00:00:00 IGIHE NETWORK KN KINYARWANDA EN ENGLISH FR FRANCAIS

Ibyamamare byasezeye ubugaragu mu 2022(Amafoto)

Yanditswe na Mahoro Vainqueur
Kuya 21 Ukuboza 2022 saa 04:41
Yasuwe :

Umwaka wa 2022 wabereye bamwe uw’umugisha, usiga bahuye n’umunsi utazibagirana mu mateka yabo, bakora ibirori byasize bahanye isezerano n’abo bakunda bemeranya kubana akaramata.

Muri iyi nkuru IGIHE yagarutse kuri bamwe mu banyarwanda b’ibyamamare basezeye icyiciro cy’ubugaragu muri uyu mwaka.

Cyuzuzo Jeanne d’Arc

Umunyamakuru umaze imyaka irenga 10 muri uyu mwuga, umwaka wa 2022 usize atanze ibirori ku nshuti n’imiryango, akora ubukwe yemera kubana akaramata na Thierry Eric Niyigaba.

Ni ibirori byabaye ku wa 12 Ugushyingo 2022 nyuma y’amezi 11 yambitswe impeta y’urukundo, imihango yo gusaba no gukwa yabaye ku wa 5 Ugushyingo 2022.

Kuri ubu ijwi rya Cyuzuzo Jeanne D’Arc ryumvikana kuri radiyo ya Kiss FM no mu kiganiro ‘Ishya’ gitambuka kuri Televiziyo y’u Rwanda.

The Ben na Pamella

Nyuma ya amezi 11 umuhanzi The Ben yambitse impeta umukunzi we Uwicyeza Pamella, aba bombi bahamije urwo bakundana bemeranya kubana akaramata imbere y’amategeko ya Repubulika y’u Rwanda.

Mugisha Benjamin [The Ben] yahaye Uwicyeza Pamella iri sezerano ku wa 31 Kanama 2022 mu muhango wabereye mu Murenge wa Kimihurura, mu Karere ka Gasabo.

Mu 2019 ni bwo hatangiye kuvugwa inkuru z’urukundo hagati y’umuhanzi The Ben na Uwicyeza Pamella witabiriye irushanwa rya Miss Rwanda 2019 nubwo nta kamba yegukanye icyo gihe.

Miss Balbine Umutoni

Ku wa 1 Ukwakira 2022 ni itariki yasize Miss Mutoni Balbine wabaye igisonga cya kane cya Miss Rwanda 2015 asabwe anakobwa na Kwitonda Arsène nyuma y’ imyaka umunani bari bamaze bakundana.

Mbere y’uko aba bombi bakora ubukwe, bakunze kugaragara bari kumwe mu bihe bitandukanye kuva mu 2014 ubwo uyu mukobwa yitabiraga akanegukana ikamba rya Miss High school.

Uru rugendo rw’amarushanwa y’ubwiza, Balbine yarugendanye na Kwitonda Arsène bagendana agatoki ku kandi ubwo yitabiraga irushanwa rya Miss Rwanda mu 2015 akegukana ikamba ry’Igisonga cya kane.

Rugamba Yverry

Rugamba Yves wamamaye mu muziki ku izina rya Yverry, ku wa 12 Kamena 2022 yahamije urwo akunda Uwase Vanessa uzwi nka Vanillah batanga ibirori ku nshuti n’umuryango bemeranya kubana akaramata.

Nyuma y’amezi atatu barushinze aba bombi bibarutse imfura ku wa 2 Nzeri 2022.

Umunyamakuru Clarisse Uwimana

Ku wa 3 Nzeri 2022 ni umunsi uzahora wibutsa umunyamakuru Uwimana Clarisse ibirori bye na Kwizera Bertrand Festus byasize bahanye isezerano ryo kubana akaramata imbere y’Imana muri Kiliziya ya Sainte Famille.

Urukundo rw’aba bombi ntirwigeze ruvugwa cyane, gusa mu ijoro ryo ku wa 19 Kamena 2022 nibwo Kwizera yasabye Uwimana Clarisse ko yazamubera umugore undi na we arabyemera.

Uwimana Clarisse ni umunyamakuru wa siporo ukunzwe na benshi mu Rwanda. Yakoreye ibitangazamakuru bitandukanye birimo City Radio, Contact FM, Flash FM, Vision FM na B&B FM Umwezi akorera uyu munsi.

Niyomubyeyi Noëlla (Fofo)

Nyuma y’’imyaka itatu Niyomubyeyi Noëlla wamamaye nka ‘Fofo’ na Daniel Niyigena bamaze bakundana, bashimangiye urukundo rwabo ku wa 2 Ukwakira 2022 basezerana kubana akaramata.

Niyomubyeyi Noëlla watangiye gukina filime mu 2016 asanzwe azwi cyane ku mbuga nkoranyambaga kubera filime akinamo ndetse n’ikimero cye gitangarirwa na benshi.

Umunyamakuru Shimwayezu Cedric

Shimwayezu Cedric, umunyamakuru wa Isango Star umenyerewe mu biganiro birimo Isango na Muzika ndetae na Sunday Night ku wa 20 Kanama 2022 yahuje inshuti n’umuryango mu birori byasize asezeye ubugaragu yemera kubana akaramata na Mahoro Guillaine.

Aba bombi bakoze ubukwe nyuma y’amezi ane Shimwayezu Cedric asabye Mahoro Guillaine ko yazamubera umugore.

Mukayizere Jalia Nelly [Kecapu]

Ku wa 23 Nyakanga 2022 Mukayizere Jalia Nelly wamenyekanye nka Kecapu muri sinema yasabwe anakobwa na Mutabazi Jean Luc nyuma y’imyaka 10 bari bamaze bakundana.

Tariki ya 27 Gicurasi 2022 nibwo aba bombi basezeranye imbere y’amategeko mu Murenge wa Gisenyi mu Karere ka Rubavu. Muri Gicurasi 2022 nibwo Mutabazi yamwambitse impeta Mukayizere amusaba ko yazamubera umugore undi na we arabyemera.

Rwema Denis

Denis Rwema wabaye umujyanama w’abahanzi batandukanye barimo Urban Boys, Charly & Nina, n’abandi uyu mwaka usize ari umugabo wa Uwase Faith kuva ku wa 15 Ukuboza 2022 ubwo basezeranaga kubana akaramata imbere y’amategeko ya Repubulika y’u Rwanda.

Rwema na Uwase bakoze ubukwe ku wa 17 Ukuboza 2022 nyuma y’imyaka 3 bari bamaze bakundana.

Kuva mu 2014 Rwema Dennis yari umwe mu bakozi ba Super Level aho yari ashinzwe kwita ku nyungu za Urban Boyz. Mu 2017 yiyunze kuri Muyoboke Alex bafatanya gukurikiranira hafi ibikorwa by’itsinda rya muzika rya Charly na Nina nyuma baza gutandukana. Rwema yanabaye umuyobozi wa The Mane Music.

Lionel Sentore na Munezero Aline (Bijoux)

Munezero Aline uzwi nka Bijoux muri sinema ku wa 8 Mutarama 2022 yarushinze n’umuhanzi Lionel Sentore usanzwe utuye ku Mugabane w’u Burayi.

Nyuma y’iminsi mike barushinze havuzwe umwuka utari mwiza muri uru rugo rushya bivugwa ko badacana uwaka gusa aba bombi ntacyo bigeze bashaka gutangaza ku byavuzwe kugeza n’ubu.

Miss Mutesi Lea

Mutesi Lea Byusa wamenyekanye ubwo yari yitabiriye Miss Rwanda 2021, uyu mwaka wa 2022 usize ari umugore wa Peter Nasasira bari bamaze igihe bakundana.

Ubukwe bw’aba bombi bwabaye kuwa 2 Ukwakira 2022 bwitabirwa na bamwe mu bakobwa bitabiriye irushanwa rya Miss Rwanda 2021.

Umuhanzi Charles Kagame

Umuririmbyi Charles Kagame wamamaye mu ndirimbo zo kuramya no guhimbaza Imana ni umwe mu byamamare byarushinze muri uyu mwaka wa 2022.

Uyu mugabo yakoreye ubukwe mu gihugu cya Kenya asezerana na Umuhoza Immaculee mu birori byabereye mujyi wa Nairobi tariki 04 Kamena 2022.

Umurambyi Bosco Nshuti

Uyu muramyi ukora ivugabutumwa rinyuze mu ndirimbo zo kuramya no guhimbaza Imana mu Itorero ADEPR, Umudugudu wa Kumukenke muri Paruwasi Gasave, na we ari mu b’ibyamamare barangije umwaka bafite abagore.

Uyu mwaka usize Bosco Nshuti ari umugabo wa Vanessa Tumushime , umukunzi we yerekanye bwa mbere mu gitaramo yise ‘Unconditional Love Live Worship Concert’.

Aba bombi bakoze ubukwe ku wa 19 Ugushyingo 2022 nyuma y’imyaka 3 bari bamaze bakundana.

Umunyamideri Isimbi Vestine

Isimbi Vestine wamamaye mu ruganda rw’imideli, mu ntangiro z’uyu mwaka yarushinze na Shaul Hatzir ukomoka muri Israel ku wa 20 Gashyantare 2022 muri Kigali Convention Centre.

Isimbi usibye kwitabira ibirori bitandukanye by’imideli ku rwego mpuzamahanga, yanagaragaye mu ndirimbo z’abahanzi batandukanye zirimo "Closer" yahuriyemo na Meddy, Yvan Buravan na Uncle Austin ndetse n’izindi.

Pamella Loana Uwase

Pamella Loana Uwase ubarizwa mu itsinda rya Mackenzies ribamo Miss Naomie n’abavandimwe be, uyu mwaka wa 2022 usize ari umugore wa Martin Carlos Mwizerwa.

Aba bombi bakoze ubukwe ku wa 15 Ukuboza 2022 nyuma y’ukwezi kumwe Mwizerwa yambitse impeta Uwase amusaba ko yazamubera umugore.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .