Iki gitaramo cyo kwizihiza imyaka 20 King James amaze mu muziki cyabereye mu Mujyi wa Bremen mu Budage mu mpera z’iki cyumweru gishize. Cyari kigamije guhuza abakunzi b’uyu muhanzi batuye mu mijyi inyuranye y’iki gihugu.

King James yageze ku rubyiniro yakirizwa amashyi menshi n’abari bateraniye muri icyo gitaramo, maze atangira kuririmba zimwe mu ndirimbo ze zakunzwe cyane mu bihe bitandukanye.

Yibanze ku ndirimbo zakunzwe kuva mu myaka ye ya mbere mu muziki kugeza ku ndirimbo ze za vuba.

Abari bitabiriye iki gitaramo na bo ntibamutengushye, kuko batangiye kuririmbana na we indirimbo ku yindi, bakanyuzamo bakabyinana na we kugeza ubwo yasozaga igitaramo.

Iki gitaramo King James yagikoreye mu Budage nyuma y’icyo yakoreye mu Bubiligi ku wa 22 Kanama 2026. Yari akubutse mu Rwanda, aho yakoreye ibitaramo bibiri byo kwizihiza imyaka 20 amaze mu muziki, byabaye ku wa 1 no ku wa 2 Kanama 2026.

Nyuma yo kuva i Burayi, biteganyijwe ko King James azahita atangira urugendo rwo kwitegura ibitaramo azakorera muri Leta Zunze Ubumwe za Amerika ndetse
na Canada mu Ugushyingo no mu Ukuboza 2026.

Abakunzi ba King James batangiye kwinjira ahabereye iki gitaramo hakiri kare

Abinjiraga muri iki gitaramo babanje gususurutswa n'abahanga mu kuvanga imiziki

King James ntabwo yigeze atenguha abakunzi be kuko yahageze hakiri kare

King James yaririmbaga afite itsinda rimufasha ku rubyiniro

King James yaririmbiye abakunzi be nyinshi mu ndirimbo ze zakunzwe

King James yarinze ava ku rubyiniro abakunzi be batabyifuza

Abakunzi b'umuziki bari benshi muri iki gitaramo

Amafoto: Tarama