00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye kuri Simbi, umukobwa winjiye mu byo gutunganya amashusho y’indirimbo

Yanditswe na Uwiduhaye Theos
Kuya 22 April 2022 saa 10:28
Yasuwe :

Urebye indirimbo nke yashyizeho umutima n’ibiganza bye, wahita wemera ko ahazaza ha Simbi Nailla ari heza kandi agiye guhindura byinshi mu ruganda rw’abatunganya amashusho y’indirimbo rwari rwarihariwe n’igitsinagabo gusa.

Abazi amashusho y’indirimbo yitwa “Puculi” ya Okkama bahita babyumva vuba cyane ko ari we wagize igitekerezo cy’uko igomba gukorwa mu buryo bw’amashusho kuva ku munota wa mbere kugeza irangira.

Ntagiye kure kandi uramutse wararebye amashusho y’indirimbo nka “Atansiyo” na “Helena” za Platini P cyangwa uzi “Low Key” ya Buravan, “Pull Up’’ ya Toxxyk, Kivumbi na Angel Umutoni na “Kk 509 St” ya Andy Bumuntu nta kabuza wahita ubona ko hari uburyohe bwongewemo mu mashusho butandukanye n’ubw’izindi wagiye ubona.

Aha naho Simbi Nailla w’imyaka 21 y’amavuko yagiye agira uruhare mu gutunganywa kw’amashusho[editing] y’izi ndirimbo ariko akenshi atari we wazitangiye kuko inyinshi zabaga zakozwe na Cedric Dric cyangwa Big Team ahubwo we akagenda agira utwo yongeramo kubera ko yari akiri umutangizi mu mwuga wo gutunganya indirimbo mu buryo bw’amashusho.

Igitangaje ni uko Simbi yize amashanyarazi mu mashuri yisumbuye ku buryo nta hantu wavuga ko yahuriraga cyane na Camera keretse iwabo mu rugo nabwo mu byumweru bike yabaga afite mu biruhuko.

Uyu mukobwa yavukiye mu Karere ka Nyarugenge. Avuka mu muryango w’abana bane, abakobwa batatu n’umuhungu umwe ari we Cedric Dric na we usanzwe atunganya amashusho y’indirimbo z’abahanzi batandukanye mu Rwanda.

Iyo uganira na Simbi akubwira ko nubwo atigeza abasha kwiga ibintu bifite aho bihuriye na camera yagize amahirwe yo kuba afite musaza we utunganya amashusho akaba ari we we agenda yigiraho.

Ati “Njye ukuntu byaje nkiri mu mashuri yisumbuye musaza wanjye yajyaga gufata amashusho y’indirimbo cyangwa ayandi yagera mu rugo akansaba ko namufasha kuyakorera ‘editing’ bigenda biza gutyo. Ndangije amashuri yisumbuye natangiye kubikora iminsi yose guhera ku wa Mbere kugeza ku wa Gatanu. Nyuma nibwo natangiye kujya mu byo kuyobora ifatwa ry’amashusho y’indirimbo.”

Mu 2020 nibwo uyu mukobwa yinjiye bya nyabyo mu gutunganya amashusho, avuga ko bitamugoye kuko n’ubundi yari asanzwe yarize amasomo afatwa nk’ay’abahungu.

Ati “N’ubundi nahereye mu bintu by’abasore. Ntabwo nigeze mvuga ko ntabikora. N’ubundi nigaga amashanyarazi nkabwira abantu ko nurira amapoto bikabatangaza. Guhindura umwuga ntabwo byangoye.”

Yavuze ko inshuti ze nyinshi zitangira kumenya ko asigaye atunganya amashusho yiganjemo ay’indirimbo zaratunguwe cyane izindi zishimira indi ntambwe yari yamaze gutangira gutera.

Inzozi za Simbi zitangiye kuba impamo!

Mu kiganiro yagiranye na IGIHE, yavuze ko yatangiye gutunganya indirimbo abona ari ibintu bigoranye ariko yemeza ko ubu inzozi yari afite agitangira zatangiye kuba impamo.

Ati “Byari inzozi zitangiye kuba impamo. Narabikunze ntabwo numvaga ko hari ikintu nakora abantu bakakireba bakanagikunda, rero abantu banyandikira babikunze bavuga ko bakwishimira kubona abandi bakobwa bari mu kazi nk’aka.”

“Puculi” nk’indirimbo yakozwe hagendewe ku bitekerezo bye 100%, avuga ko yari asanzwe yumva amajwi y’indirimbo agahita agira mu mutwe ibigomba kujyamo ariko akumva kubishyira mu ngiro kuri we ari ihurizo.

Ati “Kujya mu kuyobora amashusho y’indirimbo nari mbifite mu mutwe. Nkumva indirimbo nkahita ntekereza uko amashusho yayo yaba ameze. Abahanzi bampaga indirimbo nkitinza kubera ubwoba. Mu minsi yashize nibwo Okkama noneho yampaye indirimbo nditinyuka ndayikora mbona abantu barabikunze cyane.”

Yavuze ko Okkama bahujwe na n’umuvandimwe we biganye mu ishuri ry’umuziki riri i Muhanga.

Uyu mukobwa nyuma yo gukora amashusho ya Puculi ya Okkama abandi bahanzi batangiye kumuhamagara bashaka ko bakorana.

Uyu mukobwa mu myaka itanu iri imbere yifuza kuzaba afite filime ye yakoze kandi abandi bakobwa barinjiye mu mwuga nk’uwe bafatanya na we kuyobora ifatwa ry’amashusho y’indirimbo.

Simbi amaze imyaka ibiri mu mwuga wo gutunganya amashusho y'indirimbo
Simbi ni umwe mu bakobwa bahanzwe amaso mu byo gutunganya amashusho y'indirimbo
Simbi afite imyaka 21 y'amavuko yemeza ko mu myaka itanu iri imbere azaba amaze gutera intambwe mu mwuga wo gutunganya amashusho y'indirimbo

Reba zimwe mu ndirimbo yakozeho


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .