Buravan yashyize hanze indirimbo yise ‘Feel It’ (Video)

Yanditswe na Uwiduhaye Theos
Kuya 23 Nyakanga 2019 saa 10:12
Yasuwe :
0 0

Dushime Burabyo Yvan umaze kuba ikirangirire muri muzika nka Yvan Buravan yashyize hanze indirimbo yise ‘Feel It’.

Buravan ni umwe mu bahanzi bamaze kubaka ibigwi mu muziki w’u Rwanda by’umwihariko aherutse kuzamura ibendera ry’igihugu ubwo yegukanaga igihembo cya Prix Découvertes RFI 2018, mu Ugushyingo umwaka ushize.

Mu bakiri bato mu muziki w’u Rwanda ari mu bafite igikundiro kandi amaze kugera kuri byinshi mu gihe cy’imyaka ine mu muziki.

Aririmba indirimbo zizamura ibyiyumviro by’abakundana, zituma yigarurira benshi biganjemo igitsinagore ndetse n’abakunda kumva imitoma no kuyitura abo bakunda.

Kuri ubu yashyize hanze amashusho y’indirimbo nshya iri kuri album yamuritse umwaka ushize yise ‘The Lovelab’, yise ‘Feel It’.

Muri iyi ndirimbo higanjemo amagambo yo kubwira umukobwa kuryoherwa n’urukundo amuhata.

Hari nk’aho agira ati “Ndashaka ko uryoherwa narwo, ndashaka ko uryoherwa n’urukundo rwanjye. Urukundo rwanjye kuri wowe ruri kwikuba, ndagotomera sinsinde, ibi mvuga si isindwe.”

Muri aya mashusho y’iyi ndirimbo Buravan agaragazamo ibyiza by’u Rwanda birimo nka Kigali Convention Centre, Kigali City Tower ndetse n’umukobwa wambaye umwambaro uri mu ishusho y’ibendera ry’igihugu.

Yabwiye IGIHE ko yabikoze ashaka kumenyekanisha aho akomoka, ati “Biriya nabikoze ari nko kuvuga aho nkomoka.”

Uretse izo yahuriyemo n’abandi, ‘Feel It’ ni indirimbo ya kabiri Buravan ashyize hanze nyuma yo kwegukana igihembo cya Prix Découvertes RFI 2018.

Uyu musore yari aherutse gushimira itangazamakuru rimufasha mu kazi ke ka buri munsi ryanatumye amenyekana kugeza aho kwegukana igihembo gikomeye nk’iki.

Icyo gihe yavuze ko noneho aribwo atangiye bushya mu muziki we n’ubwo atangira kuwukora atiyumvishaga ko azagira izina rikomeye nk’iryo afite uyu munsi akanirahirwa ku rwego mpuzamahanga.

Guhera ku wa Gatanu ari muri Mali aho yagiye mu rugendo rw’akazi ke k’umuziki.

Mu ndirimbo nshya ya Buravan hagaragaramo umukobwa wambaye umwenda uri mu ishusho y'ibendera ry'igihugu inyuma ye hari Kigali Convention Centre na Kigali City Tower

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza