Ikibazo cyari cyarashyize Meddy mu nkiko cyakemutse mu bwumvikane

Yanditswe na Muvunyi Arsène
Kuya 21 Werurwe 2019 saa 10:56
Yasuwe :
0 0

Ibiganiro hagati y’uhagarariye Meddy na Sosiyete yitwa Kaga Rwanda Ltd, byarangiye mu bwumvikane bitabaye ngombwa ko bakomeza mu nkiko.

Ku wa 14 Werurwe 2018 mu Rukiko rw’Ubucuruzi ku Kimuhurura nibwo habaye Inama ntegurarubanza Ikigo cyitwa Kagi Rwanda Ltd cyarezemo umuhanzi Ngabo Medard [Meddy] kubera kutitabira igitaramo yari yatumiwemo mu Bubiligi mu gihe hari amafaranga yari yishyuwe.

Kaga Ltd Rwanda yishyuza Meddy amafaranga agera ku bihumbi $10 bari bamuhaye mbere y’uko ava muri Leta Zunze Ubumwe za Amerika aho asanzwe aba.

Icyo gihe impande zombi zasabye umwanya wo kubanza kuganira ikibazo kigakemuka mu bwumvikane, Umwanditsi w’urukiko asaba ko byakorwa byananirana urubanza rukazakomeza tariki 22 Werurwe 2019.

Mu Kiganiro IGIHE yagiranye n’Umunyamategeko uhagarariye Meddy, Me Jean Claude Mutabazi Abayo, yavuze ko kuri uyu wa 20 Werurwe 2019 bicaranye n’uruhande rurega bagakemura ikibazo.

Ati “Byarangiye neza, ikibazo cyarakemutse, habayeho ubwumvikane.”

Yongeyeho ko ku bwe atigeze yifuza ko ikibazo cy’umukiliya we kijyanwa mu itangazamakuru anirinda kuvuga ibikubiye mu myanzuro yafashwe.

Me Salimu Nshuti wunganira Kaga Rwanda Ltd nawe yemeje ko umukiliya we yumvikanye n’uruhande rwa Meddy, igisaye ari uko basubira ku rukiko hagakorwa inyandiko mvugo izemezwa na Perezida w’Urukiko.
Ati “Iyo mwagize ikintu mwumvikana mugishyikiriza umwanditsi w’urukiko agakora inyandiko mvugo, akayiha perezida akayisinyaho igafatwa nk’icyemezo cyafashwe n’urukiko.”

Bitenganyijwe ko iyi mihango izakorwa kuri uyu wa Gatanu tariki 22 Weruwe 2019.

Meddy n'abamurega bemeye kumvikana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza