Ashaka gukorana na Knowless! Alexandre Lenco ufite ubumuga bwo kutabona arihariye mu gucuranga (Video)

Yanditswe na Uwiduhaye Theos
Kuya 22 Gicurasi 2020 saa 07:50
Yasuwe :
0 0

Biragoye kwiyumvisha ukuntu umuntu ufite ubumuga bwo kutabona ashobora gucuranga gitari cyangwa se piano, ariko uhita ubyumva cyane iyo ubyiboneye amaso.

Gusa ubaye uzi Stevland Hardaway Morris uzwi nka Stevie Wonder, ntiwashidikanya umuntu akubwiye ko hari umuhanzi mushya ufite ubumuga bwo kutabona ucuranga ibicurangisho zigata inyana!

Stevie Wonder ni Umunyamerika. Ni umwe mu bahanzi bakomeye ku Isi ndetse hari abahanzi benshi bamureberaho mu muziki wabo kubera ubuhanga bwe mu kuririmba no gucuranga ibicurangisho bitandukanye akabifatanya no gutunganya indirimbo.

Uyu mugabo w’imyaka 70 yagize ubu bumuga bwo kutabona biturutse ku ndwara yarwaye akivuka cyane ko yavutse habura ibyumweru bitandatu.

Mu Rwanda naho hari abahanzi batandukanye bafite ubumuga bwo kutabona bari kwitwara neza ku buryo mu minsi iri imbere bazaba bari mu bayoboye mu muziki.

Muri abo, harimo umuhanzi Alexandre Mwitende [Lenco] w’imyaka 40 ubusanzwe avuka mu Karere ka Gicumbi mu Majyaruguru y’u Rwanda ariko ubu aba mu Mujyi wa Kigali.

Uyu mugabo w’abana babiri yatangiriye umuziki mu Kigo cya HVP Gatagara yagiyemo afite imyaka itandatu bitewe n’ubumuga bwo kutabona yagize afite imyaka itatu. Yize umuziki imyaka ine muri iki kigo yagiyemo akiri umwana atangira kuwukora gutyo acuranga muri za Orchestre zitandukanye.

Uretse kwiga umuziki anigisha ibicurangisho birimo piano cyangwa guitar umuntu ubishaka akamusanga mu rugo iwe cyangwa na we akaza iwe.

Atunzwe n’umuziki…

Alexandre Lenco atuye Nyamirambo mu Karere ka Nyarugenge mu Mujyi wa Kigali, aho afite yaguze akuye mu muziki.

Yabwiye IGIHE ati “Umuziki umaze kumpa ibintu byinshi. Iyi nzu ni iyanjye, mfite ibyuma bya muzika hano, ndihira amashuri abana banjye babiri… ni byinshi cyane umaze kumpa.”

Yabwiye abantu bafite ubumuga basabiriza ko babasebya kuko kugira ubumuga bitavuze ko umuntu adashoboye.

Avuga ko abantu b’iwabo bamwubaha kuko atababereye ikigwari, ikindi ubu akaba ari we ubafasha. Avukana n’abandi bana barindwi.

Mu bahanzi yemera harimo Mihigo François Chouchou, Rodrigue Karemera na Butera Knowless.

Yavuze ko anifuza gukorana indirimbo na Butera Knowless kuko ari umuhanzi w’umuhanga. Yagize ati “Knowless ndamwifuza cyane, ni umuhanzikazi w’umuhanga ukora ibintu ntabyo gushakisha.”

Alexandre Lenco kuri ubu afashwa mu muziki n’umuhanzikazi Tonzi, wamubonye kuri televiziyo akifuza kumuteza imbere kuko yamubonyemo impano ikomeye.

Amaze gukora indirimbo ebyiri zirimo iyo aheruka gushyira hanze yitwa ‘Urukundo’ ndetse na ‘Reka Nkuririmbe’.

Indi nkuru wasoma bifitanye:

Alexandre Lenco ufite ubumuga bwo kutabona afite ubuhanga budasanzwe mu gucuranga
Alexandre Lenco ari gufashwa na Tonzi mu muziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .