Akon yitezwe mu bakomeye bazita izina ingagi

Yanditswe na Munyengabe Murungi Sabin
Kuya 27 Kanama 2018 saa 10:26
Yasuwe :
0 0

Umuririmbyi wo muri Amerika ukomoka muri Senegal, Akon, ategerejwe mu gikorwa cyo Kwita Izina abana b’ingagi mu birori bizabera mu Kinigi mu Karere ka Musanze muri Nzeri 2018.

Umuhango wo Kwita Izina ingagi uteganyijwe mu Kinigi, ku itariki ya 7 Nzeri 2018. Mu bashyitsi bakomeye bazita izina, harimo umuhanzi w’ikirangirire Akon [ubusanzwe witwa Aliaune Damala Bouga Time Bongo Puru Nacka Lu Lu Lu Badara Thiam].

IGIHE ifite amakuru yemeza ko Akon azitabira ibirori bya Kwita Izina Gala Dinner biteganyijwe kubera mu Mujyi wa Rubavu nyuma gato y’uko umuhango nyir’izina uba.

Ku mugoroba w’umunsi uyu muhango uzaberaho, hateganyijwe umusangiro uzabera mu Karere ka Rubavu. Itsinda Mafikizolo ryo muri Afurika y’Epfo rikunze gutumirwa mu mihango ikomeye ihuriza hamwe abashyitsi b’icyubahiro mu Rwanda ni ryo rizasusurutsa abazitabira.

Akon kandi, azava mu Rwanda atashye ku mugaragaro umushinga we wo gukwirakwiza ingufu z’amashanyarazi “Akon Lighting Africa” yakoreye mu Karere ka Kayonza ahitwa i Ndego bigizwemo uruhare rukomeye n’ikigo Solektra International asanzwe afitemo imigabane.

Umushinga ‘Akon Lighting Africa’, uyu muhanzi yaje kuwutangiza mu Rwanda tariki 28 Nyakanga 2015, icyo gihe yagiranye ibiganiro n’abayobozi batandukanye bafite aho bahuriye n’uyu mushinga akorera mu bihugu 12 bya Afurika birimo n’u Rwanda.

Akon ubwo aheruka kuza mu Rwanda mu 2015

Yawutangiye mu mwaka wa 2014, ugamije gukwirakwiza amashanyarazi aturutse ku mirasire y’izuba mu abaturage bo mu bice by’icyaro babasha kugerwaho n’amashanyarazi ahendutse.

Akon yihaye intego yo kuzageza aya mashanyarazi ku Banyafurika miliyoni 600 bo bihugu bigera kuri 12 muri Afurika birimo Mali, Niger, Senegal, Guinea Conakry, Sierra Leone, Benin, Guinea Equatorial, Gabon, Congo Brazaville, Namibia, Madagascar na Burkina Faso ndetse n’u Rwanda.

Akon yaje gutangiza umushinga we mu Rwanda mu 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza