Ni igitaramo cyabaye ku wa Gatandatu tariki 16 Kanama 2025, muri Kigali Universe.

Cyaririmbyemo abahanzi batandukanye barimo Ruti Joel washimishije benshi mu bihangano bitandukanye. Uyu musore yaririmbye indirimbo ze zakunzwe zirimo “Cunda”, “Amaliza”, “Cyane” n’izindi.

Mike Kayihura we yaririmbye izirimo “Sabrina”, “Anytime”, “Zuba” na “Tuza” yakunzwe cyane. Uyu muhanzi mu ndirimbo yaririmbye zashimishije benshi harimo iyo yakoranye na DJ Pius itarajya hanze.

Alyn Sano nawe uri mu bakobwa bakundirwa ikimero cye ndetse n’ubuhanga mu kuririmba, yashimishije abitabiriye iki gitaramo mu ndirimbo ze zirimo “Tamu Sana”, “Chop Chop” aheruka gushyira hanze yahuriyemo na Bensoul wo muri Kenya n’izindi. Uyu mukobwa nawe yatunguranye aririmbana na DJ Pius indirimbo yabo itarajya hanze.

Undi uri mu banyuze ku rubyiniro ni DJ Marnaud. Uyu musore nawe wagiye akora ibihangano bitandukanye, yishimiwe mu ndirimbo yahuriyemo n’abandi bahanzi, ariko ananyura abitabiriye biturutse ku kuntu yashyushyaga ibi birori.

DJ Pius ubusanzwe witwa Rickie Pius Rukabuza yagiye anyura ku rubyiniro inshuro zitandukanye. Uyu mugabo umaze imyaka 15 irenga ari umwe mu nkingi zikomeye mu myidagaduro yagiye aririmbana n’abahanzi bitabiriye igitaramo cye indirimbo zitarajya hanze. Ni nako byagenze kuri DJ Marnaud bahuriye ku rubyiniro bagafatanya gususurutsa abitabiriye.

Joshua Baraka uri mu bahanzi bagezweho muri Afurika by’umwihariko ukorera umuziki muri Uganda ariko ufite nyina w’Umunyarwandakazi, yishimiwe by’ikirenga muri iki gitaramo.

Uyu musore yaririmbye indirimbo ze zikunzwe nka “Nana” yamwubakiye izina, “Dalilah’’, “Wrong Places” imaze amezi make igiye hanze n’izindi.

Joshua Baraka yaherukaga kuririmbira mu Rwanda mu gitaramo cyabaye tariki 24 Kamena 2023 kuri Mundi Center mu Karere ka Kicukiro. Yagihuriyemo n’abahanzi barimo Boy Chopper ukizamuka, Kivumbi, Ish Kevin, Mike Kayihura na Zagazillions.

DJ Pius wamutumiye mu gitaramo ni umwe mu bamaze igihe kinini mu ruganda rw’imyidagaduro mu Rwanda.

Yamenyekanye ari umunyamakuru kuri City Radio by’umwihariko aba n’umwe mu bavanga imiziki bakomeye bamenyekanye mu myaka isaga 10 ishize. Mu muziki yaririmbye mu itsinda rya Two4Real yari ahuriyemo na TKay.

Abafana bari benshi

DJ Marnaud ku rubyiniro

DJ Pius amaze imyaka 15 ari umwe mu batanyeganyezwa mu myidagaduro mu Rwanda

DJ Pius na Jules Sentore baririmbanye muri iki gitaramo

DJ Pius na Mike Kayihura bahuriye ku rubyiniro

Inkumi z'i Kigali zari zakoranyeho

Miss Muheto Divine ni umwe mu bari bitabiriye

Pius yacishijemo acurangira abitabiriye

Ruti Joel ku rubyiniro

Muri Kigali Universe habereye iki gitaramo hari abafana benshi

Alyn Sano yaririmbye indirimbo ze zakunzwe

Alyn Sano ubwo yari ari ku rubyiniro

Baraka yishimiye kuririmbira mu Rwanda bwa kabiri

Abakunzi b'umuziki bishimiye gutaramirwa na Joshua Baraka

Joshua Baraka akundirwa imiririmbire ye yihariye

Ni ubwa kabiri Joshua Baraka yari ataramiye i Kigali

Joshua Baraka ni umwe mu basore bagezweho mu muziki wa Uganda

Uyu musore yacishijemo aracuranga