Imihigo ya Isaro Rolitha ushaka ikamba rya Miss Rwanda 2021

Yanditswe na Uwiduhaye Theos
Kuya 28 Gashyantare 2021 saa 12:51
Yasuwe :
0 0

Isaro Rolitha Benitha w’imyaka 21 ni umwe mu bakobwa 37 bari guhatanira ikamba rya Miss Rwanda 2021. Uyu mukobwa uhagarariye Intara y’Amajyaruguru, yavuze ku mushinga afite wo gukura abana b’inzererezi ku mihanda.

Isaro yiga mu mwaka wa mbere wa kaminuza mu bijyanye n’ubukungu. Mu kiganiro yagiranye na IGIHE yavuze ko igitekerezo cyo kwitabira Miss Rwanda yagifashe mu 2020, nyuma yo kwisuzuma agasanga yujuje ibintu byose bisabwa ngo abe yakwegukana ikamba.

Ati “Icyemezo cyo kwitabira Miss Rwanda nagifashe mu 2020. Naricaye ndavuga nti mfite byose bisabwa reka nanjye nitabire nshakishe amahirwe yo kuba nakwegukana ikamba. Ndiyizeye kandi nzi ko hamwe n’Imana byose nzabishobora.”

Yavuze ko yishimye cyane ubwo yatangazwaga mu bakobwa 37 bari gushakishwamo abazajya mu mwiherero wa Miss Rwanda 2021.

Ati “Umunsi batangaje abakobwa 37 batsinze nanjye ndimo, narishimye kuko numvaga ari bake kandi hari hahatanye benshi. Naravugaga nti ese ubu nanjye ndimo ariko nyuma bavuze izina ryanjye ndishima.”

Avuga ko ikintu yiteze kuri Miss Rwanda 2021 ari uko izamufasha gushyira mu bikorwa umushinga we.
Isaro yavuze ko umushinga afite ujyanye no gukura abana ku muhanda mu rwego rwo gukomeza gukemura ibibazo bijyanye n’ubuzererezi bikigaragara cyane.

Ati “Mfite umushinga nise ‘Umwana w’Umunyarwanda Ntiyandagare’, uzaba uje gukemura ikibazo cy’abana bo mu muhanda. Ni ukuvuga ko abana ari bo Rwanda rw’ejo, kubitaho bizaba ari ugusigasira ejo hazaza h’igihugu. Abana nibitabwaho bizatuma abana biyandarika baganyuka, abanywa ibiyobyabwenge bagabanuke ndetse benshi bajye mu ishuri.”

Mu 2019 uyu mukobwa yitabiriye Itorero Indangamirwa icyiciro cya 12, ryitabiriwe n’urubyiruko rw’Abanyarwanda rugera kuri 689, ndetse agira amahirwe yo gufatana ifoto na Perezida Kagame ibintu avuga ko yishimiye.

Ati “Igihe nari ndi mu itorero Indangamirwa mu 2019 i Gabiro, ku munsi wo kurisoza narishimye kuko twahawe amasomo y’ingirakamaro azadufasha. Kuba naragiyeyo ni ikintu gikomeye, twize amasomo menshi arimo aya gisirikare, amateka n’ibindi rero ku munsi wo gusoza mfata ifoto na Perezida Paul Kagame biranshimisha kuko nsanzwe mukunda cyane.”

Uyu mukobwa akunda kumva ibitabo mu buryo bw’amajwi no kubisoma, kwandika imivugo ndetse akanabyina bya Kinyarwanda.

Kuva ku wa 23 Gashyantare 2021, amatora ya Miss Rwanda yatangiye ku mugaragaro. Gutora hifashishijwe ubutumwa bugufi ni ukujya ahandikirwa ubutumwa bugufi, ukandika ijambo MISS ugasiga akanya, ugashyiraho nimero y’umukobwa utoye hanyuma ukohereza ku 1525.

Gutora binyuze kuri murandasi (online), bikorerwa ku rubuga rwa IGIHE. Amajwi y’abatoye binyuze kuri SMS afite 70% naho online ni 30%. Amatora azahagarikwa tariki 6 Werurwe 2021, umunsi uzatangarizwaho abakobwa 20 bazajya mu mwiherero.

Abahatana 20 ba mbere bazagera mu cyiciro cya nyuma, bazajya mu mwiherero uzatangira ku wa 6 Werurwe kugeza kuwa 20 Werurwe. Gusoza irushanwa bizabera muri Kigali Arena kandi bizatambuka kuri Televiziyo y’u Rwanda.

Isaro Rolitha Benitha w’imyaka 21 ni umwe mu bakobwa 37 bari guhatanira ikamba rya Miss Rwanda 2021
Uyu mukobwa yavuze ko igitekerezo cyo kwitabira Miss Rwanda yagifashe mu 2020 nyuma yo kwisuzuma agasanga yujuje ibintu byose bisabwa ngo abe yakwegukana ikamba

Amafoto: Miss Rwanda/Instagram & Muhizi Serge-IGIHE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .