00:00:00 IGIHE NETWORK KN KINYARWANDA EN ENGLISH FR FRANCAIS

Abakobwa bari muri Miss Rwanda bashyizwe mu matsinda; menya impamvu

Yanditswe na Uwiduhaye Theos
Kuya 10 Werurwe 2021 saa 02:40
Yasuwe :
0 0

Abakobwa 20 bari mu irushanwa rya Miss Rwanda bashyizwe mu matsinda atanu, mu rwego rwo gukomeza gusigasira umuco no kubafasha gukora uturimo dutandukanye mu mwiherero.

Aba bakobwa bashyizwe mu itsinda ririmo iryiswe Gukunda Igihugu; ribarizwamo Akaliza Hope, Teta Hence, Umutoni Witness na Kabagema Laila. Irya kabiri ryiswe Ubupfura ririmo Akaliza Amanda, Grace Ingabire, Kayirebwa Marie Paul na Uwankusi Nkusi Linda.

Irya gatatu ryahawe izina rya Gukunda umurimo ririmo Uwase Phiona, Ishimwe Sonia, Musango Nathalie na Uwase Kagame Sonia. Irya kane ni Ubumwe ririmo Umutesi Lea, Esther Ingabire , Gaju Evelyne na Karera Chryssie.

Irya gatanu ari naryo rya nyuma ryiswe Kubaha Imana ririmo Isaro Rolitha Benitha, Umutoniwase Sandrine, Teta Keza Lalissa na Isheja Morella Kayitare.

Ishimwe Dieudonné ukuriye Rwanda Inspiration Back Up itegura Miss Rwanda, yabwiye IGIHE ko aya matsinda agamije gukomeza gutoza aba bakobwa umuco n’indangagaciro.

Ati “Ni amatsinda bakoreramo ibintu byinshi bitandukanye rero irushanwa rya Miss Rwanda nk’irushanwa rishyira imbere umuco n’indangagaciro zawo niho twahereye duha amazina ameze gutya amatsinda. Izi ni indangagaciro z’abanyarwanda. Nizo zigomba kuranga buri Munyarwanda ni nayo mpanvu ariyo mazina twahisemo.”

Yakomeje avuga ko mu marushanwa mpuzamahanga bakoresha amazina y’amatsinda atandukanye bakaba bakwita itsinda nka Green Team [icyatsi], Yellow [umuhondo] n’andi bo bakaba barahisemo kuyita indangagaciro nyarwanda bizanatuma na benshi bazimenya.

Buri mukobwa yagiye atombora itsinda ajyamo ntabwo bashyizwemo n’abategura Miss Rwanda.

Aya matsinda azafasha gukora ibikorwa bitandukanye nk’ibiganiro mpaka ndetse bazajya bagabana imirimo irimo gutegura ifunguro rya mu gitondo, gukora isuku aho barara n’ibindi.

Ku wa 06 Werurwe 2021 abakobwa 20 ni bo batoranyirijwe kwinjira mu mwiherero w’Irushanwa rya Miss Rwanda mu 2021, mu gushaka uzambikwa iri kamba rifitwe na Nishimwe Naomie urimaranye umwaka.

Igikorwa cyo guhitamo abakobwa 20 b’uburanga, umuco n’ubwenge cyabereye mu Intare Conference Arena i Rusororo.

Aba bakobwa batoranyijwe muri 37 bari bageze mu cyiciro kibanziriza icya nyuma. Mu ijonjora ry’ibanze, abakobwa 413 ni bo biyandikishije, binyuze mu buryo bw’ikoranabuhanga, aho batanze amashusho yerekana imishinga yabo.

Uburyo bwo guha amahirwe umukobwa muri iri rushanwa nta cyahindutse, abifashisha ubutumwa bugufi ni ukujya ahandikirwa ubutumwa bugufi, ukandika ijambo MISS ugasiga akanya, ugashyiraho nimero y’umukobwa utoye hanyuma ukohereza kuri 1525. Gutora binyuze kuri internet bikorerwa ku rubuga rwa IGIHE.com.

Uzegukana ikamba rya Miss Rwanda azahabwa imodoka nshya ya Hyundai Creta izatangwa na Hyundai Rwanda.

Azajya ahembwa ibihumbi 800 Frw ku kwezi azatangwa na Miss Rwanda Organization. Ni ukuvuga ko mu mwaka azamarana ikamba, azahabwa 9.600.000 Frw, azahabwa kandi buruse yo kwiga muri Kaminuza ya Kigali n’ibindi.

Abandi barimo ibisonga bazahabwa ibindi bihembo bitandukanye ndetse buri wese wageze mu mwiherero yemerewe kwiga kuri buruse ya Kaminuza ya Kigali.

Reba ikiganiro cy’itsinda rya mbere, aho buri mukobwa yagiye yisobanura mu buryo butandukanye

Mu byo bigishirizwa mu mwiherero, harimo no kubyina bya kinyarwanda
Muri aya matsinda bazigiramo no gukora imirimo itandukanye irimo n'iyo mu gikoni
Aya matsinda agamije gukomeza kwimakaza umuco n'indangagaciro nyarwanda
Bashyizwe mu matsinda baherwamo ibiganiro bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .