00:00:00 IGIHE NETWORK KN KINYARWANDA EN ENGLISH FR FRANCAIS

Fofo uzwi muri Papa Sava yitabiriye Miss Rwanda

Yanditswe na Akayezu Jean de Dieu, Uwiduhaye Theos
Kuya 12 February 2022 saa 02:28
Yasuwe :

Niyomubyeyi Noëlla uzwi nka Fofo muri filime ya Papa Sava, yitabiriye irushanwa rya Miss Rwanda mu ijonjora ryabereye mu Mujyi wa Kigali.

Uyu mukobwa ari mu 117 bitabiriye ijonjora ryabereye mu Mujyi wa Kigali ku wa Gatandatu tariki 12 Gashyantare 2022.

Ubwo yari ari imbere y’Akanama Nkemurampaka, Niyomubyeyi yavuze ko yitabiriye irushanwa kubera ko yiyumvamo ubushobozi kandi ashaka kuvuganira benshi.

Abajijwe uko umushinga we uteye, yatangaje ko ujyanye n’ubuzima bw’imyororokere. Ateganya kujya aganiriza abakobwa ku bijyanye n’ukwezi kwabo n’ibindi.

Evelyne Umurerwa uri bagize Akanama Nkemurampaka yamuhaye ‘No’ yamubwiye ko akwiriye kuzanoza umushinga we mu gihe yaba atambutse, mu gihe mugenzi we James Munyaneza yamuhaye ‘Yes’ naho Mutesi Jolly akamuha ‘No’ ku bw’impamvu z’uko atanyuzwe n’ibisobanuro uyu mukobwa yatanze.

Niyomubyeyi Noëlla Gentille asanzwe azwi nk’umukobwa w’ikimero gitangaje gikurura abagabo.

Yatangiye gukina filime mu 2016 ubwo yagaragaraga mu yitwa Virunga high school yatambukaga kuri Lemigo TV. Icyo gihe abantu benshi bakomeje kumubwira ko ashoboye kandi azagera kure ni ko gufata iya mbere ajya gukora igeragezwa (Casting) muri filime yitwa “Seburikoko” itambuka kuri Televiziyo y’Igihugu aza no kuritsinda.

Filme y’uruhererekane yitwa “Papa Sava” ni yo yamugize ikimenyabose binamufasha gukurikirwa cyane ku mbuga nkoranyambaga. Kuri Instagram afite abarenga ibihumbi 50 bamukurikira.

Uyu mukobwa ashaka ikamba rya Miss Rwanda 2022
Fofo azwi cyane muri sinema nyarwanda muri filime nka Papa Sava na Seburikoko
Fofo afite umushinga ujyanye n'ubuzima bw'imyororokere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .