Iki gitaramo cyabaye mu ijoro ryo ku wa 1 Gicurasi 2025 cyahuriranye n’umunsi wahariwe umurimo ukaba uw’ikiruhuko, kimwe mu byatumye cyitabirwa ku rwego rwo hejuru.

Abarenga 1500 bari bakoraniye mu ihema rya Camp Kigali bagiye kwirebera abanyarwenya batandukanye bo muri Gen-Z Comedy bari bongeweho Joshua, Nzovu na Yaka.

Abanyarwenya bakuriye muri Gen-Z Comedy barimo Umushumba, Pirate, Muhinde, Keppa, Dudu n’abandi ni bamwe mu bongeye kugaragaza ko bamaze kugira ubunararibonye mu bijyanye no gusetsa.

MC Kandii na Musa bakunze guhamya ko batuye i Nduba, bakoze agashya ko guseruka muri iki gitaramo bigize abagore ndetse banambaye amakanzu yambarwa n’abagore.

Igice cya mbere cy’iki gitaramo cyaranzwe n’abanyarwenya bakuriye muri Gen-Z Comedy kiza gushyirwaho akadomo n’ikiganiro Jado Castar yahaye urubyiruko.

Uyu mugabo uri mu banyamakuru b’imikino bakunzwe mu Rwanda akaba n’umwe mu batangije B&B FM muri iki kiganiro yagarutse ku rugendo rwe nk’umunyamakuru watangiriye hasi uyu munsi akaba asigaye ari ikimenyabose.

Nyuma y’iki kiganiro hakurikiyeho umuhanzi Victor Rukotana wasogongeje abari muri iki gitaramo nyinshi mu ndirimbo ziri kuri album ye nshya yise ‘Imararungu’.

Hahise hakurikiraho abanyarwenya batandukanye, mbere y’uko Fally Merci uba uyoboye iki gitaramo yakira Diez Dola nawe wasusurukije abitabiriye iki gitaramo.

Ni igitaramo cyashyizweho akadomo na Nzovu na Yaka bari batumiwe nyuma y’icyo baherukaga mu minsi yashize cyo kwizihiza imyaka itatu bimaze bitegurwa.

Ubwitabire bwari hejuru muri iki gitaramo, abenshi bashakaga gutahana amashusho y'urwibutso

Kepa Nyiridushya ukunze guhamya ko aba ahagarariye Nyaruguru aho avuka ni umwe mu bashimishije abitabiriye igitaramo cya Gen-Z Comedy

Umunyarwenya Dudu imbere y'abakunzi ba Gen-Z Comedy yakuriyemo

Nkirigito Clement yatanze ibyishimo ku bakunzi b'iki gitaramo

Rumi umunyarwenya wazamukiye muri Gen-Z Comedy ahora ari uwo kwitegwa muri ibi bitaramo

Umushumba nawe wakurije izina rye muri ibi bitaramo, yishimiwe bikomeye

Abanyarwenya Seth na Fred Rufendeke batunguranye muri iki gitaramo

Pirate ni umwe mu banyarwenya bamaze gukuriza amazina muri Gen-Z Comedy nawe utajya utenguha abakunzi be

Joshua ni umwe mu banyarwenya b'amazina manini bari batumiwe muri iki gitaramo

MC Kandii na Musa baserutse mu myenda y'abagore

MC Kandii na Musa, impanga zivuga ko zituruka i Nduba ziri mu basekeje bikomeye abitabiriye iki gitaramo

Jado Castar ni we wari umutumirwa w'umunsi muri iki gitaramo

Victor Rukotana yasogongeje abitabiriye iki gitaramo kuri album ye nshya

Diez Dola yishimiwe bikomeye n'urubyiruko rwari rwitabiriye iki gitaramo

Nzovu na Yaka bari bongeye gutumirwa muri iki gitaramo

Nzovu yageze aho yiyicarira hasi ararambya