00:00:00 IGIHE NETWORK KN KINYARWANDA EN ENGLISH FR FRANCAIS

Bruce Melody yatangiye kwizera igikombe cya Primus Guma Guma

Yanditswe na Munyengabe Murungi Sabin
Kuya 5 Nyakanga 2018 saa 05:47
Yasuwe :
2 0

Ibitaramo bizenguruka igihugu bya Primus Guma Guma Super Star 8 biherutse gushyirirwaho akadomo i Rubavu, Bruce Melody uri mu bahanzi bahataniye igikombe uyu mwaka we yatangiye kwizera intsinzi.

Bruce Melody yagaragaje imbaraga nyinshi mu bitaramo byabaye byose uhereye i Gicumbi aho irushanwa ryatangiriye kugera mu Mujyi wa Rubavu aho ibitaramo bya Roadshow biheruka kubera kuwa Gatandatu tariki ya 30 Kamena 2018.

Mu bo bahanganye bose, buri wese aracyafite amahirwe ijana ku ijana yo kuba yatsinda, gusa ukurikije uko irushanwa ryagenze, hagati ya Christopher na Bruce Melody umwe azegukana igikombe.

Bruce Melody umaze kwitabira iri rushanwa inshuro enye yerekana ko umuziki we umaze gusakara mu gihugu ndetse ko n’abafana baryoherwa n’ibyo aririmba hashingiwe ku buryo bamufashaga kuzirimba ndetse ubwo yageraga ku rubyiniro nibwo umubare munini wizihiwe n’igitaramo kurusha abandi bose.

Melody yavuze ko aho irushanwa rigeze n’ibyo yakoze byose ngo bikwiye gutuma bagenzi be barya bari menge ndetse ubu ‘icyizere cyo kwegukana irushanwa ni cyose’.

Yabwiye IGIHE ko, mu myaka yabanje yagiye ahatana n’abahanzi bamurusha imbaraga n’ubunararibonye ku buryo bitari byoroshye ko yatsinda irushanwa gusa uyu mwaka ngo yahujwe n’abahanzi bo mu kigero cye.

Yagize ati “Ugereranyije n’izindi Primus Guma Guma Super Star zabaye mu myaka yashize, nahanganaga n’abandusha imbaraga, bari bafite amazina akomeye, ntabwo byari byoroshye ko nakwegukana igikombe.”

Yongeyeho ati “Ubu maze gukura bihagije, abantu turi guhatana ni abo mu kigero cyanjye, abenshi twatangiriye umuziki rimwe, abandi nabatanzemo abandi batanzemo igihe gito, urumva ndi mu gihe cyanjye n’abantu duhanganye ni abo mu rugero rwanjye.”

Ahatanye n’abahanzi icyenda, Young Grace, Mico The Best, Uncle Austin, Queen Cha, Active, Just Family, Jay C, Khalfan ndetse na Christopher.

Irushanwa rya Primus Guma Guma Super Star risigaje igitaramo kimwe kinini ari nacyo kizarisoza ku itariki ya 14 Nyakanga 2018 kuri Stade Amahoro i Remera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .