00:00:00 IGIHE NETWORK KN KINYARWANDA EN ENGLISH FR FRANCAIS

Dr Claude, Nel Ngabo, Kivumbi na Element bakoze mu nganzo… indirimbo nshya za Weekend

Yanditswe na Uwiduhaye Theos
Kuya 8 June 2024 saa 02:05
Yasuwe :

Abakurikira IGIHE umunsi ku wundi bamaze kubimenyera ko mu mpera z’icyumweru, tubagezaho indirimbo nshya zagiye hanze yaba iz’abahanzi bagezweho mu Rwanda n’abandi bakizamuka baririmba umuziki usanzwe n’uwo guhimbaza Imana.

Uretse mu Rwanda twambuka n’imbibi z’igihugu tukajya hanze yacyo muri Afurika no hakurya y’inyanja. Indirimbo dushyira kuri uru rutonde ni izo tuba twabashije kubona cyane twifashishije urubuga rwa Youtube.

‘Selfish’ - Kivumbi ft. Mike Kayihura

Ni indirimbo nshya yahuriyemo Mike Kayihura na Kivumbi. Iyi ndirimbo iri kuri album nshya ya Kivumbi yise ‘Ganza,’ iyi ikazaba ikurikira iya mbere yise ‘DID’ yari iriho indirimbo nka ’Nakumena amaso’ n’izindi nyinshi, iyi ikaba yarasohotse mu 2021

Iyi album nshya ya Kivumbi igizwe n’indirimbo 10, iyi ndirimbo ikaba ari yo ya mbere yashyize hanze kuva yatangira gukorana na sosiyete nshya ‘Deealoh Entertainment’ iri kumufasha mu bijyanye n’umuziki.

‘Milele’ - Element Eleéeh

Ni indirimbo nshya y’umuhanzi Element Eleéeh. Iyi ndirimbo y’urukundo uyu muhanzi yaririmbye ataka umukobwa avuga ko azamuba hafi ubuziraherezo.

‘Contre Succès (remix)’ - Dr Claude

Nyuma y’iminsi mike Dr. Claude agarutse mu Rwanda, aho yari amaze imyaka icyenda atagera, uyu muhanzi yavuze ko yatunguwe n’iterambere ryarwo cyane, agahitamo gusubiramo indirimbo yise ‘‘Contre Succès’ avuga ibigwi bya Perezida Paul Kagame.

Mu kiganiro yagiranye na IGIHE nyuma yo gushyira hanze iyi ndirimbo, Dr Claude yavuze ko ari igitekerezo yagize nyuma yo kongera gutaha mu Rwanda akitegereza imiyoborere n’iterambere ryarwo, inganzo igahita imuzamukamo ityo.

‘Nywe PK24’ - Nel Ngabo

Nel Ngabo yashyize hanze indirimbo ‘Nywe’ yasubiyemo avuga ibigwi bya Perezida Paul Kagame, aho ashimira ibikorwa by’indashyikirwa yafashije u Rwanda mu kwiyubaka mu myaka 30 ishize.

‘Terrific -Stromae’ - Kigali International Choir performance (this is not a lesson)

Ni indirimbo nshya iri mu ruhererekane rw’izo Choeur International et Ensemble Instrumental de Kigali, imaze iminsi ishyira hanze yasubiyemo z’abahanzi batandukanye bakomeye mu Rwanda. Iyi yo ni iya Stromae yise ‘Formidable’ yamamaye mu myaka yashize.

‘Gasununu’ - Hollix

Ni indirimbo nshya y’umuhanzi Hollix yashyize hanze asubiza iyo Zeo Trap aheruka gushyira hanze yibasira mugenzi we Ish Kevin. Muri iyi ndirimbo uyu muhanzi yibasira mugenzi we agaragaza ko afite ikinyabupfura gike kubera indirimbo yakoze atuka ku babyeyi Ish Kevin.

‘Don’t Be Silly’ - ET Ndahigwa

Ni indirimbo nshya y’umuhanzi ET Ndahigwa uri mu bahanzi bakizamuka mu mu muziki Nyarwanda. Ndahigwa yamamaye mu ndirimbo zirimo ‘Kantona’ yahuriyemo na DJ Pyfo ndetse na Kenny K-Shot.

‘Amasomo’ - Phil Emon Ft Uncle Austin

Ni indirimbo nshya y’umuhanzi Phil Emon uri mu bahanzi bari kuzamuka mu muziki muri iki gihe. Iyi ndirimbo yahuriyemo na Uncle Austin baba baririmba bagaragaza ko gukunda ari byiza ariko bibabaza.

‘Wahinduye Ibihe’ - Chryso Ndasigwa

Ni indirimbo nshya y’umuhanzi Chryso Ndasigwa uri mu bahanzi baririmba indirimbo zo kuramya no guhimbaza Imana. Amashusho yayo yagiye hanze yafatiwe mu gitaramo aheruka gukorera muri BK Arena.

‘Nyigisha (Choir Version) Maranatha family Choir ft Butera Knowless

Nyuma yaho Maranatha Family Choir yinjiye mu mikoranire n’inzu itunganya umuziki ya KINA Music, bagashyira umukono ku masezerano y’imyaka itatu bagiye kumara bakorana bashyize hanze indirimbo bakoranye na Butera Knowless.

Mu kiganiro cyihariye na Selemani Munyazikwiye uhagarariye Maranatha family Choir, aheruka kubwira IGIHE ko bakunze ubutumwa buri muri Nyigisha bagahitamo kuyisubiramo. Ati ”Ubutumwa buri muri Nyigisha buhuye n’ibyo turirimba, kandi buriya iriya ndirimbo izaba ikoze mu buryo bwa chorale’choir version’.”

‘Nyemerera’ - Prosper Nkomezi ft Gentil Misigaro

Ni indirimbo nshya ya Prosper Nkomezi na Gentil Misigaro. Muri iyi ndirimbo aba bahanzi baba basaba Imana kubaba hafi ndetse no kuyigurira n’umutima wabo wose.

‘Ntahinduka’ - Bonke Bihozagara

Umuramyi Bonke Bihozagara yashyize hanze indirimbo yise "Ntahinduka". Yavuze ko iyi ndirimbo yayitegereje, atekereje uko Imana iba hafi abantu mu buzima bwa buri munsi.

Bonke Surugo Bihozagara mu muziki ukoresha amazina ya Bonke Bihozagara, ni imfura mu muryango ugizwe n’abana bane akaba afitanye isano ya bugufi n’umuryango w’aba Zebedayo barimo umuramyi rurangiranwa Diane Nyirashimwe wamamaye muri Healing Worship team kuri ubu utuye muri Leta Zunze Ubumwe za Amerika.

‘Harya Ngo Urankunda?’ - Yvanny Mpano ft. Edin Hodari

Ni indirimbo nshya y’abahanzi Yvanny Mpano yahuriyemo na Edin Hodari uri mu bahanzi bakizamuka. Iyi ndirimbo aba bahanzi baba bagaragaza ukuntu abakobwa bamwe babeshya abahungu bakabatendeka ari benshi.

‘Ntibazi’ - Arnaud Robert Nganji

"Ntibazi" ivuga ku nkuru y’Imana ihamagara umuntu wayivuyeho mu ibanga ntawe ubizi. Yavuze ko yifuza ko ubutumwa buri muri iyi ndirimbo bwagera kuri benshi bari barasubiye inyuma bagahindukirira Imana.

Arnaud Robert Nganji ni umugabo w’imyaka 35. Ni umuvugabutumwa akaba akorera umurimo w’Imana muri Canada. Yatangiye kwandika imivugo mu 2002 aza gutangira kuririmba mu 2004.

Indirimbo zo hanze…

Tems yashyize hanze album nshya

Umuhanzikazi w’Umunya-Nigeria Temilade Openiyi wamamaye nka Tems yashyize hanze album nshya yise ‘Born in the Wild’. Iyi album iriho indirimbo Tems yahuriyemo n’abahanzi barimo Asake bakoranye iyo bise “Get It Right”, J. Cole bakoranye “Free Fall” n’izindi zitandukanye.

Iyi album ya mbere ya Tems iriho indirimbo 18. Yaje ikurikira EP uyu mukobwa yakoze zirimo ‘For Broken Ears’ yagiye hanze mu 2020 na ‘If Orange Was a Place’ yo mu 2021.

‘Hmmm’ - Chris Brown

‘The Boy Is Mine’ - Ariana Grande

‘Last Heartbreak Song’ Ayra Starr ft. Giveon

‘Everyday’ - Fireboy DML

‘Savannah’ - Yung Bleu

‘Ma Cherie (Remix)’ - Bien & Fally Ipupa

‘Nitambe’ - Dayoo x Rayvanny


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .