00:00:00 IGIHE NETWORK KN KINYARWANDA EN ENGLISH FR FRANCAIS

Bwiza, Tonzi, Nirere Shanel na Bill Ruzima mu bakoze mu nganzo…Indirimbo nshya za Weekend

Yanditswe na Uwiduhaye Theos
Kuya 25 May 2024 saa 12:38
Yasuwe :

Abakurikira IGIHE umunsi ku wundi bamaze kubimenyera ko mu mpera z’icyumweru, tubagezaho indirimbo nshya zagiye hanze, yaba iz’abahanzi bagezweho mu Rwanda n’abandi bakizamuka baririmba umuziki usanzwe n’uwo guhimbaza Imana.

Uretse mu Rwanda twambuka n’imbibi z’igihugu tukajya hanze yacyo yaba muri Afurika no hakurya y’inyanja. Indirimbo dushyira kuri uru rutonde ni izo tuba twabashije kubona cyane twifashishije urubuga rwa Youtube.

“Uzaze’’ - Nirere Shanel

Ni indirimbo nshya y’umuhanzikazi Nirere Shanel uri mu bahanzi bamaze igihe kinini mu muziki Nyarwanda. Ni indirimbo uyu muhanzikazi aba atembera ibice bigize Rusizi agaragaza ukuntu ari kamwe mu duce tubamo ibyiza nyaburanga bikurura benshi.

Ishene ya Bill Ruzima na Bushali

Bill Ruzima umaze imyaka itari mike yimukiye mu Budage aho yagiye kwiga, yasohoye indirimbo ‘Ishene’ yakoranye na Bushali.

Ni indirimbo bivugwa ko aba bahanzi bateganya gukorera amashusho yayo i Burayi cyane ko na Bushali ari ho ari kubarizwa muri iyi minsi mu bitaramo bizenguruka ibice bitandukanye.

“Anzi mu izina’’ - Tonzi Ft. Liliane Kabaganza

‘Anzi mu izina’ ni indirimbo ya Tonzi yahuriyemo na Liliane Kabaganza. Aba bahanzi muri iyi ndirimbo baba bavuga ko Imana ibazi kandi ibazirikana umunsi ku wundi bityo bakwiriye guhora babyishimira. Uyu muhanzi yashyize hanze iyi ndirimbo nyuma yaho mu minsi ishize yashyize hanze album yise ‘Respect’ yari iriho indirimbo 15.

Kwimuka- Elsa Cluz

Umuhanzi Muhayimana Elisa Claude [Elsa Cruz] wamamariye cyane muri Korali Yesu Araje yo mu Itorero ry’Abadiventisiti b’Umunsi wa Karindwi yasohoye indirimbo yise “Kwimuka”.

Iyi ndirimbo yatunganyijwe mu buryo bw’amajwi na Ishimwe Bass mu gihe amashusho yayo yafashwe na Musinga.

Kwimuka ni indirimbo ifite iminota 6 n’amasegonda icyenda, yubakiye ku buhanuzi bubwira abantu ko abubashye Imana na bo izabagirira neza.

Elsa Cruz yabwiye IGIHE ko yanditse iyi ndirimbo ashingiye ku butumwa yahawe nyuma yo kubona abantu bihana bagendeye ku byo kamere zabo zirarikiye.

Yagize ati “Mbihuza n’uburyo Nowa Imana yamuhaye amabwiriza y’ukuntu inkuge izaba imeze, igiti igomba kubazwamo, metero izaba ifite n’ayandi mabwiriza azagenderaho. Natwe muri iyi minsi turasabwa kwimuka bigereranwa no kwihana nta muntu turebeyeho ahubwo turebeye kuri Kristo, we Rugero rwiza.’’

“Kagame Ntacyo Twamuburanye’’ - Senderi

Senderi International Hit yashyize hanze indirimbo nshya yahimbiye Perezida Kagame kubera ibyo amaze kugeza ku baturarwanda, mu gihe amaze ayobora u Rwanda. Uyu muhanzi yabwiye IGIHE ko mu gihe cyose yabashije kujya mu bice bitandukanye by’igihugu, ari umuhamya wo kuvuga ko ntacyo Abanyarwanda baburanye Perezida Kagame.

Ati “Niyo mpamvu nashyize hanze indirimbo nshya. Ikindi ndasaba abanyamuryango ba FPR Inkotanyi, kubabwira ko Umukandida wacu turi kumwe na we tariki 15 Nyakanga 2024.’’

“Password” - Joni Boy

Umuririmbyi Giraye Jean wamamaye mu muziki ku izina rya T-Rock ariko ubu ukoresha amazina ya Joni Boy cyangwa se Jonib, yashyize hanze Extended Play [EP] nshya. Ni EP yise “Password’’ igizwe n’indirimbo eshanu z’urukundo. Indirimbo ziri kuri iyi EP zibanda ku buzima busanzwe ku bantu bakundana, kuva ku bakirambagizanya, ku bashakanye ndetse n’ inkuru z’agahinda zibaho mu rukundo.

Iyi EP yakozweho n’aba producers benshi bakomeye barimo Richi X5 na Adam Chamwigo babarizwa muri Suède aho uyu musore atuye, anakoranamo nabo muri albel yitwa Kalecha records yamaze gusinyamo akaba ari nayo iri inyuma y’uyu mushinga ndetse n’ibindi myinshi ateganya.

Mu bandi ba Producers bayikozeho harimo Julesce Popiyeeh, Bob pro, Santana Sauce, Hubbie, To The Hit, Muriro na Jiji Seven nawe ubarizwa muri Suede. Amashusho yafashwe na Lars Bergbom ndetse na Carl Olsson babarizwa muri sosiyete yitwa Lucy films.

Reba indirimbo zigize iyi EP

“Ni Danger’’ - Bwiza ft. Danny Vumbi

Nyuma y’igihe kinini Danny Vumbi akoze indirimbo yise “Ni Danger’’ yakunzwe mu buryo bukomeye kuri ubu yayisubiranyemo na Bwiza bahoranye muri KIKAC Music. Muri iyi ndirimbo aba bahanzi bagaruka ku Kinyarwanda gikoreshwa muri iki gihe cyabaye nk’ururimi rw’amahanga. Bishyira mu mwanya w’umusore n’umusaza bahuriye mu misango ariko ntibumvikane kubera Ikinyarwanda cy’ubu kitumvwa n’abakuze.

“Hawayu’’ - Yampano

Ni indirimbo nshya y’umuhanzi Yampano uri mu bahanzi bari kuzamuka neza muri iki gihe. Muri iyi ndirimbo agaruka ku muntu wifashe neza ku mufuka ushaka aho asohokera ngo aruhuke mu mutwe.

“People Talk’’ - Producer Fanta ft. Teco

Ni indirimbo nshya y’umuhanzi akaba na Producer uzwi nka Fanta yahuriyemo na mugenzi we Teco, uri mu bahanzi bakiri kuzamuka muri iki gihe. Muri iyi ndirimbo aba basore baba bagaragaza ko bagerageza gukora cyane batitaye ku magambo y’abantu.

“Numva Ijwi” - Becca

Ni indirimbo y’umuhanzikazi Becca uririmba indirimbo zo guhimbaza Imana. Yabwiye IGIHE ko yayihimbye yishyize mu mwanya w’umuntu usengera ikintu ariko ntasubizwe. Ati "Ni kwa kundi umuntu abona ikintu asengera kidasubizwa agacika intege akumva Imana isa nk’iyamwirengagije.’’

Becca ni umubyeyi w’myaka 35 watangiye umuziki mu 2023. Asanzwe ari umuririmbyi muri Shekina Worship Team muri Restoration Church i Gisenyi. Avuga ko yatangiye kuririmba akiri muto afite imyaka umunani ariko agatangira kwandika indirimbo ku myaka 15. Uretse iyi ndirimbo nshya yise ‘Numva Ijwi’ afite izindi zirimo iyitwa ‘Mugabane Wanjye’.

“Muta bazi Pt.II’’ - MUTHA II

Ni indirimbo nshya y’umuhanzi MUTHA II uri mu baraperi bakizamuka. Uyu musore ubusanzwe avuka mu Gatenga muri Kicukiro. Muri iyi ndirimbo agaragaza ko ibihe bihora bikomeye ariko afite icyizere cy’uko yaba mu buzima busanzwe cyangwa mu muziki igihe kizagera bikagenda neza kurushaho.

“Tona’’ - Khire

Ni indirimbo nshya y’umuhanzi Khire uri mu bahanzi bari kuzamuka. Uyu musore yishyira mu musore uba abwira umukobwa ko namwemerera bagakundana azamukundwakaza bigatinda, bityo akwiriye kumwumva kuko kuri we ameze nk’ifeza.

“Yesu Abwira Abigishwa Be’’ - Baraka Choir ADEPR Nyarugenge

Ni indirimbo nshya ya Baraka Choir yo muri ADEPR Nyarugenge. Iyi ndirimbo nshya irimo ubutumwa bwo kwibutsa Abakirisitu ndetse n’abandi bantu bizera Imana ko gusenga ari yo ntwaro yonyine na Yesu yakoreshaga kugira ngo aneshe Satani. Ibi bikaba bigaragara muri Bibiliya Yera mu Rwandiko Pawulo yandikiye itorero rya Efeso ibice 6-16 kugeza 18.

Baraka Choir yatangiye ikorera umurimo w’Imana mu Itorero rya Nyarugenge Paruwasi Nyarugenge. Yatangiye ari abaririmbyi 12 ubu bakaba barenga 100. Kugeza ubu Chorale baraka ifite Album enye nk’uko Perezida wayo Jean Damascene Muhayimana yabitangarije IGIHE kandi bakaba bakataje mu ivugabutumwa n’ibindi bikorwa birimo gusura abarwayi, abari mu nzu z’imbohe n’abandi bababaye.

Indirimbo zo hanze y’u Rwanda…

“Press Me’’ - Chris Brown

“Tshwala Bam Remix’’ - TitoM, Yuppe and Burna Boy Ft. S.N.E

“BAND4BAND” - CENTRAL CEE FT. LIL BABY

“Olufunmi Reimagined’’ - Id Cabasa, Fireboy DML, Odumodublvck, feat. Boj and Joeboy

“Since ’04’’ - D’Banj

“Showa’’ - Kizz Daniel

“Wayo’’ - Tekno

“Favourite Story’’ - King Promise, Sarkodie, Olivetheboy

“Controlla’’ - FAVE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .