B-Threy, inkingi ya mwamba muri Green Ferry yashyize hanze album ye ya kabiri

Yanditswe na Uwiduhaye Theos
Kuya 5 Ukwakira 2019 saa 03:53
Yasuwe :
0 0

Bertrand Muheto wiyise B-Threy umwe mu baraperi bari kwitwara neza babarizwa mu nzu yahurije hamwe abahanzi bakizamuka mu njyana ya Hip Hop bakora yitwa ‘Kinyatrap’ , inzu ya Green Ferry Music, yashyize hanze album ye ya kabiri yise ‘2040’.

B Threy yashyize hanze iyi ya kabiri ije ikurikira iyo yabanje gukora yise ‘Nyamirambo’. Album ya kabiri iriho indirimbo 14.

Uyu muhanzi yabwiye IGIHE ko yahisemo iri zina kubera ko yakuye inganzo ku cyerekezo u Rwanda rugiye kujyamo cya 2040.

Ati “Imvano yayo ni icyerekezo tugiyemo cya 2040. Kandi ibikubiyemo nibyo byerekana neza ishusho nyayo ya ‘Kinyatrap’ yanjye na bagenzi banjye bayikora n’abatugira inama. Ikindi kandi ni uko ari album ifite n’igice kivuga ku gisekuru cyacu gishyushye cyane igihe tuzaba twarakuze.”

Iyi album iriho indirimbo zitandukanye zirimo iyitwa ‘2040’ yayitiriwe, ‘Mu makorosi’, ‘Icyizere’, ‘Barafinda’, ‘Bazizana’, ‘Urwagasabo’ yakoranye na Mariya Yohana n’izindi.

Iyi album yakozweho n’aba-Producers barimo Dizo Last, Dr. Nganji, Zima Black na Climax Visuals.

Uyu musore yavutse ku wa 27 Nyakanga 1994. Aherutse kubwira IGIHE ko yiyumvisemo impano akiri muto, yaririmba nyirakuru akamubwira ko ari byiza.

Yakomeje guterwa imbaraga na babyara be ndetse ubwo yigaga mu mashuri yisumbuye mu mwaka wa kabiri mu 2008, yakoranye indirimbo ye ya mbere n’abasore biganaga bayihuriramo ari batanu.

Mu biruhuko yakundaga kujya muri studio za Nyamirambo atangira kwiyumvamo cyane umuziki kugeza aho mu 2014 yahuye n’abatunganya indirimbo barimo Allan Slim, Dizolast na Dr. Nganji bituma arushaho kuwihebera.

Yahise atangira gukora umuziki by’umwuga kuko yumvaga ahuje ibyifuzo bye na bo batunganya indirimbo cyane cyane ko bakoraga Trap kandi na we akaba ariyo yiyumvamo nyuma aza kwinjira muri Green Ferry Music ari nayo abarizwamo kugeza uyu munsi.

Bertrand Muheto wiyise B-Threy umwe mu baraperi bari kwitwara neza babarizwa mu nzu yahurije hamwe abahanzi bakizamuka mu njyana ya Hip Hop bakora yitwa ‘Kinyatrap’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza