Izi ndirimbo nshya zasohowe n’abahanzi banyuranye barimo abubatse izina n’abagishaka inzira zo kwigarurira abakunzi ba muzika Nyarwanda.

Mu bahanzi basohoye indirimbo nshya barimo Bushali, Alyn Sano, Mimi Martime, Riderman afatanyije na B-Face w’i Burundi, Yvan Muziki n’abandi basoje umwaka wa 2023 bakoze mu nganzo.

Nk’uko bisanzwe buri mpera z’icyumweru, IGIHE ikora urutonde rugizwe n’indirimbo nshya z’abahanzi nyarwanda zafasha buri wese.

–  Loaded Gun ya Riderman na B-Face

Riderman na B-Face bashyize hanze indirimbo bise ‘‘Loaded Gun’’ yakorewe mu Bisumizi, itunganywa mu buryo bw’amajwi na Evydeks. Amashusho yafashwe anatunganywa na Director Cesh afatanyije na Director C, Wavelenght.

–  Biryoha Bisangiwe ya Alyn Sano

Alyn Sano yasohoye indirimbo yitwa “Biryoha Bisangiwe”. Mu buryo bw’amajwi yakozwe na Prince Kiiz wo muri Country Records, amashusho yayo atunganywa na Chriss Eazy na Director C.

–  Igeno ya Bushali

Umuraperi Bushali yashyize hanze indirimbo nshya yise “Ijyeno” iri kuri album amaze igihe ategura. Ni indirimbo aririmba, asaba Imana ko abamutega imitego bakwiriye kumuvaho. Yakozwe mu buryo bw’amajwi na Hervibeats naho amashusho akorwa na Oskar Oskados.

–  Niyo ya Israel Mbonyi

Israel Mbonyi yasohoye indirimbo yitwa “Niyo”. Iyi ndirimbo aba abwira abantu guhamya ibikorwa by’Imana.

–  Waramfashe ya Mimi Martine

Mimi Martine ukorera umuziki muri Canada yashyize hanze indirimbo yise “Waramfashe”. Ni nyuma y’amezi atandatu yaherukaga gusohora iyo yakoranye na Aline Gahongayire yitwa “Iracyavuga neza”.

–  Naranyuzwe ya Musabe Dieudonné

Musabe Dieudonné yashyize hanze indirimbo yo komora umutima we nyuma yo gutandukana n’inkumi yambitse impeta, biteguraga kubana.

Musabe yabwiye IGIHE ko muri Nyakanga ya 2023 yambitse impeta umukobwa witwa Uwajeneza Ariane biteguraga kurushinga. Nyuma y’igihe bitegura gukora ubukwe umukobwa yaje kumubenga birangira batandukanye.

Uyu muhanzi yigiriye inama yo gutura agahinda studio akora indirimbo yo kwivura ibyo bikomere yahuye nabyo muri Kanama ya 2023. Yakozwe na Titi Pro mu buryo bw’amajwi ariko amashusho yatunganyijwe na Roberto Pro afatanyije El Shema.

–  Rukangaranyababisha ya Focus Ruremire

Umuhanzi w’Indirimbo za gakondo, Focus Ruremire, nyuma y’umwaka atumvikana yongeye kubyutsa inganzo aririmba iyitwa “Rukangaranyababisha”.

Ni indirimbo yumvikanamo avuga ubutwari bwa Perezida Kagame wayoboye urugamba rwo kwibohora n’urw’iterambere akaba yarahesheje ijambo u Rwanda.

–  Eminado ya Niyo Bosco

Niyo Bosco yasoje umwaka afasha abafana be kwishimira iminsi mikuru aho yashyize hanze indirimbo yitwa “Eminado”. Ni indirimbo ya mbere asohoye kuva yasinya muri Kikac Music. Yakozwe na Loader mu buryo bw’amajwi, amashusho yayo yatunganyijwe na John Elarts.

–  078 ya Njd Rumuri na Karigombe

Njd Rumuri afatanyije na Karigombe bashyize hanze indirimbo yitwa 078 irimo amagambo yuzuye agahinda k’ubuzima abaraperi banyuramo. Yakozwe na Trackslayer mu buryo bw’amajwi.

–  VIP ya Yvan Buravan na Ish Kevin

Nyuma y’umwaka urenga apfuye, abareberera inyungu za Yvan Buravan bashyize hanze indirimbo yitwa “VIP” yakoranye na Ish Kevin. Amajwi yayo yakozwe na Pro Zed naho amashusho afatwa na Dric Ent.

–  Obrigado ya Jean Christian Irimbere

Umuramyi Jean Christian Irimbere yashyize hanze indirimbo yise “Obrigado” ishimangira uburinzi bw’Imana ku buzima bw’abizera.

–  Yesu warakoze ya Jado Sinza

Umuhanzi uri mu bafite izina mu muziki uhimbaza Imana, Jado Sinza, yasohoye indirimbo yise “Yesu Warakoze.’’

Uyu muramyi yahise anateguza igitaramo gikomeye yise “Redemption Live Concert’’, giteganyijwe kuba ku wa 17 Werurwe 2023.

–  Pressure ya Rocky Kimomo na bagenzi be

Umusobanuzi wa Filime, Rocky Kimomo yahuje Kadaffi Pro, Dumba, Savimbi, Microjenie, Sean Brizz, Rumaga na Dj Brianne bakora indirimbo bise “Pressure”.

Mu buryo bw’amajwi yakozwe na Ayo Rush na Bob Pro mu gihe amashusho yayo yatunganyijwe na Jakob Legacy, Director C, Sun B na Njuga wayoboye ifatwa ry’amashusho yayo.

–  Family ya Amalon

Amalon utacyumvikana cyane mu ihatana rya Muzika Nyarwanda na we yasohoye indirimbo yitwa “Family” imeze nk’aho aba ari kurota ibyo yifuza kugeraho birimo kugenda mu modoka zihenze nka Lamborghini na Bugatti.

Mu buryo bw’amajwi yakoze na Murigo, amashusho atunganywa na Eazy Cuts.

–  Nyirabisabo yasubiwemo na Yvan Muzik

Yvan Muzik yasubiye Nyirabisabo yakozwe na Bob Pro. Amashusho yatunganyijwe na AyoMerci na Director C.

–  Ijambo ya Theo Bosebabireba

Theo Bosebabireba yongeye kwibutsa abamukunda ko agihari abinyujije mu ndirimbo yise “Ijambo”. Ni indirimbo yerekana ko Imana ari igisubizo cy’ibibazo byose.

‘Ineza’ - Chanty Nina

Chanty Nina avuga ko indirimbo “Ineza” igamije gushima Imana ku bw’ineza n’ibitangaza yagiye imukorera inshuro nyinshi mu buzima bwe, ari nako yibutsa abantu kujya bafata akanya bagashima Imana ku bwa buri kimwe ibakorera kuko hari abantu baba batabashije kubibona.

Nina yatangiye gushyira hanze indirimbo zo kuramya no guhimbaza Imana mu mwaka wa 2021 ushyira 2022. Kuva icyo gihe kugeza ubu amaze gushyira hanze indirimbo esheshatu zirimo “Yampaye amahoro”, “Inshuti nziza”, “Mbumbatiwe”, “Ndagukeneye”, “Noel” na “Ineza” iheruka.

Rukundo - Agnes Kayesu

Ni indirimbo y’umuhanzi mushya mu ndirimbo zihimbaza Imana, Agnes Kayesu, yise Rukundo. Igaruka ku rukundo rw’Imana. Ni indirimbo ye ya kabiri.

Yavuze ko afite inzozi zo kuzavamo umuhanzi ukomeye nka Mbonyi, ngo n’ubwo kuririmba indirimbo zihimbaza Imana mu Rwanda bitoroshye kuko yabonye bisaba kwihangana.

Uhoraho yambwiye ijambo - Heaven Trumpet Group

Ni indirimbo nshya ya Heaven Trumpet Group iri rikaba ari itsinda riririmba indirimbo zo muri Kiliziya rikorera muri Paruwasi Regina pacis Remera.

Iri tsinda kandi rifite indirimbo zirimo "Ndagiwe n’umushumba mwiza" n’izindi.

Niyitamurura - La Source

Ni indirimbo ya munani kuri album ya kane ya Korali La Source ikorera ivugabutumwa mu Itorero rya ADEPR Mbugangari riherereye mu Karere Ka Rubavu. Iyi ibaye indirimbo ya munani kuri album yise Narababariwe. Ikubiyemo ubutumwa bw’ihumure no gukomeza abagenzi bajya mu ijuru.

Perezida wa Choral La Source, Nzayikorera Thierry, yavuze ko bahisemo kuyishyira hanze muri iki gihe kuko babonye ko benshi bari gutakariza Imana icyizere bitewe n’ibyo bari guhura nabyo.

Ati "Ushobora kurara urira ubona ko birangiye ariko mu gitondo impundu zikavuga maze Abera tugahimbaza Imana. Abantu bakomeze bagirire Imana icyizere, Yesu Aracyakora."

“Apprecie” - Claire Dimpo

Muzika Nyarwanda yungutse indi mpano nshya y’uwitwa Uwera Marie Claire [Claire Dimpo] winjiranye mu muziki indirimbo yise “Apprecie”.

Iyi ndirimbo yatunganyijwe na Bob Pro, amashusho yayo akorwa na Jovial E.T afatanyije na I. Davy.

“Jye nsanze umwami ijabiro” - Eastern Singers

Itsinda ry’abasore n’inkumi Eastern Singers, bifashishije indirimbo “Umwami utetse ijabiro” ya Rugamba Cyprien bayisubiramo mu rwego rwo gufasha abayikunze n’abakiri bato kongera kumva no kwisanga muri iyi ndirimbo imaze igihe kinini isohotse.