I Rubavu hatangirijwe irushanwa ryo gushaka abanyempano mu kuririmba

Yanditswe na Mukwaya Olivier
Kuya 21 Ukwakira 2018 saa 06:21
Yasuwe :
0 0

Abahanzi bo mu Karere ka Rubavu bagaragaje impano zabo mu gushaka amahirwe yo kuzatoranywa mu bazitabira ku rwego rw’igihugu no gufashwa gukora indirimbo n’abahanzi bakomeye.

Iri rushanwa ryiswe “CRwa Entertainment Awards” ryatangijwe ku mugoroba wo ku wa 20 Ukwakira 2018.

Igitaramo cyabereye ku Kiyaga cya Kivu i Rubavu cyiswe “Beach Concert”. Abacyitabiriye basusurukijwe n’abahanzi b’ibyamamare mu Rwanda barimo Urban Boyz na MC Tino.

Abahanzi b’i Rubavu ni bo babanje ku rubyiniro kugeza ahagana saa mbili z’ijoro.

Muri aka gace hatoranyijwe abahanzi batandatu bafite impano zidasanzwe mu kuririmba. Iki gikorwa kizazenguruka mu bice byose by’igihugu.

Nshimiyimana Muhamed uzwi nka Nizzo muri Urban Boys yavuze ko babinyujije mu nzu ikora umuziki ya Urban Record, batangiye gukorana n’abahanzi b’i Rubavu.

Yagize ati “Twabibonye mbere ko i Rubavu hari impano za muzika. Twafashe umuhanzi Nsabimana Léonard [Ndandambara] na Pacifica. Dufite gahunda yo gukomeza gushakisha izindi mpano tuzafasha duhereye ku bigaragaje uyu munsi.’’

Ahagana saa sita z’ijoro nibwo MC Tino wayoboye igitaramo yagishyizeho akadomo nyuma yo kuririmba izirimo Biramvuna yishimiwe cyane.

Yanyuzwe n’impano z’abahanzi babiri barimo Umuraperikazi Benni Hunter na El Kennedy, anabemerera kuzakorana indirimbo.

Yagize ati “Mpora mvuga buri gihe ko usanga amarushanwa n’ibitaramo byibanda i Kigali kandi mu ntara hari abana b’abahanga. Hano Rubavu natunguwe ni yo mpamvu ngiye gukorana indirimbo n’abahanzi babiri nabonye hano kandi tuzasohora n’amashusho. Ndasaba abahanzi bagenzi banjye gufasha abo mu ntara kuko twe turi gukura. Hari igihe bazajya bibuka ko haricyo twabafashije.’’

Muhinda Aaron ukuriye Muhizi’s Ltd yateguye ibi bitaramo yavuze ko intego ari ugushakisha impano zizahabwa uburyo bwo gukorana n’abahanzi bakomeye.

Yagize ati “Turi kuzenguruka igihugu dushakisha abanyempano. Tuzabafasha gukorana n’abahanzi bakomeye nka Urban Boyz. Tuzabashakira uko bamenyekana mu gihugu hose bakora ibitaramo. Aba bana tuzabakurikirana kandi ntibizatugora.’’

Abahanzi bazatoranywa mu gihugu hose bazahurizwa muri Kigali ahazabera igitaramo cy’imbaturamugabo giteganyijwe ku wa 1 ukuboza 2018.

Abafana bishimiye gutaramirwa na Urban Boyz
Igitaramo cyabereye hafi y'Ikiyaga cya Kivu
Manzi James [Humble Jizzo] ari mu bagize itsinda Urban Boyz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza