Ibi bihembo bitangwa ku bufatanye bwa ’Future Novelty Company’, ’Vision Jeunesse Nouvelle’ n’Akarere ka Rubavu.

Ku nshuro ya kabiri byitezwe ko ibi bihembo bizatangwa tariki 30 Gicurasi 2026, muri Kivu Intare Arena.

Ni ibihembo bigamije guteza imbere impano ziganjemo iz’urubyiruko mu muziki n’imyidagaduro muri rusange, gushakisha no gufasha impano z’abakiri bato kumenyekana.

Ibi ni bimwe mu byagarutsweho mu kiganiro abategura ibi bihembo bagiranye n’itanagazamakuru, ku wa 25 Mata 2026.

Abatanga ibi bihembo bagaragaje ko mu cyiciro cya mbere cyabaye umwaka ushize, abagera kuri 572 bahatanye, barimo urubyiruko 500 rw’abanyempano bahatanye hagahembwa 12, n’abahanzi 72 babigize umwuga nabo bahatanye hagahembwa 12.

Umuyobozi mukuru wa Vision Jeneusse Nouvelle, Frere Ringuyeneza Vital yagaragaje ko ibyo bifuzaga ubwo bateguraga gutangiza Rubavu Musi Awards & Talent Detection byagezweho.

Ati "Ibyo twifuzaga twabigezeho hejuru ya 80%, impano zirahari mu myidagaduro, si mu bakuru gusa kuko hari n’abakiri bato twazisanganye, gusa abafatanyabikorwa baracyari bake, ariko uyu mwaka abazahiga abanda bazabasha kubona ibahasha itubutse kurusha iy’ubushize.”

Frere Ringuyeneza yagaragaje ko abantu bagera ku 3000 bakurikiranye igikorwa cya Rubavu Music Awards binyuze mu bitabiriye n’abandi bagikurikiye ku buryo bw’ikoranabuhanga.

Umuyobozi wa Future Novelty Company, Fred Ruterana, yagaragaje ko gutanga ibihembo ku bahanzi bakoze kurusha abandi no kuzamura impano ari igikorwa cyari kinyotewe.

Ati "Tugiye gusubira mu mirenge gutoranya impano no gutora abahanzi bakoze neza umwaka ushize, ibintu byo gushaka impano zigaherekezwa no guhemba abahanzi bahize abandi ntibyeherukaga kubera hanze ya Kigali.”

Ruterana avuga ko mu byiciro byahatanye umwaka ushize havuyemo icy’umufotozi mwiza gisimbuzwa icy’indirimbo y’umuhanzi mwiza ukomoka i Rubavu utakihakorera Umuziki.

Guhera tariki 02 Gicurasi 2026, Abanyamakuru bakora imyidagaduro bazatoranya abahanzi beza batanu muri buri cyiciro, ndetse uruhare rwabo ruzaba rugize 50% by’amatora, mu gihe indi 50% izava ku matora yo kuri murandasi.

Umuyobozi w’Akarere ka Rubavu, Mulindwa Prosper yagaragaje ko itangwa ry’ibi bihembo rizafasha abahanzi n’abandi banyempano kwaguka mubyo bakora.

Ati "Gutahura impano n’urugendo dusanzwe dufatanyamo n’abantu batandukanye, ni nayo mpamvu twifuza ko abanyempano baguka bakagera kure, kandi zikabafasha gukorera amafaranga."

Meya Mulindwa yagaragaje ko ‘Rubavu Music Awards & Talent Detection’ izaba ngaruka mwaka.

Ibi bihembo byaherukaga gutangwa ku wa 24 Gicurasi 2025, bitegurwa na sosiyete yitwa ’Future Novelty Company’ ku bufatanye na Vision Jeunesse Nouvelle’ ndetse n’Akarere ka Rubavu.

Umunyamakuru wa RBA, Fred Ruterana ni umwe mu bari gutegura iki gikorwa

Abanyamakuru bashimiye abitabiriye iki gikorwa kuba bakigize ngarukamwaka

Abategura ibi bihembo bijeje abanyamakuru ko imyiteguro yabo ikomeje kugenda neza