Igor Mabano yishyize mu mwanya w’umusore ugiye kurushinga yandikira amashuka yararagamo

Yanditswe na Uwiduhaye Theos
Kuya 8 Gashyantare 2019 saa 10:14
Yasuwe :
0 0

Igor Mabano uri mu bahanzi bahagaze neza muri iki gihe, yashyize hanze indirimbo yibajijweho byinshi bitewe n’izina ryayo.

Iyi ndirimbo uyu muhanzi yise ‘Dear mashuka (Araje)’ yayishyize hanze mu gitondo cyo kuri uyu wa Gatanu tariki 8 Gashyantare 2019.

Yari amaze iminsi mike ashyize hanze ifoto iyamamaza yibajijweho byinshi kubera izina ry’indirimbo ndetse nawe mu kiganiro na IGIHE yavuze ko kuva yajya hanze ari kwakira ubutumwa bwinshi abantu bamubaza ubutumwa yashakaga gutanga.

Muri iyi ndirimbo hari nk’aho agira ati “Nshuti mashuka, nkwandikiye uru rwandiko ngira ngo ngushimire igihe twabanye wabaye inshuti nziza wambikiye amabanga none igihe kirageze ntangiye ubundi buzima.”

Mu nyikirizo yayo yumvikanamo avuga ngo “Araje, araje nta kundi wabigenza mureke atambuke niwe umutima wakunze.”

Uyu musore akomeza yumvikanisha ko kurara mu mashuka wenyine nta mahuriro no kuba agiye kujyamo umukunzi we.

Aganira na IGIHE, Mabano yavuze ko muri iyi ndirimbo yishyize mu mwanya w’umusore ugiye kurushinga uba ari gutunganya mu nzu yararagamo.

Ati “Twashakaga ikintu kijyanye n’ubukwe. Umusore aririmba ibyo kuva mu busiribateri, dusanga hari ibintu byinshi akora yitegura umugore, icyo gihe umukobwa ataraza aba aba mu nzu ye wenda amashuka ayahinduranya ariko muri ibyo byose iyo atarazana umugore aba arara amuhamagara bakundana usanga icy’ingenzi iyo umugore aje mu nzu ya mashuka umugabo yararagamo bayakuraho, ni ibintu twabajije abantu bakuru.”

Yakomeje ati“Twe twaririmbiraga umusore uba ari nko gutegura inzu ye agakuraho amashuka asanzwe ari kuyareba akayandikira ibaruwa y’ibihe byiza bagiranye. Kuyita ‘Dear mashuka (Araje)’ ni uburyo bw’inganzo.”

Mabano avuga ko iyi ndirimbo yatangiye kuyitunganya mu mpera za 2018. Akaba ari gutegura no gushyira hanze amashusho yayo mu minsi iri imbere.

Uyu muhanzi ari kwitegura gutunganya album ye ya mbere, ku buryo uyu mwaka warangira ibijyanye nayo byose byararangiye gusa ntaramenya umubare w’indirimbo zizajyaho.

Umva indirimbo nshya ya Igor Mabano

Igor Mabano ni umunyempano wihariye wize umuziki ku ishuri ryahoze ku Nyundo
Igor Mabano yishyize mu mwanya w'umusore ugiye kurushinga ahimba indirimbo asezera ku mashuka yararagamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza