Bruce Melodie mu gahinda kubera Shene ya Youtube ye yagabweho igitero n’Umwongereza

Yanditswe na Uwiduhaye Theos
Kuya 11 Mutarama 2019 saa 05:28
Yasuwe :
0 0

Itahiwacu Bruce umaze kwamamara mu muziki nka Bruce Melodie ari mu gahinda nyuma y’aho shene ye y’urubuga rwa Youtube yamaze gusibwa mu buryo butunguranye.

Iyi shene ya Youtube y’uyu muhanzi yari imaze kugira abantu bamukurikira barenga ibihumbi 43, iriho indirimbo ze zitandukanye hafi ya zose.

Mu kiganiro na IGIHE yavuze ko yibwe ku mugoroba wo ku wa Gatatu gusa ubu akaba yatangiye kubikurikirana.

Ati “Bashimuse shene yacu ya youtube ariko turimo kubikurikirana ngo turebe niba twabasha kuyigarura. Ejo nimugoroba nibwo bayitwaye. Twamenye ko umuntu wayitwaye ari uwo mu Bwongereza.”

Uyu muhanzi yakomeje avuga ko ari mu gahinda ariko na none akaba yabimenyesheje abagenzura uru rubuga kugira ngo bakurikirane uwakoze iki kintu.

Ati “Ndimo kubimenyesha Youtube na Google kugira ngo tumenye niba babasha kudufasha ibyo byanze ni ukwitabaza ababizobereye bakadufasha. Umuntu wese wibwe ntabwo aba yishimye ubu ndi kugerageza ngo ndebe ko nayigarura.”

Abahanzi benshi muri iki gihe bugarijwe n’ubujura bwo ku mbuga nkoranyambaga bwibasira cyane imbuga nkoranyambaga.

Iyi nkubiri yatangiye umwaka ushize ubwo ibyamamare bitandukanye birimo Muyoboke Alex, Lucky Nzenyimana, Nina, Shaddy Boo n’abandi; bibwaga imbuga za Instagram zabo uwabikoraga kuri bamwe aza gufatwa aranafungwa.

Abajura b’izi mbuga nkoranyambaga baherutse gutwara kandi Instagram ya Marina n’iya Anita Pendo.

Usibye kwifashishwa nk’umuyoboro wo kumenyekanisha ibihangano, Youtube muri iki gihe isigaye ari isoko y’amafaranga ku bantu binyuze mu kwishyurirwa ubutumwa bwamamaza buba bwatambutse mu byo nyirayo yashyizeho.

Uwemererwa kwinjira mu muryango w’abamamaza (YouTube Partner Program) agomba kuba nibuze afite abamukurikira (subscribers) 1000 ndetse amashusho yose yashyizeho yararebwe mu gihe cy’amasaha arenga 4000.

Ushaka kwinjira mu muryango w’abamamazanya na Youtube ajya kuri konti akoresha, agakanda ku ifoto imuranga iri ibumoso mu gice cyo hejuru, agahitamo ahanditse ‘Creator Studio’. Uwageze muri icyo gice akanda ahanditse ‘Channel’ ibumoso, akongera agakanda ‘Status and Features’ ubundi agahitamo ‘Monetization’.

Iyo wujuje ibyavuzwe byose bisabwa uhabona akarongo gatambitse k’icyatsi kibisi ndetse n’ijambo ’Eligible’ rikwemerera kuba wasaba kwinjira mu bamamazanya n’uru rubuga. Uwemerewe kubisaba abona ahanditse ’Enable’ akahakanda hanyuma agakurikiza andi mabwiriza ahabwa yo gufunguza konti ya Google Adsense.

Ikiba gisigaye ni uko buri mashusho utanga uburenganzira bwo kuyamamazaho, uhitamo ahanditse ‘Monetize with Ads’ munsi y’izina ryayo. Ikizakwereka ko akwinjiriza amafaranga ni akamenyetso k’amadolari “$” kaba kari imbere yayo.

Ikindi cyo kuzirikana ni uko guhuza Youtube yawe na konti ya Googe AdSense, ituma amatangazo yamamaza abasha kujya ku rubuga rwawe cyangwa mu mashusho yawe, ubundi uko umuntu ayafunguye anyuze iwawe ukagenda ubarirwa amafaranga runaka, yiyongera bitewe n’umubare w’abayakanzeho cyangwa abayarebye igihe kinini.

Bruce Melodie ari mu gahinda nyuma yo gushimutwa kwa shene ye ya Youtube
Melodie yabwiwe ko shene ye yibwe n'Umwongereza
Ni uku biri kugenda ku muntu ufunguye indirimbo iri kuri shene ya Bruce Melodie

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza