00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri filime Nyarwanda ivuga ku mahano akorerwa mu madini

Yanditswe na Uwase Kevine
Kuya 25 Mutarama 2023 saa 10:22
Yasuwe :

Mu buzima habaho ibihe umuntu acamo bimugora rimwe na rimwe akagera aho yiheba, akumva ko inzira yonyine isigaye ari ukuyoboka idini akiyegereza Imana ayisaba imbaraga zimufasha gukomeza gusunika ubuzima.

Mu bo kwiyambaza muri uru rugendo aba atangiye harimo abapasiteri, abapadiri n’abandi Bihayimana ngo bamufashe muri urwo rugendo.

Filime y’uruherekane yitwa ‘The Bishop’s Family’, igaruka ku buzima abavugabutumwa bacamo ndetse na bimwe bibera inyuma y’amarido kenshi abakirisitu batamenya.

Iyi filime igaruka ku nkuru y’umuvugabutumwa witwa Dan, washatse umugore witwa Jane wanyuze mu nzira itari nziza mu bukumi bwe, ibyo abakirisitu bafata nk’ubupagani.

Uko iminsi igenda yicuma ni ko ya mico ya kera y’umugore we igenda imutamaza ikarushaho kubangamira umurimo w’umugabo we Dan wo kuba umushumba mukuru w’itorero.

Aba bombi byarana abana batatu, umuhungu n’abakobwa babiri. Abana bahura n’ihurizo rikomeye ryo guhitamo uwo bakurikiza cyangwa uwo bazafatiraho icyitegererezo mu babyeyi babo.

Muri iyi filime Pasiteri Dan akorerwa akagambane n’umwungiriza we bafatanyije umurimo w’Imana Pasiteri Phillip, umuca ruhinganyuma akajya kuvugana n’abagize itorero abasaba ko yakurwa ku mwanya afite wo kuyobora itorero.

Iyi filime ‘The Bishop’s family’ itegurwa na Zacu Entertainment yatangiye gusohoka mu 2022, ubu igeze kuri season ya kabiri, igaca kuri shene ya 38 Zacu TV kuri Canal Plus.

Kubera uburyo iyi filime ikurikiranwa cyane haba mu Rwanda ndetse no hanze yarwo, byatumye abayireba basaba ko yashyirwa no kuri YouTube aho byaborohera kuyireba.

Ubuyobozi bw’uru rubuga bwabwiye IGIHE ko guhera ku itariki 2 Gashyantare 2023 izashyirwa kuri Youtube uhereye kuri season ya mbere nk’uko abakunzi bayo babisabye.

Ati “Twabonye ko abakurikira iyi filime bari hanze y’igihugu bibagora kuyireba ndetse badusaba ku bwinshi ko twayishyira kuri Youtube, ubu bazatangira kuyireba nta kabuza uhereye mu kwezi gutaha buri wa kane saa sita, ku isaha yo mu Rwanda.”

Iyi filime ‘The Bishop’s Family’ igaragamo abakinnyi b’imena nka Mwiyeretsi Alain Samson ukina ari Bishop Dan, Rutayisire Bloda ukina ari Jane, Tuyisenge Aime Valens ukina ari pasiteri wungirije, Iradukunda Aboubakar ukina ari Andrew umwana wa Bishop n’abandi.

Tuyisenge Aime Valens ukina ari pasiteri wungirije
Rutayisire Bloda ukina ari Jane muri ‘The Bishop’s Family’
Iradukunda Aboubakar ukina ari Andrew, akaba ari umwana wa Bishop
Mwiyeretsi Alain Samson ukina ari Bishop Dan muri iyi filime

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .