Ku rutonde rw’abazasusurutsa abazitabira iki gitaramo harimo Boukuru, DJ Infinity, Nicolas Peks na Nep DJs, mu gihe iki gitaramo kizayoborwa n’abarimo MC Sonia na MC Michel.

UB40 ni itsinda ryashinzwe n’abasore bo mu Bwongereza bari inshuti mu 1978. Aba bakoze iyo bwabaga riba rimwe mu akomeye Isi yari ifite icyo gihe.

Mu 2008 iri tsinda ryajemo umwuka mubi watumye uwitwa Ali Campbell arisezeramo kubera kutumvikana n’abarebereraga inyungu zaryo ndetse mu 2014 afata icyemezo cyo gushinga UB40 ye.

Icyo gihe abarimo Jimmy Brown, Robin Campbell, Earl Falconer na Norman Hassan bashinganye iryo yari avuyemo, banze ko atwara izina ryabo ari na byo byatumye Ali Campbell yita itsinda rye ‘UB40 Ft Ali Campbell’.

Ali Campbell wari uyoboye abaririmbyi ba UB40, akimara kuva muri iri tsinda, abo barishinganye bamusimbuje umuvandimwe we Duncan Campbell wariyoboye kugeza mu 2021 ubwo yasezeraga kubera imbaraga nke z’umubiri, na we ahita asimbuzwa Matt Doyle.

Mu 2014 ubwo yashingaga itsinda rye, Ali Campbell yahise aryinjizamo Terence Wilson wamamaye nka Astro ndetse na Mickey Virtue na we waje kurisezeramo mu 2018. Astro yitabye Imana mu 2021.

Kugeza ubu UB40 igizwe n’abacuranzi barimo Jimmy Brown, Robin Campbell, Earl Falconer, Norman Hassan, Matt Doyle, Jahred Gordon, Gilly G, Matt Campbell, Martin Meredith, Ian Thompson na Laurence Parry.

UB40 yananyuzemo abandi nka Ali Campbell, Yomi Babayemi, Jimmy Lynn, Brian Travers, Mickey Virtue, Astro, Duncan Campbell.

Mbere yo gutaramira i Kigali, UB40 ft Ali Campbell izabanza gukorera ibitaramo muri Afurika y’Epfo aho ku wa 2 Kamena 2026 bazataramira mu Mujyi wa Cape Town, tariki 4 Kamena 2026 bataramire mu Mujyi wa Durban na ho ku wa 6-7 Kamena 2026 bataramire i Pretoria nubwo amatike y’umunsi wa mbere yamaze gushira ku isoko.

Bazahava bitabira igitaramo batumiwemo mu Mujyi wa Kigali ku wa 9 Kamena 2026.

Nyuma yo kuva i Kigali aba bahanzi bazakomereza iwabo mu Bwongereza na Irlande kuva mu Ugushyingo-Ukuboza 2026 bakazataramira mu Mijyi nka Nottingham, Glasgow, Londres (The O2), Birmingham, Manchester, Leeds, Cardiff na Brighton.

Boukuru ni we muhanzi rukumbi wo mu Rwanda watoranyijwe gutaramana na UB40 Ft Ali Campbell