Ibyo utamenye ku mikorere y’aba DJ bakoreshaga cassette

Yanditswe na Muvunyi Arsène
Kuya 17 Nyakanga 2019 saa 09:42
Yasuwe :
0 0

Disc Jockey [DJ] ni umuntu w’ingenzi cyane mu birori cyane cyane ibyahuje abantu bashaka kubyina. Ashinzwe kuvanga imiziki mu buryo buryoheye ugutwi kandi butuma umuntu atarambirwa vuba.

Uretse amacupa y’inzoga ziryoshye, icyokezo kirimo inyama z’ubwoko butandukanye, akabari kaba gakeneye DJ mwiza ufite ubushobozi bwo kuryohereza abakiliya.

Uburyo kuvanga imiziki muri iki gihe bikorwa byuzuyemo ikoranabuhanga ryinshi. DJ imbere ye aba afite mudasobwa irimo porogaramu ya mudasobwa yifashishwa muri aka kazi [Serato cyangwa Scratch live]. Iba irimo kandi indirimbo zose ashobora gukenera mu gihe ari gucuranga

Aba afite kandi ibikoresho yifashisha muri aka kazi by’ubwoko butandukanye bitewe n’ubushobozi. Hari abakoresha turn tables igikoresho cyifashihwa mu kuvanga imiziki kuva na kera aho gishyirwamo ibyitwa Long Player [LP] biba bimeze nk’ibisahani ari nabyo biba biriho indirimbo.

Hari kandi CD Player ari nazo zifashishwa cyane. Byo ni ibyuma bikora nka turn tables ariko byo bishyirwamo CD cyangwa flash Disk mu mwanya wa LP.

Ibyuma tuvuze haruguru DJ ashobora kubikoresha byonyine cyangwa se akabihuza na mudasobwa.

Icya nyuma ni controller ni igikoresho cyifashishwa mu kuvuganga imiziki ariko cyo kiri munsi ya turn table na CD Player.

Mazimpaka Kennedy yabaye DJ mu 1991

Hiyongeraho na Mixer imufasha guhindura indirimbo, kuringaniza amajwi, kongera urusaku, kwihutisha indirimbo n’utundi turingushyo turyoshya umuziki [effects].

Iyo ibi byuma byose bihuye na DJ wahisemo neza indirimbo zijyanye n’icyiciro cy’abo ari gucurangira, akamenya n’igihe cyiza cyo kuzihinduranya, bishimisha abanyabirori bagataha bamwirahira.

Mu myaka yo mu 1990 ibi twavuze haruguru hafi ya byose ntibyabagaho kandi nabwo barabyinaga bagakesha.

IGIHE yaganiriye na Mazimpaka Kennedy wabaye DJ guhera mu 1991 ubwo yabaga muri Uganda.

Yakoze mu tubyiniro dutandukanye harimo akari gakomeye muri icyo gihe kitwaga Club Clouds, acuranga mu two mu Rwanda nka Sun City, Hotel Chez Lando, Vision Club, Alpha Palace n’ahandi henshi .

Uyu musaza ufite amateka akomeye mu ruganda rw’imyidagaduro mu Rwanda, yatubwiye imikorere y’aba DJ mu bihe byo mu 1990 ubwo iterambere ryari ritaraba ryinshi.

Mazimpaka yavuze ko ubwo yari agikorera muri Uganda, DJ yakoresha turn table [itameze nk’iz’ubu] ndetse na cassette, CD itaraza.

Ati “Turn tables zabaga mu tubyiniro dukomeye, CD zari zitaraza , wajya mu tubyiniro duciriritse ugasanga hari tape [cassette].”

Mu gihe Turn tables z’ubu zifite ubushobozi bwo gukorana na mudasobwa DJ akavanga indirimbo ari ho azikura , iz’icyo gihe siko zari zimeze kuko zabaga zifite igisahani [LP] kiriho indirimbo DJ akoresha.

Kennedy ati “Zabaga zifite ibisahani, byabaga byifitemo indirimbo kandi ukagomba gushyiraho urushinge rwayo kugira ngo abe ari rwo rusoma iyo ndirimbo. Icyo gisahani cyabaga kiriho indirimbo imbere n’inyuma.”

Izo LP zabaga ziriho imirongo izengurutse ku buryo iyo DJ yashakaga guhindura indirimbo yabanza kwimura rwa rushingiye. Nta hantu yabaga areba byanditse yabaga yarazifashe mu mutwe.

Ibi bisahane byagurirwaga mu mahanga kandi byazaga birimo indirimbo, bitandukanye n’uko DJ yashoboraga gushyirisha indirimbo ashaka kuri CD.

Mixer zakoreshwaga icyo gihe uretse aho guhindurira indirimbo no kuringaniza amajwi ntabwo zagiraga effects nk’iz’ubu.

Utubari duciriritse twakoreshaga Casette mu gucurangira abakiliya

Uko DJ yakoreshaga cassette

Nk’uko Kennedy yabivuze Cassette zakoreshwaga mu tubyiniro tw’abaciye bugufi ndetse nawe yigeze kuzikoresha ubwo yageraga mu Rwanda nyuma ya Jenoside yakorewe Abatutsi mu 1994 bakamwiba ibyuma yari akuye muri Uganda.

Avuga ko yabaga afite ibikoresho bibiri byagenewe gucuranga imiziki iri kuri cassette [decks] noneho akajya asimburanya indirimbo ziri kuri buri ruhande.

Bakoreshaga ikaramu bakaragaga cassette kandi bakamenya indirimbo bakeneye aho iri akabona kuyishyira muri ya deck ubundi agacuranga.

Kennedy ati “Wabanzaga gushyiramo ikaramu ugashaka ya ndirimbo , ugapima neza aho iri butangirire. Iyo ufashe cassette hari uturongo ubonamo hagati, wahitaga ureba aho indirimbo imwe yarangiriye n’aho igiye gutangirira ugahita ubimenya neza. Iyo wabaga ufite cassette y’iminota 60 wabaga uzi aho indirimbo irangirira.”

Iyo DJ yacurangaga ijoro ryose kugeza mu gitondo byibuze yabaga afite cassette 50 kugira ngo abashe gucurangira abakiliya kandi adasubijemo indirimbo bigeze kumva.

Uruhurirane rwa turn tables, cassette na CD

Aho CD ziziye, DJ yashoboraga gucurangira icya rimwe indirimbo akuye kuri turn table, cassette na CD.

Kennedy yavuze ko yafataga turn table agashyiraho cya gisahane kiriho indirimbo ashaka gucuranga, agafata icyuma cyagenewe gucurangirwamo CD ndetse na deck zicurangirwamo cassette maze amajwi yo akayahuriza muri mixer ubundi akajya azamura indirimbo ashaka.

Ibi byafashaga DJ gucuranga indirimbo nyinshi kandi zitandukanye bikaryohera abanyabirori.

Byari bikomeye

Kuri Kennedy icyo gihe ngo byari bigoye kandi bisaba ubwitonzi buhanitse ugereranyije n’iby’ubu, kuko ibyinshi bakoreshaga amaboko yabo, ntaho basoma mu gihe kuri ubu bikorerwa kuri mudasobwa.

Ati “ Byari ugukoresha amaboko, iby’iki gihe urumva ni mudasobwa. Uyijyaho ugashaka BPM [igena umuvuduko indirimbo iriho] ushaka, kuvanga ntibikugore ariko ibi byarakurushyaga, byagusabaga kwitonda cyane.”

DJ w’icyo gihe yabaga afite akazi kenshi cyane agomba kumenya gutoranya mu gihe gito LP na cassette ziriho indirimbo akeneye mu murundo yagaba yagendanye.

DJ Kelvin uri mu bavanga imiziki kuri ubu, avuga ko aba DJ ba kera bari abahanga kuko bakoreshaga ubwenge bwinshi ugereranyije n’ab’ubu bifashisha cyane mudasobwa.

Ku rundi ruhande ariko avuga ko ikoranabuhanga muri aka kazi ryafashije byinshi mu kunoza umwuga wabo.

Ati “Ubu biroroshye kumenyekanisha indirimbo z’abahanzi kuko umuntu abasha kuzibika kuri mudasobwa ye. Ntabwo ushobora kurambira abantu kuko ufite ubushobozi bwo gutunga indirimbo nyinshi kuri mudasobwa.”

Ikindi ni uko gutwara indirimbo byoroshye kuko icyo gihe DJ yikoreraga umutwaro wa cassette na LP mu gihe ubu indirimbo azibika kuri flash disk cyangwa ubundi buryo bwo kubika ibintu ku buryo bitangirika.

Imiterere ya LP yabaga iriho indirimbo zacurangwaga muri turn table
Turn tables yifashishwaga mu kuvanga imiziki mu bihe bya kera
Urushinge rwifashishwaga mu gusoma indirimbo ziri kuri LP ruri mu ibara ry'umukara
CD player ni kimwe mu bikoresho bishya byifashishwa mu kuvanga imiziki
DJ Kelvin avuga ko ikoranabuhanga ryoroheje akazi kabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza