00:00:00 IGIHE NETWORK KN KINYARWANDA EN ENGLISH FR FRANCAIS

Akanyamuneza kari kose abo kuri Base bakira abahatanira Primus Guma Guma

Yanditswe na Munyengabe Murungi Sabin
Kuya 23 Kamena 2018 saa 07:36
Yasuwe :

Abo kuri Base ni ubwa mbere bagezweho na Primus Guma Guma Super Star! Ibyishimo byari byose ubwo bakiraga abahanzi icumi bahataniye irushanwa rikomeye mu gihugu kuri uyu wa Gatandatu tariki ya 23 Kamena 2018.

Abahanzi icumi bahatanira irushanwa rya Primus Guma Guma Super Star ya 8 bakomeje urugendo rwo kwiyereka no gusabana n’abakunzi b’umuziki. Kuri uyu wa Gatandatu bakoreye igitaramo gito muri centre ya Base, Murenge wa Base mu Karere ka Gakenke ahari abaturage babarirwa mu bihumbi bibiri.

Iki gitaramo gito[mini roadshow] kiri mu bindi by’umwihariko Bralirwa yashyizemo uyu mwaka. Kibaye nyuma y’ibindi byabereye mu Karere ka Bugesera ndetse n’i Kabuga muri Gasabo.

Ni mu gihe ibitaramo binini bya Live byerekera ku musozo; hasigaye ikizabera mu Mujyi wa Rubavu ku itariki ya 30 Kamena 2018 ari nacyo kizaheruka ibizenguruka igihugu cyose nyuma y’igiherutse kubera mu Mujyi wa Huye, icyabereye i Musanze ndetse no mu Mujyi wa Gicumbi ari naho urugendo rwatangiriye.

Abo kuri Base bari banezerewe bikomeye ubwo bataramanaga na Bralirwa ibicishije mu bahanzi icumi bahataniye irushanwa rya Primus Guma Guma Super Star uyu mwaka barimo Young Grace, Mico The Best, Active, Khalifan, Uncle Austin, Christopher, Just Family, Bruce Melody, Jay C ndetse na Queen Cha.

Aba bahanzi bataramiye mu isoko rya Base riri mu yakira abantu benshi. Kuri uyu wa Gatandatu abahanzi baririmbanye n’abafana babo muri aka gace, buri wese yahabwaga umwanya wo kuririmba yasoza akabwira abakunzi be uko bamutora ndetse na bo bakabaza ibibazo ku ngingo zitandukanye bafiteho amatsiko.

Uretse gutarama, kwizihirwa no kunywa ibinyobwa bya Bralirwa, abakunzi ba muzika muri aka gace basobanuriwe ibyiza Primus Guma Guma Super Star yazanye uyu mwaka n’uburyo ryashyize impinduka muri muzika nyarwanda.

Mico The Best, umwe mu bahataniye iri rushanwa yabwiye IGIHE ko ibi bitaramo bito byafashije abahanzi kwegerana n’abafana babo mu duce tudasanzwe dutegurwamo ibitaramo ndetse ko byakuye abakunzi ba muzika mu bwigunge.

Yagize ati “Icya mbere, ibi ni uburyo bwiza bwo kwamamaza, urabona kuba haje abantu bangana gutya, icya mbere baranywa Primus nitunava hano barakomeza banywe banamenye Bralirwa n’iri rushanwa turimo, ikindi ni uko ibi byatumye twegera abafana bacu. Nkanjye ni kenshi naririmbiye muri iri soko rya Base, ariko hari bagenzi banjye bahaje bwa mbere ku buryo uhita wumva ukuntu biba ari byiza.”

Umukunzi wa muzika witwa Biramahire Jean Nepo usanzwe acururuza muri iri soko, yabwiye IGIHE ati “Nishimye cyane, nanezerewe kubona uriya muhungu Christopher n’uriya mukobwa waririmbye yambaye ikabutura yera[yavugaga Queen Cha], numvaga baririmba muri Radio ntarababona amaso ku maso.”

Igitaramo cyatangiye saa saba z’amanywa gisozwa ahagana saa cyenda n’iminota 20.

Igitaramo kizasoza ibizenguruka igihugu, kizabera mu Mujyi wa Rubavu kuwa Gatandatu tariki ya 30 Kamena hafi y’inkengero z’ikiyaga cya Kivu ahasanzwe habera iri rushanwa.

Ubwo Christopher yaririmbiraga abakunzi be muri Centre ya Base
Abakunzi ba muzika bari baje ari benshi mu gitaramo cya Primus Guma Guma kuri Base
Igitaramo cyabereye mu isoko rya Base muri Gakenke
Queen Cha, umwe mu bakobwa bakunzwe mu muziki muri iki gihe
Ni ubwa mbere abo kuri Base bari bakiriye Primus Guma Guma
Mico The Best imbere y'abakunzi ba muzika kuri Base
Byari ibyishimo kuri bose...
Uyu mukobwa yemeje abantu ubwo yabyinanaga na MC Buryohe
Bahise bamuhemba ikirahuri cya Primus amanura ivumbi
Bari bishimye cyane...
Bahati na mugenzi we Jimmy bo muri Just Family
Abaturage muri aka gace bishimiye kwakira iri rushanwa
Igitaramo cyabaye kuri uyu wa gatandatu mbere y'ikindi gikomeye abahanzi bazakorera i Rubavu kuwa 30 Kamena
Ikimenyetso cy'uko bizihiwe...
Babyinnye ubutaka barabubabaza...

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .