Ibanga ry’uburyohe bw’ibitaramo rya Silent Disco bikunzwe n’abanyabirori b’i Kigali

Yanditswe na Muvunyi Arsène
Kuya 19 Kanama 2019 saa 01:18
Yasuwe :
0 0

Niba utuye mu Mujyi wa Kigali, ukaba ukunda umuziki no gusohoka mu bihe by’ijoro, ukaba utarajya mu gitaramo cya Silent Disco, waba utaragera ku byiza abandi bamaze igihe baryoherwa na byo.

Ibitaramo bya Silent Disco bimaze kumenyerwa haba mu mujyi wa Kigali no mu yindi mijyi yunganira Kigali byatangiye kuhagera.

Ku nshuro ya mbere igitaramo nk’iki cyabereye i Kigali mu 2015 kuri The Manor Hotel, kugeza ubu ni bimwe mu bikunzwe n’aho byabereye haba huzuye abakunda kwihizirwa n’umuziki.

Silent Disco ni ibirori biba biyobowe n’abahanga mu kuvanga imiziki ariko bakabikorera ahantu hatumvikana urusaku. Umufana wese witabira ibirori ahabwa headphones/Ecouteurs zikoresha ihuzanzira ritagira umugozi [wireless], ni na zo zimufasha kumva indirimbo hatumvikanye urusaku.

Iyo ugereranyije n’ibindi bitaramo bisanzwe bibera mu tubyiniro n’ahandi hantu hatandukanye ‘Silent Disco’ iritabirwa kurusha ibindi bisanzwe.

DJ Phil Peter umwe mu bakunzwe mu Rwanda yabwiye IGIHE ko ibitaramo bya Silent Disco bikundwa n’abantu benshi bitewe n’uko abakunda umuziki baba bafitemo amahitamo menshi yo kumva imiziki bashaka.

Ati “Mu kabyiniro ibyo umuntu bamushyiriyemo nibyo abyina ariko muri Silent Disco haba hari aba-DJ batatu bacurangira icyarimwe Ecouteur yawe iba ifite imirongo itatu ku buryo uhitamo uwo ushaka kumva, iyo umwe akubihirije umukuraho. Abo batatu ntabwo bagumaho bagenda bahinduranya usanga kirimo nk’aba-DJ 10.”

Ati “Biba biryoshye, ushobora kubona mugenzi wawe mubyina ibintu bitandukanye kandi muri kumwe, ushobora gukuramo ecouteur ukumva ari kuririmba ibintu bitandukanye, nabyo ubwabyo bizana ibyishimo mu bantu.”

Uretse no mu bafana, ibitaramo bya Silent Disco bizana ihangana mu bacuranga ubwabo, aho buri umwe akora iyo bwabaga ngo yigarurire umubare munini w’abumva ibyo ari gucuranga.

Dj Phil Peter ati “Bishobora kuzanamo ihangana ariko ryiza kuko abafana nibo baba bari guhitamo ucuranga neza. Iyo ubonye nta bantu bari kukumva bigutera ipfunwe ukagenda ukiga ukamenya icyo abafana bakunda.”

Ibi bitaramo kandi byuzuzanya na gahunda ya leta y’u Rwanda yo kurwanya urusaku rubangamira abaturage kuko imiziki yumvwa n’ufite ecouteurs wenyine.

Tariki 31 Kanama 2019 i Rubavu ku nkengero z’ikiyaga cya Kivu ahitwa Little Paris hazabera igitaramo cya Silent Disco, aho hazaba hari DJ Phil Peter, DJ Lenzo, DJ Anita, DJ Infinity n’abandi basanzwe bakorera muri aka Karere.

Ibara ryiganje cyane rigaragaza DJ ukunzwe muri Silent Disco
Ibitaramo bya Silent Disco bijyana abantu mu mwuka
DJ Phil Peter ni umwe mu bagezweho muri iyi minsi
Igitaramo cya Silent Disco kigiye kubera i Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza