Iri rushanwa ku rwego rw’intara ryatangiriye mu Majyepfo aho uturere twose tuyigize tuzahurira mu Karere ka Huye mu gihe cy’iminsi itatu kuva ku wa Gatatu, tariki ya 15 Ugushyingo 2023.

ArtRwanda-Ubuhanzi ni umushinga ugizwe n’irushanwa rishaka ndetse rikanashyigikira abanyempano mu nganda ndangamuco mu gihugu hose. Ushyirwa mu bikorwa na Imbuto Foundation ku bufatanye na Minisiteri y’Urubyiruko kuva mu 2018.

Abanyempano bayitabira banyura imbere y’akanama nkemurampaka gasuzuma impano zabo ndetse kagatanga inama z’uko bazinoza.

Mu bagize akanama nkemurampaka bashya harimo Umuhanzikazi Alyn Sano n’Umusizi Rumaga Junior.

Umuhanzikazi Alyn Sano n'Umusizi Junior Rumaga binjiye mu bagize Akanama Nkemurampaka ka ArtRwanda-Ubuhanzi

Alyn Sano yabwiye IGIHE ko kujya ku ntebe y’abagize akanama nkemurampaka bishimishije kuko byerekana agaciro abari n’abategarugori bahabwa.

Yagize ati “Ni icyizere ku bahanzikazi. Niba nabigeraho [kujya mu kanama nkemurampaka], buri wese yabikora kandi nanjye ndacyakora cyane. Bisaba umurava no kudacika intege.’’

Yabwiye urubyiruko kudafata ArtRwanda-Ubuhanzi nk’irushanwa rya bamwe kuko rishobora kubabera ikiraro kibageza ku nzozi zabo.

Alyn Sano ni umuririmbyi n’umwanditsi w’indirimbo wamamaye nyuma yo gukora indirimbo nka “Naremewe Wowe” yasohotse mu 2018. Mu minsi ishize aherutse kumurika album ye ya mbere yise “Rumuri”.

Ni umuhanzikazi umenyereye ibijyanye n’amarushanwa dore ko yitabiriye ’The Voice Afrique’ mu 2021 agarukira muri kimwe cya kabiri.

Junior Rumaga na we yishimiye icyizere yagiriwe akinjira mu gutoranya abafite impano muri ArtRwanda-Ubuhanzi, abasaba gushaka umwihariko utuma batandukana n’abandi.

Ati “Nishimiye igikorwa nk’iki, twakuranye inzozi zo kuba twabona abantu batugira inama, kubona aho tugaragariza impano zacu, nezezwa cyane rero no kuba umwe mu bafasha abandi kugera kuri izo nzozi nakuranye.”

Rumaga ni umusizi akaba n’umwanditsi w’ingeri zitandukanye z’ubuvanganzo. Yakoze ibisigo bizwi nka "Mazi ya nyanja", “Igisabisho’’, “Umugore si umuntu”, "Ayabasore" na “Narakubabariye”.

Mu bandi bagize Akanama Nkemurampaka ka ArtRwanda-Ubuhanzi harimo Mazimpaka Jones Kennedy, umaze imyaka 30 akina ndetse akanayobora filime; Umuhanzi w’Imideli Rwema Umutoni Laurène washinze Uzi Collection; Umuraperi Riderman ndetse n’Umuhanzi akaba n’Umunyabugeni, Bushayija Pascal bari mu cyiciro cya kabiri ndetse na Wilson Misago, Umuyobozi wa ZACU Entertainment na ZACU TV wifashishijwe mu cya mbere mu 2018.

ArtRwanda-Ubuhanzi yitabirwa n’abahanzi bari hagati y’imyaka 18-30, bahatana mu byiciro icyenda birimo Kwandika no Gutunganya Filime, Gufotora, Ubugeni bwifashishije ikoranabuhanga, Ikinamico n’Urwenya, Imbyino, Imideli, Umuziki, Ubusizi n’Ubuvanganzo ndetse n’Ubugeni.

Biteganyijwe ko amarushanwa rusange azaba ku wa 15 Ugushyingo - 9 Ukuboza mu ntara zose z’igihugu mbere y’uko ku wa 14 - 16 Ukuboza 2023 hakorwa ayo ku rwego rw’igihugu.

Abahanzi 60 ni bo bazatoranywa nk’abahize abandi, bahugurwe ku cyabafasha kunoza impano zabo mu mwiherero uzabanziriza ibirori byo guhemba abahize abandi mu ntangiriro za 2024. Abazatsinda muri buri cyiciro bazahabwa ibihembo birimo amafaranga, ubujyanama, amahugurwa ku kunoza imishinga yabo no kubahuza n’amasoko ajyanye n’ibyiciro by’ubuhanzi barimo.

Umusizi Rumaga Junior yavuze ko kuba yaragiriwe icyizere cyo kujya mu Kanama Nkemurampaka bitanga icyizere ko abari mu busizi n'ubuvanganzo bakomeje guhabwa agaciro

Alyn Sano yanyuzwe n'icyizere yagiriwe cyo kwinjira mu bagize Akanama Nkemurampaka k'irushanwa rishakisha abanyempano mu gihugu hose

Umuraperi Riderman ni umwe mu bagize Akanama Nkemurampaka ka ArtRwanda-Ubuhanzi

Mazimpaka Jones Kennedy umaze imyaka 30 akina ndetse akanayobora filime ni we Muyobozi w'Akanama Nkemurampaka ka ArtRwanda-Ubuhanzi

Umuyobozi wa ZACU Entertainment na ZACU TV, Wilson Misago, ari mu Kanama Nkemurampaka ku nshuro ya kabiri

Rwema Umutoni Laurène, washinze ndetse akaba anayobora Inzu igezweho mu guhanga imideli, Uzi Collection, ari mu bagize akanama nkemurampaka

Umuhanzi akaba n’Umunyabugeni, Bushayija Pascal, ari mu bagize akanama nkemurampaka aho yibanda ahanini ku cyiciro cy'abakora ubugeni

ukundane Pasteur akoresha amazina ya “Izra’’ mu buhanzi, ni umwe mu bo kwitegwa mu bihe biri imbere

Mukundente Esther ni umunyempano wagaragaje imiririmbire yihariye ndetse afite ijwi ryihariye rikurura uryumva

Umunyamideli Ndayishimiye Kamali Jimmy yagaragaje impano ye yo kudoda imyambaro ndetse we na bagenzi be baserukanye iyo bagizemo uruhare

Niyitegeka Jean d’Amour afite impano iri hejuru mu Njyana ya Drill. Yaririmbye indirimbo ye ataka ubutwari bw'Inkotanyi agashimangira ko ari umufana wazo

Abanyabugeni baserutse berekana impano bafite mu gushushanya

Bibebityo Anicet ni umunyempano mu kuvuga imivugo. Yasangije akanama nkemurampaka uwo yise “Ubundi ubupfura ni iki?”, urimo ubutumwa bujyanye no gusigasira ubumwe n’ubwiyunge bw’Abanyarwanda

Rudakemwa Hidaya afite impano yo kuririmba anicurangira gitari

Muhimpundu Jeannette afite impano yo gukina ikinamico

Tuyisenge Alexis w'i Nyaruguru ni umuraperi ukoresha izina rya Fi Brown mu muziki

Uwajeneza Jules afite impano n'ubushake bwo gukina Ikinamico zo mu ruhame na Filime

Akanama Nkemurampaka ka ArtRwanda-Ubuhanzi kagizwe n'abahanga mu nganda ndangamuco zitandukanye

Hotel Mater Boni Consilii ni yo yakiriye abanyempano bo mu Majyepfo aho bagombwa gutoranyirizwa mu minsi itatu

Amafoto: ArtRwanda-Ubuhanzi