00:00:00 IGIHE NETWORK KN KINYARWANDA EN ENGLISH FR FRANCAIS

Ibihembo bya Kiss Summer Awards bigarukanye impinduka

Yanditswe na Mahoro Vainqueur
Kuya 23 August 2022 saa 11:37
Yasuwe :

Ibihembo bya Kiss Summer Awards biba bitegerejwe n’abakunzi benshi b’umuziki nyarwanda, bigiye kongera gutangwa aho bigarukanye impinduka zitari zisanzwe mu myaka yabanje.

Ibi bihembo bitegurwa na Radiyo ya KISS FM mu rwego rwo gushimira abanyamuziki bashyirwa mu byiciro bitandukanye hagendewe kuko bitwaye buri mwaka.

Iyi radiyo imaze imyaka ine itanga ibi bihembo ku bahanzi, abatunganya indirimbo (producers) bagize uruhare mu gukora indirimbo zayoboye izindi mu gihe cy’impeshyi.

Nk’uko bitangazwa n’Umuyobozi wa KISS FM, John Wilkins, Kiss Summer Awards 2022, yongerewemo ibindi byiciro biva kuri bitanu bijya kuri birindwi biturutse ku busabe bw’abakunzi b’umuziki nyarwanda .

Yagize ati “Abakunzi b’umuziki bakurikiye itangwa ry’ibihembo bya KISS Summer Awards mu myaka itambutse basabye ko twakongera ibyiciro, ariko ibyasabwe na benshi ni bibiri.”

Mu byiciro bishya byiyongereyemo uyu mwaka harimo icy’umuhanzikazi witwaye neza ndetse n’icy’umuhanzi wakoze alubumu nziza.

Indi mpamvu y’ibi byiciro bishya ni ugutera imbaraga abahanzi b’igitsina gore bakiri bake no gushishikariza abahanzi gusohora alubumu kuko ari bumwe mu buryo bwabafasha kwinjiza amafaranga biciye ku mbuga zitandukanye zicuruza umuziki.

Indi mpinduka yabayemo ni uko indirimbo zizahatanira ibi bihembo ari izasohotse nyuma ya KISS Summer Awards 2021, ni ukuvuga hagati ya Nzeri 2021 na Kanama 2022.

John Wilkins akomeza agira ati “Ubu abahanzi ntibagitegereza gusohora indirimbo mu mpeshyi gusa, twahisemo kongera igihe kugira ngo hatagira indirimbo cyangwa umuhanzi udashimirwa kandi mu by’ukuri abikwiriye.”

Iki ni ikibazo benshi bakunze kugaruka bavuga ko bamwe mu bahanzi bakunze gutegereza ko impeshyi igera bakabona gukora indirimbo nshya kugira ngo bakunde binjire muri ibi bihembo ugasanga ikindi gihe ntabwo bari gukora cyane.

Ibyiciro bizahabwa ibihembo muri uyu mwaka ni Best Artist, Best Song, Best New Artist, Best Producer, Best Female Artist, Best Album na Life Time Achievement Award.

Tariki 23 Ukwakira 2021 nibwo bwa mbere ibi bihembo byatangiwe hanze ya Radiyo ya Kiss FM bijyanywa mu nyubako y’imyidagaduro ya BK Arena ikiri Kigali Arena, bihuza ibyamamare by’umwihariko n’abakunzi b’umuziki bahawe rugari bihera ijisho itangwa ry’ibi bihembo.

Ibihembo bya KISS Summer Awards byongewemo ibyiciro bishya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .