Iki gitaramo cyiswe ’Africast Fest: A Shallipopi Xperience’, cyabaye ku mugoroba wo ku wa Gatanu, tariki ya 29 Gicurasi 2026.

Gitegurwa ku bufatanya n’uruganda rwenga ibinyobwa rwa ‘Skol Rwanda’ rubinyujije mu kinyobwa cyarwo cya ‘Skol Malt’.

Cyabanjirijwe n’ibikorwa bitandukanye by’imyidagaruro byiganjemo ibitaramo byahawe izina rya ‘Shallipopin’ Ahanad’, byifashishwaga mu kukimenyekanisha.

Abakunzi b’umuziki b’ingeri zinyuranye biganjemo urubyiruko ni bo bari babukereye mu gitaramo cyo kuri uyu wa Gatanu, aho wabonaga ikijyanye n’imyambarire bagikozeho mu buryo bw’umwihariko.

Kid From Kigali na Shallipopi nibo bahanzi bagombaga gutaramo. Igitaramo cyatinze gutangira bitewe n’uko kuva Saa moya z’ijoro kugera nka Saa tanu z’ijoro abantu bari bakiri kwinjira mu ihema rya Camp Kigali aho cyabereye ndetse n’abahageze ubona batiteguye guhita binjira ngo batarame.

Saa yine zirengaho iminota nka 20 nibwo MC Policy yatangiye gushyushya abari bageze mu ihema ryari kuberamo igitaramo, mu magambo ye buri kanya akabibutsa ko bari buze kugirana ibihe byiza.

Saa sita z’ijoro zibura iminota mike nibwo MC yahamagaye ku rubyiniro Kid From Kigali atangira gususurutsa abakunzi b’umuziki we.

Kid From Kigali yinjiriye ku ndirimbo yitwa Rich yakoranye na Arnaud Gray na Ish Kevin akomereza ku zindi ndirimbo zirimo ‘Inyota’.

Uyu musore wageze aho agahamagara umuhanzi ukizamuka mu muziki witwa Mwiza, yatanze ibyishimo ku bakunzi be bari bitabiriye ku bwinshi iki gitaramo.

Saa sita n’igice z’ijoro nibwo Shallipopi wari utegerejwe na benshi yageze ku rubyiniro ahera ku ndirimbo ye ‘Sharpiru’ iri mu zakunzwe cyane, akomereza kuri ‘High tension n’izindi nyinshi.

Nyuma y’iminota 25 ku rubyiniro nibwo Shallipopi yageze ku ndirimbo ye ya nyuma yagombaga kuririmba ari yo ’Laho’, ifatwa nk’ikirango cy’umuziki we maze asaba abafana be kumufasha bakayiririmbana na bo ntibamutenguha.

Kid From Kigali ni we wabimburiye Shallipopi ku rubyiniro

Kid From Kigali yajyanye umuhanzi Mwiza ku rubyiniro bafatanya gususurutsa abakunzi b'umuziki bari muri Camp Kigali

Kid From Kigali yishimiwe cyane ubwo yari ageze ku ndirimbo 'Muraho'

Ibyishimo byigaragazaga ku bakunzi b'umuziki bari muri Camp Kigali

Amandah Darling ni umwe mu bishimiye kwitabira iki gitaramo

Shallipopi yageze ku rubyiniro ubona afite imbaraga nyinshi

Uyu musore ni umwe mu bahagaze neza mu muziki muri Nigeria

Hari ku nshuro ya mbere Shallipopi ataramiye i Kigali

Shallipopi yishimiwe ku rwego rwo hejuru

Abiganjemo urubyiruko bari bitabiriye igitaramo cya Shallipopi

Abantu b'ingeri zose bari bitabiriye iki gitaramo

Nta foto nta cyabaye, buri wese yafataga izamwibutsa ko ari mu barebye Shallipopi ubwo yataramiraga bwa mbere mu Rwanda

Abitabiriye iki gitaramo bari biganjemo urubyiruko

Amafoto: Cyubahiro Key