Ibi DJ Spinny yabigarutseho nyuma y’Umuganda yakoreye i Gahanga mu Karere ka Kicukiro, ari naho ateganya gukorera ibirori bizwi nka ‘Spinny&Friends’.

DJ Spinny yabwiye IGIHE ko atewe ishema no kuba Umunyarwanda, yongeraho ko ‘Umuganda’ ari umwihariko w’u Rwanda bityo ko atewe ishema n’uko ku nshuro ye ya mbere yawitabiriye.

Ati “Buriya uwababeshya yababwira ko adaterwa ishema n’Umuganda cyangwa ibindi bikorwa u Rwanda rwihariye, iyo uri mu mahanga ukabona inaha bakoze ‘Umuganda’ nawe uba wumva wakabaye uwugiramo uruhare, niyo mpamvu nanjye numvaga ko ngomba gushyiraho akanjye ku iterambere ry’Igihugu cyanjye.”
Nyuma yo gukora Umuganda, DJ Spinny yafashije abatishoboye bo mu Karere ka Kicukiro bihurije mu muryango ‘Joint Action Development Forum’ abagenera inkunga ya miliyoni 3 Frw.

Nyuma y’iki gikorwa, DJ Spinny n’itsinda ryari ryamuherekeje bagiye gusura Urwibutso rwa Jenoside rwa Ntarama, bunamira Abatutsi bahashyinguye.

DJ Spinny ari mu myiteguro y’igitaramo cye ‘Spinny&Friends’ giteganyijwe kubera ku kibuga cya ‘Cricket’ i Gahanga.

Iki gitaramo cya DJ Spinny byitezwe ko kizaba ku wa 18-19 Nyakanga 2026. Yatangaje ko yagitumiyemo Kabza De Small, Umunya-Afurika y’Epfo uri mu bubashywe bikomeye, ndetse n’abandi ba DJ bo mu Rwanda na Uganda.

Ni inshuro ya mbere DJ Spinny akoreye Umuganda mu Rwanda kuko asanzwe atuye muri Uganda

DJ Spinny yakoranye Umuganda n'abaturage bo mu Karere ka Kicukiro

DJ Spinny yafashije abo mu muryango wa ‘Joint Action Development Forum’, abagenera inkunga ya miliyoni 3Frw.

DJ Spinny n’itsinda ryari ryamuherekeje bagiye gusura Urwibutso rwa Jenoside rwa Ntarama, bunamira Abatutsi bahashyinguye