Bull Dogg yakiriye agakiza yiyemeza gukorera Uwiteka mu gihe asigaje ku Isi

Yanditswe na Nsengiyumva Emmy
Kuya 16 Nyakanga 2020 saa 01:24
Yasuwe :
0 0

Benshi bamenye Bull Dogg nk’umwe mu baraperi bakomeye hano mu Rwanda ndetse ni umwe mu bafite abafana batari bake, kuri ubu uyu muhanzi yahamije ko yakiriye agakiza areka inzira mbi yari amazemo igihe ndetse yemeza ko igihe asigaje ku Isi agiye kugikoresha akorera Uwiteka.

Ibi Bull Dogg yabitangaje nyuma yo gushyira hanze EP (Extended Play) y’indirimbo eshatu zose zo kuramya no guhimbaza Uwiteka.

Izi ndirimbo zose zakozwe na Trackslayer zirimo iyitwa;Byose kuri Jah, Icyoroshye na Ingaruka.

Mu kiganiro cyihariye yagiranye na IGIHE, Bull Dogg yeruye ko yakiriye agakiza ndetse anakomoza ku nzira mbi amazemo igihe. Igitekerezo cyo gukora indirimbo zo kuramya no guhimbaza Imana cyaturutse ku kuba yarahinduye umurongo w’ubuzima bwe.

Ati ”Nagiye ku murongo wo gukorera Imana, nahinduye imibereho yanjye ni yo mpamvu nafashe gahunda yo kutazahora nshimisha abantu gusa ngo sinshimishe Imana kuko ariyo iri hejuru ya byose.”

Bull Dogg yeruye ko uretse iyi EP yamaze gusohora, kuri ubu umurongo w’umuziki we yamaze kuwerekeza mu kuramya no guhimbaza Imana, nkuko kuva na cyera byahoze ari icyifuzo cye.

Ati ”Guhera na cyera nahoze numva ngomba kuzakorera Imana, igihe cyawe rero iyo kigeze ibintu birikora pe.”

Nubwo ariko yahinduye ubuzima akaba agiye gushyira imbaraga mu kuririmba indirimbo zo kuramya no guhimbaza Imana ngo azajya ananyuzamo akore indirimbo zisanzwe.

Abajijwe niba hari ikintu cyaba cyaramubayeho cyatumye yiyemeza guhindura imibereho, Bull Dogg yagize ati” Urebye ubuzima mu muziki usanzwe tubamo, by’umwihariko muri Hip Hop, noneho njyewe nagiye mvugwaho ibintu bitari byiza kandi arinjye biturutseho, icya mbere ni ukwirinda ibyo bintu kugira ngo ntangire inzira nziza.”

“Nashoboraga kuba narapfuye kubera icupa nakubiswe mu kabari, nshobora kuba narapfuye kubera impanuka turi mu muhanda kubera ubusazi twasinze, byarashobokaga ko nari kwandura ibirwara kubera kujya mu bagore, nashoboraga kujya mu biyobyabwenge bikampitana. Kuba bitarabaye ntabwo ari ku bwanjye ahubwo ni uko hari umugambi Imana yari imfiteho.”

Bull Dogg avuga ko igihe yakoreye ibyo bibi byose byabaye ariko kugeza ubu yahindutse yabaye umuntu mushya.

Ati”Narabihagaritse nabivuyemo cyera cyane. Bitewe n’imyaka umuntu aba agezemo, hari igihe usubiza amaso inyuma ugasanga hari ibyo wakoze ngo wemeze abantu ariko wareba neza ugasanga ntacyo wakoze rwose. Rero umuntu agomba guhindura.”

Uyu muraperi uri mu bakunzwe mu Rwanda avuga ko agiye gukora umuziki ku buryo bubiri, cyane cyane akibanda mu kuramya no guhimbaza Imana ariko akanyuzamo anakora umuziki usanzwe mu gihe nta kibi akozemo.

Bull Dogg utakundaga kujya mu rusengero cyane yabwiye IGIHE ko agiye gusubira mu materaniro cyane mu rwego rwo kwiyegereza umuremyi.

Mu myaka irenga 13 amaze mu muziki, Bull Dogg avuga ko ari byiza kunyura mu bigeragezo byose yanyuzemo kuko ari inzira yo kumwereka icyiza n’ikibi kugira ngo abone aho ahera ahinduka.

Usibye iyi EP yasohoye iriho indirimbo eshatu, Bull Dogg yavuze ko agiye gukomeza gukora indirimbo zinyuranye ziganjemo izo kuramya no guhimbaza Imana.

Asoza ikiganiro twagiranye yagize ati”Abafana banjye ndabibutsa ko kubaha Imana ari cyo cya mbere, bituma ubaho utekanye mu mutima.”

Ikiganiro twagiranye na Bull Dogg

Umva indirimbo "Byose kuri Jah" ya Bull Dogg

Ingaruka nayo ni indirimbo nshya ya Bull Dogg

Umva "Icyoroshye", indirimbo nshya ya Bull Dogg

Bull Dogg yiyemeje kwiyegurira Uwiteka
Umuziki we yiyemeje kuwuganisha mu kuramya no guhimbaza Uwiteka nubwo ataretse umuziki usanzwe
Mu myaka irenga 13 amaze mu muziki usanzwe, Bull Dogg ngo hari byinshi yanyuzemo yicuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .