00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo 10 ziganjemo amagambo akomoza ku rukundo rwo mu gitanda zasohotse mu 2022

Yanditswe na Mahoro Vainqueur
Kuya 27 Ukwakira 2022 saa 04:45
Yasuwe :

Kimwe n’indi myaka, abahanzi nyarwanda uyu mwaka bumvikanye mu bihangano by’ubutumwa bunyuranye, icyakora bakarikoroza kurushaho mu gihe babaga bakoze ibikomoza ku rukundo ruganisha mu gitanda cyangwa se izirimo amagambo benshi bita ibishegu nubwo bidakunze kuvugwaho rumwe.

Mu 2020 ijambo ‘Ibishegu’ ryazamuwe cyane mu muziki, bitewe nuko indirimbo ziganjemo amagambo aganisha ku rukundo rwo mu gitanda zasohotse umusubirizo ari nyinshi kandi zikaza mu zirebwa ku mubare uri hejuru cyane kuri Youtube.

Abahanzi bakunze kumvikana bahakana ibishegu, bakavuga ko ahubwo abantu bisobanurira indirimbo zabo uko bashaka bashingiye ku marangamutima yabo, ibyo atari ikibazo cy’abahanzi kuko atari bo bagena ibyo abantu batekereza.

Muri iyi nkuru twagarutse ku ndirimbo zavuzweho cyane n’abakunzi b’umuziki bavuga ko harimo amagambo wumva aganisha ku ishimishamubiri cyangwa ku urukundo rwo mu gitanda mu buryo bweruye.

Hari amagambo atashyizwe muri iyi nkuru kubera ko atavugirwa mu ruhame cyangwa atari mu myandikire y’ikinyarwanda cyemewe asimbuzwa andi bihuza inyito cyangwa bisobanura kimwe.

Ariko kandi izi ndirimbo zatoranyijwe nta kigendeweho, birashoboka ko hari iyo twaba tutashyize mu nkuru wowe usanga yakagiyemo cyangwa iyagiyemo ubona itabikwiye, ni ahawe kuduha igitekerezo ubinyujije aho bisanzwe bitangirwa.

Imashini - Mico The Best

Iyi ndirimbo yasohotse ku wa 13 Nzeri 2022 yumvikanamo amagambo agaruka ku buryo yishimiye umukobwa w’umudozi wamupimye amukorakora akifuza kuzamusura ku munsi w’ikiruhuko bakagirana ibihe byiza.

Atangira agira ati “Nta gace katagira umwana udasanzwe akaboko ke kakujyana mu bihe bidasanzwe.”

Muri iyi ndirimbo hari aho agira ati “Ukuntu kagufata kagupima mu nda, […] twahuye nafashe akaruhuko Dodoma (Matera) ayigira iponji nimbona umwanya nzamutura hasi.”

Radiyo - Alyn Sano

Iyi ndirimbo yasohotse ku wa 22 Nzeri 2022, uyu muhanzikazi yumvikana aririmba uburyo yishimiye umukunzi we akavuga ko agomba gukora ibishoboka byose akamubonera umwanya uhagije.

Mu gitero cya kabiri ku munota wa mbere n’amasegonda 43 agira ati “Hari ukuntu unzamurira amerwe , hari ukuntu umpagarika mukunzi , aho ucunda urushinge rukagwamo neza, ibyo ndabikunda, ndakubona nkagutinya, ndagukeneye, oya winsondeka nanjye ndakwiyegurira.”

Akinyuma - Bruce Melodie

Iyi ni indirimbo yasohotse ku wa 16 Nyakanga 2022, igitangira habanza itangazo rivuga ko uri munsi y’imyaka 18 atemerewe kuyireba.

Ni indirimbo uyu muhanzi aririmba avuga ko umugore we batabanye neza kuko atabona ibimuhagije mu buriri dore ko nibyo yabonye muri filime abisaba umugabo we akamubwira ko atabyishoboreye.

Atangira agira ati “Ni ibyo ukunda biragaragara , ariko imyaka iranjyanye , uhora ushaka ko nkujya inyuma nko muri filime sinishoboreye.”

Umugore nawe asubiza umugabo agira ati “Byoroshye , urananiwe ntikibyuka , ni ugushitura ,dore unyima umunyenga uza usesera mu mashuka.”

Umugabo asubiza avuga ko ananiwe yareka akabanza akuruhuka ejo niyongera kumuha amukorera byabindi yifuza yabonye muri filime.

Inana - Chris Eazy

Iyi ni indirimbo yasohotse ku wa 26 Gicurasi 2022 , Chris Eazy aba asaba umukunzi we kumuha ibyishimo bari mu nzu aho bisanzuye ntawe utinya undi.

Ati “Karibuni tujyane mu nzu , vayo mukundwa nkwereke , mfata mukunzi witinya , udahari ntacyo naba ndicyo , undimo cyane , ndemera undi mwana, mfasha ngutunganye, maze nkwibagize ahahise, uri inshuti yanjye winaniza cyane, ngwino winjire.”

Quality - Kenny Sol ft Double Jay

Iyi ndirimbo yasohotse ku wa 9 Nzeri 2022 , aba basore baririmba bavuga uburyo basajijwe n’ubwiza bw’umwari bwatumye bamwegurira byose.

Kenny Sol atangira agira ati “Afite uruhushya ku mubiri wanjye , dore iyo anshaka ntibimusaba kuvunyisha, iyo umubiri we unkozeho ndagurumana nk’umuriro, uyu mukino uraryoshye , wowe unkiza ububabare ninjye nawe gusa ijoro ryose.”

Inyikirizo yayo igira iti “Utuma mpora mvuga ubusa iyo mbonye isura yawe, nkunda ubwiza bwawe , utuma mpora mvuga ubusa iyo nkoze ku kibuno cyawe.”

Ku munota wa kabiri n’amasegonda arindwi, Double Jay aririmba agira ati “Urukundo rwawe ruraryoshye , nkunda uburyo unyita ‘Daddy’ iyo tugeze ku gitanda , ibintu biba biryoshye ni wowe nkeneye sinshaka undi ijoro ryose ”

Yogati - Babo feat Bruce Melodie

Iyi ndirimbo yasohotse ku wa 25 Kamena 2022 aba bahanzi baririmba baganisha ku urukundo rwo kwishimisha babwira abakunzi babo ko bagiye kubaha ibiryoshye biruta ibyo babonye mbere.

Muri iyi ndirimbo Babo yumvikana agira ati “Iri joro ndashaka kugutura hasi , ndashaka kugutungura.”

Igitangira nabwo Melodie yumvikana agira ati “Rimwe, Kabiri, F**ck b**ch nkagusiga uvuga woow, uriteguye this big d***k iraturuka inyuma.”

Akomeza agira ati “Mukundwa ibi bintu si amakosa kandi si ukukubeshya ni ukuramira umuntu ufite inyota , mukundwa saa moya haba ari kera , umuntu ari hafi guhwera dukore urukundo rw’amanyanga , ndakugonga ndagupompa.”

Shawe – Marina

Iyi ndirimbo yasohotse ku wa 7 Gicurasi 2022, aho Marina aba aririmba agaruka ku kuntu yakunze ibyo umusore yamukoreye, ku buryo atakibasha gusinzira, ibitotsi byabuze ahora yumva amukeneye buri munsi.

Mu gitero cya kabiri, Marina aririmba agira ati “ Bwa mbere nkubona nabonaga utazahanyurana umucyo , utuma nzamuka hejuru cyane nkasakuza […] nkaho ndi umunyabyaha.”

Akomeza agira ati “Watumye mpora numva nagusanga imvumo (aho uba) buri munsi ukazimya uyu muriro , ibyo wankoreye nagize ngo ni ubufindo, wangize nk’ubana n’ubumuga bwo kutabona sinkibona abandi bahungu , Mana yanjye iri joro ryabaye rinini naraye ndwana n’uburiri nenda kwiyahuza imiti. ”

Ntaribi – Alto

Ni indirimbo yasohotse ku wa 10 Mutarama 2022, uyu musore aririmba agaruka ku buryo yasajijwe n’uburanga bw’umukobwa bigera n’aho amwizeza ko namwemerera amuha ibyishimo bidasanzwe.

Mu gitero cya kabiri Alto aririmba agira ati “Amarangamutima yandushije imbaraga, erega uko uteye biri kuncokoza, ndabona nshobora guseba kwifata biri kunanira, wankuyemo ibitekerezo ndatakara , iyo nyogo yawe ntisanzwe itumye nshaka ipantalo , ntabonye ubwo buryohe bwawe nanagupfira,”

Mu nyikirizo yayo agira ati “ birasaba akanya gato nitugera mu gitanda ndimenya, impande zose mu gitondo urabyuka unyita umuyobozi wawe.”

Akanyenga – Afrique

Iyi ndirimbo yasohotse ku wa 5 Gicurasi 2022, uyu musore yumvikana avuga uburyo atakihanganira kubaho atari kumwe n’umukunzi we ku buryo ahora amuhamagara amubwira ko amwifuza buri kanya.

“Ni ukuri kukubura ni nko guseba , udahari ubuzima ni ntabwo , njye si ngukundira koco gusa, uru rukundo si urwa mayibobo, ese ninguhamagara uraza ? Urandaza ? Ese ni nguhamagara uraza ? turabisoza , maze nkwihere akanyenga , erega ndagukunda , aho ubabara ndahakanda ndahatinda , uraza kubikunda, muri chamber muri chamber (cyumba).”

It’ ok – Papa Cyangwe, Fireman na Afrique

Iyi ndirimbo yasohotse mu minsi ishize yakozwe na Papa Cyangwe afatanyije n’abarimo Fireman ndetse na Afrique, aba bahanzi bumvikana bashimira umukobwa baba barakundanye bagatandukana batijuse urukundo ariko bakamushimira ibirimo ibihe bagiranye mu buriri.

Hari aho Afrique agira ati “Sinavuga ko wampombeye kuko n’ubundi wampaye ibitekerezo none inkumi z’i Kigali zose zansariye, n’ubundi twararyamanye, wenda nubwo ntijuse nzabikorera abasigaye […]”

Ni indirimbo yasamiwe hejuru n’abakunzi ba muzika batari bake, ndetse uwavuga ko yamaze iminsi iyoboye izikunzwe mu biganiro bitandukanye bicuranga umuziki ntabwo yaba abeshye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .