00:00:00 IGIHE NETWORK KN KINYARWANDA EN ENGLISH FR FRANCAIS

Inzego za Leta zongeye kwerekwa uko umuziki wabyara imirimo mu rubyiruko

Yanditswe na Mahoro Vainqueur
Kuya 7 Ukuboza 2022 saa 09:14
Yasuwe :

Ikigo ‘Balymus’ gifite ishuri ryigisha umuziki cyagiranye ibiganiro nyunguranabitekerezo n’ibigo bitandukanye birimo Minisiteri y’urubyiruko n’umuco, Inteko y’umuco, ikigo cya Leta cy’imyuga n’Ubumenyi ngiro ’TVET’ n’ibindi, mu rwego rwo gushaka igisubizo ku iterambere ry’umuziki w’u Rwanda.

Ibi biganiro byabaye mu mpera z’icyumweru gishize byagarutse ku iterambere rya muzika nyarwanda, harebwa uburyo umuziki wabyara imirimo mu rubyiruko ukanifashishwa mu kubungabunga umurage.

Muri ibi biganiro hatanzwe ibitekerezo ku cyatuma ireme rya muzika ritera imbere kurushaho harimo gushyigikira ubuhanzi ku bantu bose bafite aho bahurira nabwo binyuze mu nzego zitandukanye.

Umuyobozi wa Balymus, Bimenyimana Alphonse avuga ko guhitamo insanganyamatsiko ya “Muzika yacu, isoko yacu” ari uko bijyana no kuba muzika ushobora kuba isoko yo gusigasira umurage, no guteza imbere ururimi, gutanga umurimo, kuzamura ubukungu bw’igihugu n’ibindi.

Uyu muyobozi yaboneyeho gusobanura neza akamaro k’imyandikire y’ibihangano mu manota ndetse n’akamaro bifitiye uruganda rwa muzika.

Yagize ati “Kwandika ibihangano mu manota bifasha mu gusigasira umwimerere w’ibihangano, gutanga akazi ku bandika ayo manota y’indirimbo, kwinjiriza ba nyiribihangano, korohereza abacuranzi, gufasha abahanzi ku buryo igihe bagiye gukorera ibitaramo mu mahanga n’ibindi.”

Prof. Gamaliel Mbonimana impuguke akaba n’inararibonye mu mateka mu kiganiro yatanze, yagarutse ku mateka ya muzika mu Rwanda cyane cyane agendanye n’imyandikire aho yanyuzagamo akanaririmba kugira ngo agaragaze ko muzika nyarwanda isanganywe uburyohe ku cyera.

Aha yagiriye inama abahanzi agira ati “Abahanzi ntibakwiye gukora ibihangano bakurikiye amafaranga gusa, ahubwo bakwiye no kwita cyane ku mwimerere wibyo bahimba.”

Mu bandi batanze ibiganiro harimo Dr Albert Nzayisenga, umuyobozi w’ibitaro bya Rilima akaba n’Umuyobozi wa Chorale de Kigali, yagarutse ku kamaro ka muzika mu buzima bwa muntu.

Harimo nko kuba muzika yifashishwa mu guhangana n’ihungabana, uburyo ikoreshwa mu buvuzi ndetse n’uburyo iherekeza amarangamutima y’umuntu mu buryo butandukanye.

Yavuze ko igituma igihangano gikundwa igihe kirekire biterwa n’uburyo cyanditse , aha yasabye abahanzi kwita ku myandikire cyane kugira ngo ibihangano byabo bimare igihe ku isoko.

Ku bufatanye na Rwanda TVET Board, iri shuri rigeze kure mu gukora imfashanyigisho y’igihe gito (Short Courses) yafasha kongerera ubumenyi abakunda umuziki yaba abasanzwe bawukora, abawiga n’abandi baherereye mu bindi bikorwa bitandukanye .

Ibi ni bimwe mu bizafasha mu kurema imishinga n’imirimo mishya yagira uruhare mu gufasha urubyiruko no kuzamura muzika nyarwanda muri rusange.

Balymus yaboneyeho umwanya wo kumurika ibikorwa bitandukanye ikora birimo ibihangano byanditswe mu manota yandikiye abahanzi batandukanye. Aba bahanzi barimo; Israel Mbonyi, Yvan Buravan, Bruce Melodie n’abandi.

Hamuritswe kandi uburyo bwo gusigasira ibihangano no kubibyaza inyungu hifashishijwe ikoranabuhanga ryubatswe na Balymus.

Abanyeshuri ba Balymus bakanyujijeho berekana ibyo bamaze kunguka
Abanyeshuri ba Petit Séminaire Saint Vincent iri i Ndera basusurukije abitabiriye ibi biganiro
Alphonse Bimenyimana uyobora Balymus yagaragaje akamaro ko kwandika indirimbo mu manota
Dr Albert Nzayisenga uyobora ibitaro bya Rilima akaba n'umuyobozi wa Chorale de Kigali yari yitabiriye ibi biganiro
Hafashwe ifoto y'urwibutso ku bitabiriye iki gikorwa
Eugène Uwimana waje ahagarariye Rwanda TVET Board yijeje iri shuri ubufasha
Ibi biganiro nyunguranabitekerezo byateguwe mu rwego rwo gushakira hamwe icyatuma muzika nyarwanda irushaho gutera imbere
Haganiriwe ku ngingo zitandukanye zateza imbere uruganda rwa muzika hahangwa n'imirimo ku rubyiruko
Indirimbo 'Garagaza' ya Yvan Buravan nayo ni imwe muzanditswe mu manota
'Number one' ni imwe mu ndirimbo aba abanyeshuri banditse mu buryo bw'amanota
Karangwa Kwizera Fabrice umwe mu bagize itsinda Five Bright Singers nawe yari yitabiriye ibi biganiro
Leonidas Gatete waje ahagarariye Rwanda Convention Bureau - RCB yari mu bitabiriye ibi biganiro
Nyangezi François waturutse muri Minisiteri y'Urubyiruko n'Umuco
Prof. Gamaliel Mbonimana umushakashatsi akaba n'inararibonye ku mateka, yagarutse ku kamaro ko kwandikisha ibihangano mu manota bifasha buri wese yaba umunyarwanda n'umunyamahanga kumva neza igihangano cyakozwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .