Annette Murava yifashishije Gafaranga, Jules Sentore, Mbonyi, Element na Riderman bakora mu nganzo…Indirimbo nshya za Weekend

00:00:00 IGIHE NETWORK

KINYARWANDA

ENGLISH

FRANCAIS

Annette Murava yifashishije Gafaranga, Jules Sentore, Mbonyi, Element na Riderman bakora mu nganzo…Indirimbo nshya za Weekend

Yanditswe na Uwiduhaye Theos

Kuya 25 October 2025 saa 10:05

Yasuwe :

Yavuzweho:

Icyumweru ku kindi, twahisemo kujya tugeza ku badukurikira indirimbo zitandukanye zagiye hanze, yaba iz’abahanzi bo mu Rwanda cyangwa mu mahanga.

Ni indirimbo ziba zasohotse muri buri cyumweru yaba iz’abahanzi bamaze kubaka izina cyangwa abakizamuka. Izi ndirimbo dutangaza ntazo duheza, ahubwo izo tubasha kubona ku mbuga ziganjemo urwa YouTube ni zo tugeza ku badukurikira.

“Nkuyo” - Jules Sentore

Jules Sentore yashyize hanze amashusho y’indirimbo iri mu zigize album aheruka gushyira hanze yise “Umudende”. Muri aya mashusho yifashishijemo Umubiligi Hilde Cannoodt ugaragaramo abyina bya Kinyarwanda. Iyi ndirimbo ni yo ya mbere Jules Sentore akoreye amashusho kuri iyi album.

“Sitamuacha” - Israel Mbonyi

Ni indirimbo nshya y’umuramyi Israel Mbonyi uri mu bahanzi nyarwanda bamaze kubaka izina ku ruhando mpuzamahanga.

Uyu muhanzi aba agaragaza ko uko bizagenda kose atazigera ava ku Mana, kuko ariyo buhungiro bwa nyabwo mu buzima bwa buri munsi bw’ikiremwamuntu.

“Maaso” - Element EleéeH

Ni indirimbo nshya ya Element uri mu bahanzi bakomatanya kuririmba no gutunganya indirimbo.

Muri iyi ndirimbo aba yishyize mu mwanya w’umusore uri kwizeza umukobwa ko atazigera amubabariza umutima na rimwe, kuko atatuza atamubonye.

“Everything” - Riderman ft. Marina

Everything ni indirimbo nshya ya Riderman na Marina. Muri iyi ndirimbo aba bahanzi baba bagaragaza ukuntu umuntu ashobora kwifuza, umukunzi bahuza muri byose kandi ku bw’amahirwe akabigeraho.

Nka Riderman hari aho aririmba ati “Nkeneye umwali w’umutima gusa mu buriri ho akaba indatwa. Umwana uzi Imana unasenga ariko mu kirori tukajyana.”

“Sina Makosa” - Papa Cyangwe ft. Diez Dolla

Ni indirimbo nshya yahuriyemo abahanzi Papa Cyangwe na Diez Dolla. Muri iyi ndirimbo aba basore baba bagaragaza ukuntu, hari igihe umuntu ahura n’umukobwa bagahuza rugikubita.

“Bad Bitch” - Ella Rings

Ni indirimbo nshya y’umuhanzi Ella Rings uri mu bakobwa bari kuzamuka muri iki gihe. Uyu mukobwa ni umwe mu bo guhangwa amaso mu muziki nyarwanda, cyane ko ari mu gisekuru gishya kiri kuzana impinduka.

“I Love You” - Dabijou

Ni indirimbo y’umuhanzi Dabijou uri mu bagore bamaze igihe kinini bahanyanyaza mu myidagaduro. Azwi cyane kubera gukundana n’abahanzi batandukanye barimo abahoze Yago, abahoze muri Urban Boyz n’abandi. Muri iyi ndirimbo, aba yishyize mu mwanya w’umukobwa wiyemeje gutobora akerurira umusore ko yamwihebeye.

Fela Music yashyize hanze EP…

Itsinda rya Fela Music ryashyize hanze Extended Play [EP] nshya bise ‘Tambaza’. Iyi EP iriho indirimbo umunani zirimo iyo bise “Uwundi” Ft Rey Rona, “Dariyo”, “Love Song”, “Craziness”, “Warira”, “Uwo Nizera”, “Savior” ft Jowest & Emmy Vox na “Tambaza”.

Iri tsinda rimaze imyaka ine ritangiye umuziki mu buryo bw’umwuga rigizwe n’abasore bavukana ndetse banakurikirana barimo Ngabo Lucky ukoresha izina rya Labii na mugenzi we akaba na murumuna we , Nshimyimfura Faida ukoresha izina rya Feikel.

Bakunzwe mu ndirimbo zirimo nka ‘Wasanga’ bakoranye na Jowest, ‘Umukara’, ‘Utulips’ n’izindi zitandukanye.

Reba indirimbo zigize iyi EP y’aba basore

“Ndi Nde?” - Annette Murava ft. Bishop Gafaranga

Ni indirimbo nshya Annette Murava yashyize hanze. Muri iyi ndirimbo aba aririmba agaragaza ko ntacyo umwana w’umuntu yakabaye aricyo imbere y’Imana, ariko ikaba imuha agaciro kuruta ibindi byaremwe. Muri iyi ndirimbo, hagaragaramo umugabo we Bishop Gafaranga uheruka gufungurwa, aho yari akurikiranyweho guhohotera uyu mugore.

“Sinjye” - Afrique ft. Drama T

Ni indirimbo nshya yahuriyemo abahanzi Afrique na Drama T wo mu Burundi. Aba bahanzi baba baririmba bishyize mu mwanya w’umusore wakunze umukobwa, ku buryo amuhoza ku mutima we. Avuga ko ibyo akora byose atari we ubyikoresha ahubwo ari urukundo n’umutima bibikora.

“Shimwa” - Maranatha family Choir Ft David Nduwimana

Ni indirimbo nshya ya Maranatha Family Choir yahuriyemo na David Nduwimana. Aba bahanzi baba bashimira Imana yabatoranyije ikabagira abayo, bakerekana ko mu maso y’Imana abantu ari ab’agaciro. Bati ‘Ndinde ko unyibuka? Izina ryawe rishyirwe hejuru.”

Iyi ndirimbo na Selemani Munyazikwiye uhagarariye Maranatha Family Choir. Audio yakozwe n’uwitwa Marc Kibamba mu gihe amashusho yakozwe na Editor Guy.