Emma Claudine na Michèle Iradukunda mu Kanama Nkemurampaka ka Miss Rwanda 2021

Yanditswe na Nsengiyumva Emmy
Kuya 15 Gashyantare 2021 saa 11:54
Yasuwe :
0 0

Abanyamakuru Emma Claudine na Michèle Iradukunda ukorera Ikigo cy’Igihugu cy’Itangazamakuru (RBA) bari mu Kanama Nkemurampaka ka Miss Rwanda, biyongera kuri Pamela Mudakikwa, Mariya Yohana na Mutesi Jolly.

Akanama nkemurampaka ka Miss Rwanda 2021, katangajwe mu gihe amashusho y’abakobwa bari guhatanira guhagararira intara zitandukanye ari gutambutswa kuri televiziyo mu ijonjora ry’ibanze riri gukorwa hifashishijwe ikoranabuhanga.

Emma Claudine, umunyamakuru wamenyekanye cyane kuri Radio Salus, amaze imyaka irenga 15 yigisha urubyiruko ubuzima bw’imyororokere binyuze mu kiganiro yise ‘Imenye nawe’.

Undi winjiye mu kanama nkemurampaka atari amenyerewe cyane, ni Pamela Mudakikwa, uyu azwi cyane mu bakoresha imbuga nkoranyambaga akaba anaharanira uburenganzira bw’umwari n’umutegarugori.

Aba biyongeraho Michèle Iradukunda ukorera RBA amaze imyaka umunani akora umwuga w’itangazamakuru. Uyu mubyeyi ari mu bigeze guhatanira iri kamba kuko mu 2009 yitabiriye Miss Rwanda ahagarariye Intara y’Amajyepfo nubwo atagize amahirwe yo kuryegukana.

Iradukunda yaherukaga mu kanama nkemurampaka ka Miss Rwanda mu 2019.

Mu bandi bagize akanama nkemurampaka harimo Mariya Yohana, umubyeyi ukunze kwiyambazwa muri Miss Rwanda.

Mariya Yohana asanzwe ari umuhanzikazi ukomeye mu muziki w’u Rwanda akaba umunyabigwi wabaye icyitegererezo ku batari bake.

Aba bose bazaba bayobowe na Miss Jolly Mutesi uzaba akuriye aka kanama nkemurampaka ka Miss Rwanda.

Uyu mukobwa uretse kuba yaregukanye ikamba rya Miss Rwanda 2016, kuva mu 2018 yinjiye mu kanama nkemurampaka k’iri rushanwa.

Aka kanama nkemurampaka kazagira uruhare runini mu gutanga amanota yo gushakisha abakobwa bazahagararira buri ntara mu irushanwa rya Miss Rwanda 2021.

Irushanwa rirarimbanyije

Ibikorwa by’amajonjora y’ibanze byatangiye tariki 9 Gashyantare bizarangira ku wa 18 Gashyantare 2021.

Kuva ku wa 19 Gashyantare, abategura bazatangira kwerekana abahagarariye intara zitandukanye bazaba batsinze amajonjora y’ibanze.

Gutora kuri murandasi na SMS bizatangira ku wa 22 Gashyantare kugira ngo hamenyekane abazaba batsindiye imyanya ya mbere 20.

Abahatana bazinjira mu muhezo ku wa 3 Werurwe mu gihe ‘pre-selection’ yo gutoranya izaba ku wa 6 Werurwe.

Abahatana 20 ba mbere bazagera mu cyiciro cya nyuma, bazajya mu mwiherero uzatangira ku wa 6 Werurwe kugeza ku wa 20 Werurwe, ubwo hazaba ari ku munsi wa nyuma w’irushanwa.

Gusoza irushanwa bizabera muri Kigali Arena mu birori bizatambuka kuri Televiziyo y’u Rwanda.

Mariya Yohana, umuhanzikazi ukunze kwiyambazwa mu Kanama Nkemurampaka ka Miss Rwanda yongeye kugaragara ku rutonde rw'abazatanga amanota
Umunyamakuru wa RBA, Michèle Iradukunda, witabajwe mu Kanama Nkemurampaka ka Miss Rwanda 2019, yongeye gushyirwa mu bazatanga amanota uyu mwaka
Emma Claudine, umunyamakuru wamenyekanye cyane kuri Radio Salus yinjijwe mu Kanama Nkemurampaka ka Miss Rwanda
Pamela Mudakikwa uzwi cyane mu bakoresha imbuga nkoranyambaga yinjijwe mu Kanama Nkemurampaka ka Miss Rwanda 2021
Miss Jolly Mutesi ni we uhagarariye Akanama Nkemurampaka ka Miss Rwanda 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .