Edrisah Musuuza ( Eddy Kenzo) wateguye iri serukiramuco yakiranye yombi uyu muhanzi baheruka guhurira mu ndirimbo bise ‘Nyoola’ yasohotse mu mezi atandatu ashize.

Mu butumwa buha ikaze Bruce Melodie , Eddy Kenzo yanditse agira ati “Urakaza neza muvandimwe wanjye, Uganda ni mu rugo hakabiri, reka ejo dukore amateka.”

Bruce Melodie akigera ku kibuga cy’indege yakiriwe n’abari mu ikipe yoherejwe na Eddy Kenzo ubona ko bari bishimiye kumwakira.

Eddy Kenzo Festival ni iserukiramuco rizaba ku wa 12 Ugushyingo 2022 ryateguwe n’umuhanzi Eddy Kenzo akaba na nyiri sosiyete ya Big Talent ifasha abahanzi.

Ryateguwe mu rwego rwo kwizihiza ibigwi n’amateka by’uyu muhanzi wabimburiye abandi bari mu karere ka Afurika y’Iburasirazuba mu begukanye igihembo cya BET Awards yabonye mu 2015 ndetse na Nickelodeon Kids’ Choice Award yatwaye mu 2018.

Iri serukiramuco rizabera kuri Kololo Airstrip biteganyijwe ko Bruce Melodie azarihuriramo n’abahanzi batandukanye barimo Harmonize, Spice Diana, Mampi, Tribe Mark n’abandi.

Iri serukiramuco ryari kuzaba tariki 28 Werurwe 2020 ariko rihagarara igitaragaranya kubera icyorezo cya COVID-19.

Bruce Melodie ni umwe mu bahanzi bo mu Rwanda bamaze kwagura izina ryabo mu Karere

Bruce Melodie ategerejwe mu gitaramo cya Eddy Kenzo wamwiyambaje mu rwego rwo gususurutsa abakunzi be

Bruce Melodie yageze i Kampala