Abanyarwandakazi barindwi barashakishwamo abazahagararira EAC muri Miss Career Africa

Yanditswe na Nsengiyumva Emmy
Kuya 15 Nzeri 2020 saa 10:00
Yasuwe :
0 0

Abakobwa 15 barimo abanyarwandakazi barindwi bari gushakishwamo abazahatanira ikamba rya Miss Career, izasorezwa mu Rwanda mu mpera z’uyu mwaka.

Hari hitabiriye abakobwa benshi bo mu bihugu bitandukanye bya Afurika y’Iburasirazuba, hatoranyijwe 15 kuko aribo bari bujuje ibisabwa n’iri rushanwa.

Akanama nkemurampaka ka Miss Career Africa kajya gutoranya aba bakobwa nk’uko bisanzwe kagendeye ku bintu bitandukanye birimo; uburyo umushinga wakoreshwa mu gace cyangwa igihugu uhatana aturukamo, akamaro umushinga wagirira sosiyete muri rusange n’uburyo umushinga wabyarira nyirawo inyungu no kubyaza umusaruro ubufasha wahabwa.

Hari kandi ibisubizo umushinga waba uzanye, ugereranyije n’ibibazo bitandukanye byugarije abantu muri rusange ndetse n’ubwenge cyangwa ubushobozi nyir’umushinga abufiteho n’ihanga ry’udushya n’umwihariko w’umushinga, ugereranyije n’indi ijya gusa cyangwa ihuje nawo.

Abakobwa batoranyijwe barimo barindwi bo mu Rwanda, babiri bo mu Burundi, batatu bo muri Kenya umwe wo muri Tanzania ndetse na babiri bo muri Uganda.

Aba bose bagiye mu ijonjora rizakorerwa kuri internet (online voting) rizamara ukwezi. Icumi bazagira amajwi menshi, bazahurira n’abandi b’uturere twa Afurika i Kigali mu Ugushyingo uyu mwaka.

Abakobwa babashije gutambuka bandikiwe ubutumwa bubamenyesha bugira buti “Ubu ngubu Isi yose igiye kumenya ko watoranyijwe mu kindi kiciro cya Miss Career Africa 2020. Wagaragaje umushinga wawe neza ku buryo byanyuze akanama nkemurampaka,none nicyo gihe ngo umenyeshe inshuti, n’umuryango ko wakomeje ndetse ko bagomba kugushyigikira bagutora kuri internet.”

Miss Career Africa yari imaze kugira aba abakobwa 23 bitegura kuza i Kigali mu Ugushyingo2020, barimo 10 bo muri Afurika y’Iburengerazuba, 10 bo Muri Afurika y’amajyepfo na batatu bo muri Afurika y’Amajyaruguru.

Miss Career Africa ifite intego y’imyaka 30, aho nibura abakobwa 450 000 bazaba bamaze kuvamo ba rwiyemezamirimo bato, abahanga mu mirimo n’inganda zitandukanye muri Afurika.

Rizajya riba hasimbukwe umwaka umwe ryongere kuba. Ku ikubitiro Miss Career Africa 2020 azatorerwa mu Rwanda mu birori bikomeye bizaba ku wa 27 Ugushyingo 2020, ibi birori bizabanzirizwa n’umwiherero; mu gihe mu 2022 iri rushanwa rizabera muri Nigeria.

Hazatorwa uzahiga abandi abe ariwe ugirwa Miss Career Africa 2020, mu gihe hazatangwa andi makamba arimo nka Miss Speaker, Miss Technology, Miss Hospitality, Miss Science, Miss Talent na Miss Art.

Irushanwa rya Miss Career Africa ntabwo rigendera ku bwiza ahubwo bareba umushinga w’umukobwa, kuko icyo bagamije ni uguteza imbere igitsinagore kurusha ibindi byose.

Ibisabwa mu bashaka guhatana ni ukuba uri hagati y’imyaka 18-24, uri umushabitsi wasoje amashuri yisumbuye cyangwa wiga muri kaminuza unabarizwa muri Afurika.

Abakobwa 15 bo muri Afurika bagiye gutoranywamo abazaza muri Miss Career Africa 2020 mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .