagiye bahurira mu ndirimbo zirimo iyo bise “Mfite Isoni’’ ndetse na “Bunguka Bate’’ yanumvikanyemo Social Mullah, zagiye hanze mu myaka yashize.

“Yanitosha’’ - Israel Mbonyi

Ni indirimbo nshya y’umuhanzi Israel Mbonyi uri mu bahanzi bakomeye mu muziki wo kuramya Imana. Ni indirimbo uyu muhanzi aba avuga ko ubuntu bw’Imana buhagije ku bantu bayo.

“Nkurikira’’ - Adrien Misigaro ft. Israel Mbonyi

Ni indirimbo nshya yahuriyemo Adrien Misigaro na Israel Mbonyi. Muri iyi ndirimbo aba bahanzi baba bagaragaza ko gukurikira Imana ari kimwe mu bintu byiza. Bakaririmba bati “Nkurikira tujyanye kuko aho nkujyanye ni heza.’’

“Bana” - Shaffy ft Chriss Eazy (Choir version) Choeur International et Ensemble instrumental de Kigali

Ni indirimbo ya Shaffy na Chriss Eazy yasubiwemo na Choeur International et Ensemble instrumental de Kigali mu buryo bw’amanota. Iyi ndirimbo y’urukundo iyi korali yayishyize hanze kuri uyu wa Kane.

“Follow Me’’ - Shema Tattoo feat. Mistaek , Afrique & Bushali

Iyi ni indirimbo nshya yahuriyemo abahanzi bagezweho mu Rwanda barimo Mistaek , Afrique na Bushali. Iyi ndirimbo y’urukundo aba bahanzi bahuriyemo ni iya Shema Tattoo.

“Guarranty’’ - Racine

Ni indirimbo nshya y’umuhanzi Kamatali Thierry umaze kwamamara nka Racine. Muri iyi ndirimbo aba agaragaza ibibazo bitandukanye biri ku Isi abantu bahora bahura nabyo ariko bagakomeza guhatana, kuko ubuzima butoroshye na gato.

“Rwizihirangabo’’ - Umukondo Gatore

Umukondo Gatore wiyemeje gusigasira inganzo y’ibyivugo ngo bidacika mu Rwanda yashyize hanze igishya yise ‘Rwizihirangabo’. Icyivugo Rwizihirangabo ni umwe mu ngabo za Kigeli 4 Rwabugiri zitwaga Ingangurarugo. Uyu mugabo avuga ko buri Munyarwanda agira icyivugo.

“Mpa Wowe’’ - Calvin Mbanda

Ni indirimbo y’umuhanzi Calvin Mbanda uri mu bahanzi bahagaze neza. Uyu musore muri iyi ndirimbo aba aririmba asaba umukobwa kumwiha wese kuko yamwihebeye.

“Impozamarira” - Antoinnette Rehema

Ni indirimbo nshya y’umuhanzikazi Antoinnette Rehema uri mu bahanzi baririmba indirimbo zo kuramya Imana. Ubutumwa burimo ni ubwo kumenyesha abatarakizwa ko Uwiteka abategerezanije ubwuzu n’urukundo rwinshi cyane.

Rehema ati “Naririmbye mbereka ko no hanze y’agakiza nari ndiyo ariko nta kizima nahabonye, nta heza haruta aho Imana Ituye. Ntabwo bahejwe na gato nimuze ahari ubuzima kuko Umukiza wacu azabaha n’Impozamarira. Abatarakizwa nimuze mu rugo ntago muzabyicuza."

“Chonga Ngoma’’ - Water sax Methuselah ft. Tatuma

Ni indirimbo nshya y’umuhanzi Water sax Methuselah yafatanije na Tatuma. Ni indirimbo yo kwishimisha. Uyu musore asanzwe avuza umwirongi wa kizungu uzwi nka Saxophone dore ko atari benshi bazi kuwukoresha mu gihugu.

Ubusanzwe witwa Mbonimpa Methuselah yavutse mu 1992 mu bakobwa batanu akaba ari umuhungu umwe rukumbi iwabo mu muryango w’iwabo.

Mu 2016 yasoje mu ishuri ry’umuziki ku Nyundo aho yize kuririmba, gucuranga guitar, saxophone na clarinet ndetse no kwandika indirimbo. Ubu ni umuririmbyi, umucuranzi wa guitar, saxophone n’ibindi bicurangisho yize. Mu muziki akora injyana zitandukanye nka Afro jazz, Pop ndetse na gakondo mu buryo bugezweho.

“Kirehe Hospital’’ - Senga Diane

Ni indirimbo Senga Diane yahimbiye abakozi bo mu bitaro bya Kirehe (Kirehe District Hospital), kubera ubwitange bahorana umunsi ku munsi kugira ngo ubuzima bw’abantu bumere neza.

Yabwiye IGIHE ati “Igitekerezo narakigize nkigeza ku Muyobozi Mukuru w’Ibitaro aranshyigikira, nibwo indirimbo yasohotse ku munsi w’ejo bakayishimira cyane ndetse na PIH (Partners In Health ) inshuti mu buzima ari bo baterankunga bakuru b’ibitaro byacu, barayishimira cyane.’’

Diane Senga asanzwe ari umuganga mu bitaro bya Kirehe ariko akaba asanzwe anaririmba indirimbo zihimbaza Imana. Yatangiye umuziki mu 2015 aho yashyize hanze icyo gihe indirimbo yise ‘Yezu ni umukiza’. Asanzwe ari umubyeyi ufite umwana umwe.

“Gospel’’ - AY Ft. Taz, HUNNi & PoppA

Ni indirimbo nshya y’abahanzi Taz, HUNNi & PoppA bahurijwe hamwe na AY usanzwe atunganya indirimbo. Iyi ndirimbo aba bahanzi baba bagaragaza ko kwitwara neza no gukora ari kimwe mu bintu bifasha abantu mu buzima.

“Oh’’ - Shinz

Ni indirimbo nshya ya Shinz. Iyi ndirimbo ikozwe mu njyana ituje, aho uyu muhanzi aba yishyize mu mwanya w’umuntu ubabaye kubera ibintu bitandukanye yagiye ahura nabyo mu buzima bwe bwa buri munsi.

“Ngwino Urebe’’ - Chryso Ndasingwa

Ni indirimbo nshya ya Chryso Ndasingwa uri mu bahanzi bahagaze neza mu muziki wo kuramya no guhimbaza Imana. Muri iyi ndirimbo uyu muhanzi aba agaragaza ibitangaza Imana umunsi ku wundi uhereye kera kose kugeza uyu munsi.

“Amasomo’’ - Phil Emon

Ni indirimbo nshya y’umuhanzi Phil Emon uri mu bakizamuka muri iki gihe. Uyu muhanzi aba agaragaza ko kujya mu rukundo ari ibintu bitoroshye cyane ko bisaba kwihangana.

“Ntiwamvamo’’ - Logan Joe ft. Kenny K-Shot

Ni indirimbo y’abahanzi Logan Joe na mugenzi we w’umuraperi Kenny K-Shot. Ni indirimbo y’urukundo aho aba bahanzi bishyira mu mwanya w’umusore wakunze umukobwa cyane akamusaba kumusezeranya nawe kuzamukunda ubuziraherezo.

“Ibirato by’Abera’’ - Umucyo Choir

Iyi ni indirimbo ya korali Umucyo ikorera umurimo w’Imana mu Itorero rya ADEPR Rehoboth muri Paruwasi ya Remera. Ni indirimbo igaruka ku rukundo Yesu yakunze abari mu Isi byatumye yemera kwitanga akabambwa ku musaraba nta cyaha yakoze.

Ni indirimbo yabo ya mbere iri kuri Album ya kabiri bitegura gusohora. Ubuyobozi bwa Korale Umucyo bushimangira ko urugendo rw’ivugabutumwa no kubwamamaza binyuze mu ndirimbo bigamije guhamagarira benshi kuri Yesu. Korali Umucyo irateganya gushyira ahagaragara Album yayo ya Kabiri mu Ukuboza 2024.

“Paul Kagame’’ - Julle Boy 17

Ni indirimbo nshya umuhanzi Julle Boy 17 yahimbiye Perezida wa Repubulika y’u Rwanda Paul Kagame. Muri iyi ndirimbo ashishikariza abantu kuzamutora mu matora ateganyijwe ku wa 15 Nyakanga uyu mwaka.

“Turaberewe’’ - Seleman Dicoz Ft. Lionel Sentore - Charles Uwizihiwe & Daniel Ngarukiye

Ni indirimbo yahuriyemo Seleman Dicoz na bagenzi be Lionel Sentore - Charles Uwizihiwe na Daniel Ngarukiye. Aba bahanzi baba barata uburyo Abanyarwanda bafite ubudasa bisangije bo ubwabo gusa.

“Ushimwe Yesu’’ - Isaac Rabine

Ni indirimbo nshya ya Rabine uri mu bahanzi baririmba indirimbo zo kuramya no guhimbaza Imana. Avuga ko ari indirimbo yahimbye ari nk’ishimwe nyuma yo kwibaruka umwana w’umukobwa. Uyu mwana yamwibarutse kuri uyu wa Gatanu tariki 31 Gicurasi 2024. Isaac Rabine yahoze muri Hoziyana nyuma aza kwimukira mu Bubiligi.

“La Vérité’’ - Magna Romeo

Ni indirimbo nshya y’umuhanzi Magna Romeo uri mu bari kuzamuka muri iki gihe. Uyu musore aririmba yishyize mu mwanya w’umusore waryohewe mu rukundo, akavuga ko kubera uko afatwa n’umukunzi we yabaye nk’uwageze aho ajya. Ati “Niko kuri mukunzi wanjye.’’

Indirimbo zo hanze …

Ayra Starr yashyize hanze album nshya

Umuhanzikazi w’Umunya-Nigeria Oyinkansola Sarah Aderibigbe wamamaye nka Ayra Starr, yateguje album ye ya kabiri yise “The Year I Turned 21’’ cyangwa se mu Kinyarwanda ‘Umwaka nujuje imyaka 21’. Ni album ije ikurikira iyo yashyize hanze mu 2021 yise “19 & Dangerous’’.

Ayra Starr kuri iyi album ye ya kabiri igaragaraho abahanzi bakomeye barimo Asake, Anitta, Coco Jones, Giveon na Seyi Vibez. Iyi album yagiye hanze ku wa 31 Gicurasi uyu mwaka.

“Faut pas douter’’ - Goulam x Sidiki Diabaté

[“Hero” - Charlie Puth

“Next U 2” - Kehlani

“Ask & You Shall Receive’’ - Rita Ora

“SPIDER’’ - GIMS & DYSTINCT

“From The Islands (Kompa Passion)” - Jason Derulo, Frozy & Tomo

“Double’’ - Kizz Daniel

“Favourite Story’’ - King Promise, Sarkodie, Olivetheboy

“Feel Something’’ - Chris Brown


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .