Iyi nama mpuzamahanga Alyn Sano yitabiriye yatangiye ku wa 20-24 Mutarama 2026, icyakora ibikorwa by’imurikabikorwa byo biteganyijwe ku wa 22-24 Mutarama 2026.

Ni inama iri kuba ku nshuro ya 125, iri no kwizihiza imyaka 50 ishize itangiye kubera mu Mujyi wa Anaheim kuri ubu ikazaba ibera ahitwa ‘Anaheim Convention Center’.

Mu kiganiro yagiranye na IGIHE mbere yo kwerekeza muri Leta Zunze Ubumwe za Amerika, Alyn Sano yavuze ko yishimiye bikomeye kwitabira iyi nama mpuzamahanga ya muzika cyane ko bizamuha amahirwe yo guhura n’umuryango mugari w’abakora umuziki ku Isi.

Ati “Kwitabira The NAMM Show ni ishema rikomeye kandi ni intambwe ikomeye mu mwuga wanjye. Ni amahirwe yo guhura n’umuryango mpuzamahanga w’abakora umuziki, kwigira ku babimazemo igihe, no gusangiza Isi umuziki nyarwanda n’umuco wacu. Nishimiye cyane guhagararira u Rwanda n’ijwi ryarwo kuri uru rwego ruhanitse.”

Byitezwe ko uretse iyi nama Alyn Sano azagira n’umwanya wo gutembera ahantu hatandukanye ari nako akomeza kwigira byinshi muri Amerika ndetse akaba yanasura inshuti ze mbere y’uko agaruka mu Rwanda.

Ni ubwa mbere Alyn Sano yerekeje muri Leta Zunze Ubumwe za Amerika

Alyn Sano yitabiriye inama mpuzamahanga ‘NAMM Show2026’ iri kubera muri Leta ya California

Iyi nama Alyn Sano yitabiriye iri kubera mu Mujyi wa Anaheim wo muri Leta ya California