Bazahigana ubutwari ku wa 5 Nyakanga 2026 muri Petit Stade, mu mukino wateguwe na ‘Body Max’. Nubwo buri wese agaragaza icyizere cyo gutsinda, bombi bahamya ko abazawitabira bazataha banyuzwe.

Mu kiganiro cyihariye bagiranye na IGIHE ubwo twabasangaga mu myitozo, buri wese yagaragaje ko yiteguye gutsinda, ndetse amagambo yabo agaragaza ko buri wese yakaniye.

Mama Sava yavuze ko atazita ku kuba Anita Pendo ari we watanze igitekerezo cyo guhurira muri uyu mukino, ahubwo ko icyo yifuza ari ukumutsinda imbere y’abafana be.

Ati “Anita wikururiye icyishi, iki ni cyo gihe cyo gutuma abafana bawe bakwibagirwa burundu. [….] Ndashaka kugukubita ugasezera ku myuga yose wakoraga.”

Anita Pendo na we ntiyatinze gusubiza, agaragaza ko yiteguye kurangiza umukino hakiri kare.

Ati “Ndashaka kuzagukubita n’abafana bawe bakakugaya, kuko uzaba wabatengushye. Mu masegonda make cyane nzaba namaze kugutsinda na ‘knockout’.”

Nubwo ari ubwa mbere aba bagore bagiye gukina umukino w’iteramakofe, bombi bahuriza ku kuba imyitozo bakoze yabatumye bakunda uyu mukino, ndetse bavuga ko bazakomeza kuwukina nibabona andi mahirwe.

Umukino uzabera muri Petit Stade ku wa 5 Nyakanga 2026. Amatike yo kuwitabira ari mu byiciro bitatu birimo aya 2000 Frw, ibihumbi 10 Frw n’ibihumbi 20 Frw.

Uretse umukino uzahuza Anita Pendo na Mama Sava, hateganyijwe n’indi mikino izahuza abakina iteramakofe mu byiciro bitandukanye.

Mbere yo kwishyushya Anita Pendo babanje kureberwa ko yiteguye neza

Mama Sava yiteguye gutsinda Anita Pendo

Mama Sava agiye guhigana ubutwari na Anita Pendo

Anita Pendo nta mwanya wo kwangiza afite buri kanya aba ari kwitoza

Amayeri yose yo gukina uyu mukino bamaze kuyitoza

Mama Sava yereka umutoza ko yamaze gufata neza amayeri yose yamutoje

Kuganira kwa Anita Pendo na Mama Sava bisaba kuba hari ubari hagati

Mama Sava na Anita Pendo bemeza ko bihebeye umukino wo guterana ibipfunsi

Anita Pendo na Mama Sava bemeza ko biteguye umukino bagiye guhuriramo

Amafoto: Mukayiranga Yassipi Esther