00:00:00 IGIHE NETWORK KN KINYARWANDA EN ENGLISH FR FRANCAIS

Filime nshya zagufasha kuryoherwa n’impera z’Ukwakira 2022

Yanditswe na Mahoro Vainqueur
Kuya 29 Ukwakira 2022 saa 12:47
Yasuwe :

Mu gihe ukwezi k’Ukwakira 2022 kubura iminsi mike ngo kurangire, hari byinshi gusize harimo na filime nziza wareba zikagufasha kugusoza umerewe neza, by’umwihariko ku bakunzi ba sinema.

Tugiye kwibanda kuri filime ushobora kubona ku isoko yaba mu nzu zerekana filime ndetse no ku mbuga zerekanirwaho.

Black Adam

Iyi filime igaragaramo imbaraga zidasanzwe, igitekerezo cyayo kikaba cyarakomotse kuri filime yitwa Shazam yo mu 2019, yasohotse ku wa 22 Ukwakira 2022 igaragaramo Dwayne Johnson (The Rock) na Viola Davis.

Ni filime yashowemo asaga miliyoni 200$ z’amadorali ya Amerika ubu imaze kwinjiza miliyoni 156$ z’amadorali y’Amerika.

Iyi filime igaruka ku nkuru y’umwana watanzwemo igitambo yitangira se wamaze imyaka 5000 asinziriye nyuma agarukana imbaraga zidasanzwe.

Mu kwihorera, avuga ko aje gushaka gusa ahura n’abandi barwanyi bakomeye baba bashaka kwigarurira Isi bigatuma ahindura ibitekerezo agahitamo gutabara Isi.

Ticket to Paradise

Iyi ni filime y’urukundo yasohotse ku wa 21 Ukwakira 2022 yashowemo miliyoni 60$ imaze kwinjiza asaga miliyoni 100$ z’amadorali y’Amerika.

Iyi filime ikinamo Julia Roberts na George Clooney, ivuga ku nkuru y’umugore n’umugabo bamaranye imyaka 5 y’urushako , gusa nyuma baza kongera kwihuza bahujwe n’umugambi wo kwitambika umwana wabo wari ugiye gushyingiranwa n’umusore w’umuhinzi wo muri Indonesia.

N’ubwo batsindwa n’uru rugamba biyemeje bisanga bo ubwabo bakundanye kubera ibihe byiza baba bagiranye babeshya umukobwa wabo ko bakibanye neza.

Acapulco

Ku bakunda filime z’uruhererekane muri uku Ukwakira hasohotse igice cya kabiri cya filime Acapulco yashowemo asaga miliyoni 40$ imaze kwinjiza miliyoni 120 $ z’amadorali y’Amerika.

Iyi filime igaruka ku buzima bw’umusore wifuza kubaho mu buzima bwo kwishimisha ku kirwa cya Acapulco ariko atungurwa no gusanga yaribeshye , akajya gukora muri hoteli nabyo akabona bitazatuma agera ku nzozi ze kuko harimo ibizazane bikomeye birenze ibyo yatekerezaga.

Love Is Blind

Muri uku kwezi nanone hasohotse igice cya gatatu cya filime ‘Love is Blind’ yatangiye gusohoka mu 2020 iyobowe n’abarimo Chris Coelen, Ally Simpson na Eric Detwiler.

Iyi filime igaruka ku nkuru y’abasore 15 n’abakobwa 15 baba bifuza abakunzi, bagaca mu mukino aho buri umwe aganira na mugenzi we yifuzaho urukundo ariko bataziranye bakibwirana kugeza aho umwe asabye undi ko yazamubera umugore kuri telephone batarahura.

Babaho gutyo kugeza igihe bemeranyije kuzabana no gutegura ubukwe mu byumweru bine biri imbere nibwo bahura amaso ku maso buri umwe akabona uwo yihebeye kuri telefone.

All Quiet on the Western Front

Iyi filime yasohotse ku wa 28 Ukwakira 2022 yashibutse ku gitabo cyanditswe n’Umudage wavuye mu gisirikare mu gihe cy’intambara y’Isi ya mbere Erich Maria Remarque.

Igaruka ku nkuru y’umusore wabeshye imyaka kugira ngo ajye mu gisirikare akurikiye inshuti ze, uyu musore agera ku rugamba akicuza icyatumye afata uwo mwanzuro nyuma yo kubona ukuri kw’ibibera ku rugamba.

Prey For The Devil

Niba ukunda kureba filime ziteye ubwo ubwoba, iyi filime yasohotse ku wa 28 Ukwakira 2022 iyobowe na Daniel Stamm ni iyawe.

Igaruka ku nkuru y’umukobwa warezwe na Nyina ufite ikibazo cy’ihungabana, gusa uyu mwana w’umukobwa aba afite imbaraga z’amasengesho zidasanzwe ahitamo kuba umubikira akajya asengera abandi bantu batewe n’amadayimoni.

Call Jane

Iyi filime ikinamo Elizabeth Banks yasohotse ku wa 28 Ukwakira 2022 yayobowe na Phyllis Nagy.

Igaruka ku nkuru yo muri Chicago mu 1968 ku mugore wagize ikibazo cy’inda yari atwite bakamubwira ko inda atwite igomba kuvamo kugira ngo baramire ubuzima bwe, gusa inteko ishinga amategeko yanga icyo cyemezo agahitamo kugana itsinda ry’abagore biyemeje gufasha abagore n’abakobwa bafite ibibazo nk’ibi.

Bromates

Iyi filime yasohotse ku wa 07 Ukwakira 2022, yayobowe na Court Crandall , igaragaramo umuraperi Snoop Dogg, Josh Brener n’abandi.

Igaruka ku nkuru y’abasore batandukana n’abakunzi babo bagahitamo kubana nk’inshuti mu nzu imwe kugira ngo bungurane ibitekerezo bagamije komorana ibikomere batewe no kubura abakunzi.

Grimcutty

Iyi filime yasohotse ku wa 10 Ukwakira 2022 yayobowe na John Ross, ikinamo abakinnyi b’ibyamamare barimo Sara Wolfkind na Usman Ally.

Igaruka ku nkuru y’umwana muto wica umubyeyi we amuteye icyuma yamwibeshyeho kubera ubutumwa buteye ubwoba yabonye ku mbuga nkoranyambaga buvuga ko hari ibintu bidasanzwe bitera abantu mu ijoro bikabakoresha ibintu bidasanzwe.

Entergalactic

Iyi filime yasohotse tariki 30 Nzeri 2022 yayobowe na Fletcher Moules , yakozwe ishingiye ku gitekerezo cy’umuraperi Kidi Cudi, yakinnyemo ibyamamare birimo Jessica Williams , Kid Cudi, Ty Dolla Sign , Jaden Smith na Macaulay Culkin.

Igaruka ku nkuru y’umusore urangiza kwiga icyiciro cya kabiri cya kaminuza mu gihe acyishimira urwego agezemo akundana n’umuturanyi we gusa inshuti ze zimubwira ko agiye mu rukundo yihuse kandi atari ibintu byo gukinisha, bigera aho abagisha inama muri uru rugendo aba yinjiyemo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .