Abakobwa batandatu batoranyirijwe guserukira Amajyaruguru muri Miss Rwanda 2020 (Amafoto na Video)

Yanditswe na Ishimwe Israel, Uwiduhaye Theos
Kuya 28 Ukuboza 2019 saa 04:43
Yasuwe :
0 0

Nyuma y’Intara y’Uburengerazuba, ijonjora ry’ibanze mu gushaka abakobwa bazavamo uzambikwa ikamba rya Nyampinga w’u Rwanda 2020 ryakomereje mu Majyaruguru y’u Rwanda, ahatoranyirijwe abakobwa batandatu.

Iki gikorwa cyabereye muri La Palme Hotel mu Karere ka Musanze kuri uyu wa Gatandatu, tariki ya 28 Ukuboza 2019.

Muri iyi ntara yegereye agace k’Ibirunga hiyandikishije abakobwa 75, muri bo 24 ni bo bageze aho igikorwa cyabereye mu gihe 14 ari bo banyuze imbere y’akanama nkemurampaka kahisemo batandatu bemerewe gukomeza mu kindi cyiciro.

Aba bari b’uburanga bahataniye ikamba ry’uzasimbura Nimwiza Meghan ufite iry’umwaka wa 2019.

Mu bakatishirije itike mu Karere ka Musanze harimo Mukabashambo Phionah uvukana na Mushambokazi Jordan na we witabiriye Miss Rwanda 2018 agendeye ku itike y’Intara y’Amajyepfo na Mukangwije Rosine ufite ikamba rya Miss Elegancy Rwanda 2018.

Mu Karere ka Musanze, Miss Rwanda ihafite amateka kuko havuye abakobwa barimo Kabahenda Ricca Michaella wabaye Nyampinga w’Umurage muri iri rushanwa umwaka ushize; Teta Mugabo Ange, Gaju Anitha, Munezero Adeline na Ishimwe Bella n’abandi.

Aka gace ni nako kibarutse Umuhoza Sharifa wabaye Nyampinga wagize igikundiro kurusha abandi akanambikwa ikamba ry’Igisonga cya Kane muri Miss Rwanda mu 2016.

UKO IGIKORWA CYAGENZE:

Andi mafoto y’uburanga bw’abakobwa bazahagararira Intara y’Amajyaruguru muri Miss Rwanda 2020

-  Tumuhorane Blaise (No 13)

-  Mukabashambo Phionah (No 8)

-  Mukangwije Rosine (No 14)

-  Umubyeyi Natacha (No 1)

-  Urujeni Melissa (No 9)

-  Umuhoza Doreen (No 3)

19:30: Igikorwa cyo guhitamo abakobwa b’uburanga bazahagararira Intara y’Amajyaruguru kigeze ku musozo. Batandatu ni bo batoranyijwe, biyongera ku bandi batandatu batorewe mu Karere ka Rubavu mu mpera z’icyumweru gishize.

Abakobwa batandatu ni bo batoranyirijwe guserukira Intara y'Amajyaruguru muri Miss Rwanda 2020

-  Amarira y’ibyishimo

Nyuma yo gutangazwa kw’abakobwa batandatu bazakomeza mu kindi cyiciro, abakobwa bakomeje bakiriye iyo nkuru neza, bagwana mu byano mu gihe abandi bihanganishanyaga nyuma yo kudahirwa n’amahirwe yo gukomeza.

Hari bamwe byarenze basuka amarira y’ibyishimo! Umuhoza Doreen wahamagawe bwa mbere [agahabwa PASS] yagaragaje akanyamuneza birenze igipimo birangira asutse amarira imbere y’abagize Akanama Nkemurampaka na bagenzi be bari bahatanye.

Byasabye ko bagenzi be ndetse na Miss Mutesi Jolly bagerageza kumuhoza kugira ngo igikorwa cyo gutangaza abakomeje gikomeze.

Ku wa 28 Ukuboza 2019, Umuhoza Doreen wahamagawe bwa mbere mu bakobwa bemerewe guhagararira Intara y’Amajyaruguru muri Miss Rwanda 2020 yahise asuka amarira menshi
Yananiwe kwakira ko yahamagawe ku mwanya wa mbere mu bemerewe gukomeza
Miss Mutesi Jolly ari mu begereye Umuhoza Doreen amutera ingabo mu bitugu, amubwira amagambo y'ihumure
Byari ibyishimo ku bakomeje mu kindi cyiciro
Bagwanye mu byano bishyira kera...

-  Amazina y’abakobwa batandatu b’ubwiza bazahagararira Amajyaruguru

1. Tumuhorane Blaise (No 13)

2. Mukabashambo Phionah (No 8)

3. Mukangwije Rosine (No 14)

4. Umubyeyi Natacha (No 1)

5. Urujeni Melissa (No 9)

6. Umuhoza Doreen (No 3)

-  Abakobwa bazahagararira Amajyaruguru bagiye gutangazwa

19: 15: Nyuma y’iminota isaga 17 abagize Akanama nkemurampaka biherereye, bahamagaye abalobwa bose, kuri ubu hagiye gutangazwa abakomeje mu cyiciro gikurikiraho.

Martina Shami ukora kuri KC2 wari uyoboye ijonjora ryabereye i Musanze ubwo yahamagaraga abakobwa mbere yuko hatangazwa abakomeje
Nyampinga w'u Rwanda 2019, Nimwiza Meghan areba uko abakobwa bahataniye kuzamusimbura bitwara imbere y'abagize Akanama Nkemurampaka

-  Abakobwa benshi baje batiteguye!

Abakobwa 14 bose banyuze imbere y’akanama nkemurampaka bari bahuriye ku kintu kimwe cyo kuba bagaragazaga ubwoba bwinshi ndetse kuza batiteguye bigatuma badasobanura imishinga yabo uko byagakwiye.

Hafi ya bose wabonaga bafite igishyika ku buryo uwitwa Urujeni Melissa we yageze imbere y’akanama nkemurampaka asabwa kubanza gusubira mu rwambariro akabanza akitegura neza.

18:50: Abakobwa 14 bose bagombaga kunyura imbere y’akanama nkemurampaka barasoje. Abakagize bagiye kwiherera bateranye amanota mbere yo gutangaza abakobwa b’uburanga bakomeje mu kindi cyiciro.

18:39: Mukangwije Rosine areshya na metero 1.70 akagira ibilo 61 (No 14). Ni we wa nyuma wanyuze imbere y’abagize Akanama Nkemurampaka. Yavuze ko ashaka kuba Nyampinga bitewe n’icyizere yifitiye.

Ati “Icyo nashyizeho umutima wanjye, ni umushinga wanjye ugamije guteza imbere kwikorera by’umwihariko mu rubyiruko. Nafasha abakiri bato kwikorera ku buryo bakwiteza imbere.’’

Mukangwije wambwitswe ikamba rya Miss Elegancy Rwanda 2018. Miss Mutesi Jolly yamubajije icyo yarikoresheje, asubiza ko "Nagiriwe icyizere kuko natanze umushinga wo guteza imbere abana bo ku muhanda. Nagiye Kimironko, mpura n’umuryango ufite ikibazo cy’abana batiga, nafatanyije n’ubuyobozi, turafatanya tubasabira ko bashyirwa mu cyiciro cya Mbere, natwe tubaha ibihumbi 120 Frw.’’

18:29: Tumuhorane Blaise ureshya na metero 1.71 n’ibilo 61 (No 13). Yavuze ko azita ku kibazo cy’abana baterwa inda zitateguwe.

Ati “Naba inshuti n’abana nkajya mbaganiriza cyane kuko bashobora gufunguka bakavuga. Nanjya ntanga inama nkoresheje imbuga nkoranyambaga na Televiziyo y’u Rwanda nkagera kuri benshi.’’

Ni we mukobwa wa mbere wavuze mu rurimi rw’Icyongereza. Yabajijwe icyo ihame ry’uburinganire n’ubwuzuzanye bivuze kuri we.

Miss Mutesi Jolly yamusabye gukoresha ururimi yiyumvamo ahita yongera kuvuga mu Kinyarwanda.

-  Mike Karangwa, Evelyne Umurerwa na Miss Mutesi Jolly baracyayoboye Akanama Nkemurampaka ko mu ijonjora rya Miss Rwanda 2020.

Abanyamakuru Mike Karangwa, Evelyne Umurerwa na Miss Rwanda 2016 Mutesi Jolly bakomezanyije n’ijonjora ryo gushakisha umukobwa uzegukana ikamba rya Nyampinga w’u Rwanda 2020, aribo bagize akanama nkemurampaka.

Aba basimbuye akanama nkemurampaka kazengurutse umwaka ushize mu ijonjora ryanyuze mu ntara zitandukanye z’u Rwanda n’Umujyi wa Kigali. Mutesi Jolly ni we wenyine wakagarutsemo.

Aka kanama nkemurampaka katanze amanota mu majonjora umwaka ushize kari kagizwe n’Umunyamakuru Michelle Iradukunda, Jolly Mutesi wabaye Nyampinga w’u Rwanda mu 2016 na Uwase Marie France.

Umurerwa Evelyne amaze imyaka isaga 20 mu mwuga w’itangazamakuru, ari mu batoye ba Nyampinga muri Kaminuza y’Imari n’Ubukungu (SFB) mu gihe Mike Karangwa na we afite ubunararibonye bw’imyaka 12 mu bijyanye n’amarushanwa y’ubwiza.

Uhereye ibumoso: Miss Mutesi Jolly, Mike Karangwa na Umurerwa Evelyne bari bafite akanyamuneza
Uhereye ibumoso: Umurerwa Evelyne, Mike Karangwa na Miss Mutesi Jolly ni bo bagize akanama nkemurampaka

-  Nta mukobwa wahataniye muri Miss Rwanda indi myaka washakishirije amahirwe i Musanze

Mu bakobwa 14 bagomba kuvamo abazahagararira Amajyaruguru muri Miss Rwanda 2020 nta mukobwa witabiriye iri rushanwa mu myaka yashize wigeze ahagaragara.

Bitandukanye n’ijonjora ryabereye mu karere ka Rubavu mu Burengerazuba ku wa 22 Ukuboza 2019 kuko ho hagiye kwiyamamariza abakobwa babiri bari baritabiriye irushanwa rya Miss Rwanda 2018.

Abakobwa bitabiriye Miss Rwanda 2018 bagaragaye mu ijonjora ryabereye muri Rubavu ni Mbabazi Doreen na Uwase Aisha, uyu ni na we wagize amahirwe yo gukomeza.

Uyu mwaka harimo impinduka kuko nta n’umukobwa watsinzwe mu ntara wari kujya kwiyamamariza mu yindi.

18:17: Mushimiyimana Sandra wambaye nimero 11 yabajijwe impamvu ishobora gutuma aba nyampinga avuga ko ikintu cya mbere ari uko yiyizera.

Ati “Mu buzima iyo wiyizera ibintu byose wabishobora kandi wabigeraho.”

Mike yamuhaye Yes ariko avuga ko ‘Nguhaye ‘Yes’ ariko ntabwo nzi impamvu nyiguhaye.’

-  Ikinyarwanda cyashyizwe imbere muri Miss Rwanda 2020

Mu bakobwa bose 11 bamaze kunyura imbere y’Akanama Nkemurampaka nta numwe urasubiza mu rundi rurimi usibye Ikinyarwanda. Bose bari gusabwa gukora amahitamo y’ururimi bifuza, bagahuriza ku rwa gakondo yabo, aho bashobora kwisobanura neza nta nkomyi.

Ugereranyije n’indi myaka yabanje, ubu Ikinyarwanda cyitaweho cyane ku buryo ku buryo umukobwa asabwa kuba azi Ikinyarwanda mu gihe kumenya urundi rurimi byaba akarusho.

Ubusanzwe mu mategeko y’irushanwa bavugaga ko umukobwa agomba kuba azi Ikinyarwanda n’urundi rurimi muri eshatu z’amahanga zemewe mu Rwanda.

Mu minsi ishize umuyobozi wa Rwanda Inspiration Back Up, Ishimwe Dieudonne, yabwiye IGIHE ko aribyo koko iryo bwiriza ryahinduwe.

Ati “Ni mu rwego rwo guha agaciro ururimi rwacu ariko nanone no gufasha umukobwa kwisobanura uko ashaka mu gihe umushinga we waba uri mu rurimi kavukire. Indimi z’amahanga ntabwo tuzikuyeho ariko noneho ntabwo tubujije n’utazizi, abakobwa bose bahawe amahirwe. Ikinyarwanda ni cyo cy’ingenzi, izindi ndimi zizakoreshwa ku mahitamo y’uhatana.”

Yavuze ko mu gutanga amanota hazitabwa cyane ku byo umukobwa avuga, ubwiza n’umuco.

Ubusanzwe umukobwa yasabwaga kuba azi Ikinyarwanda n’urundi rurimi rumwe rw’amahanga, uburyo abahatana bitwaraga mu ndimi z’amahanga byatumye benshi bibaza impamvu abategura Miss Rwanda bazibandaho nyamara hashobora gukoreshwa ururimi kavukire, aha bagaraazaga ko icyingenzi ari ikiri mu muntu atari ururimi akivugamo.

Umwe mu bagize icyo bavuga ku ikoreshwa ry’indimi z’amahanga ni Ange Kagame,ubwo hasozwaga Miss Rwanda 2019 yagaragaje ko gukoresha Ikinyarwanda gusa muri iri rushanwa byaba bihagije.

Icyo gihe yagize ati ”Kuvuga mu Kinyarwanda byaba bihagije. Mu irushanwa rya Miss Universe baba bafite abasemuzi, basobanurira abatavuga Icyongereza, wakongeraho ibibazo ubwabyo bibajijwe mu Cyongereza cya ntacyo”.

Igitekerezo cya Ange Kagame cyakiriwe neza n’abamukurikira kuri Twitter, urebye uburyo abategura irushanwa babihinduye basa n’abemeranya neza n’ibitekerezo bya benshi bifuzaga ko Miss Rwanda yajya ikorwa mu Kinyarwanda gusa.

-  Abakobwa bari guhabwa amanota hashingiwe ku bashimwe ubwenge, umuco n’ubwiza batoranywamo abakomeza mu kindi cyiciro.

18:05: Urujeni Melissa yavuze ko ikintu cya mbere cyatumye aza muri Miss Rwanda 2020 ari uko yigiriye icyizere.

Uyu mukobwa yari yagize ubwoba abwirwa kubanza kujya hanze akongera akagaruka bwashize, ahita abazwa ibyiza nyaburanga bitatu yashishikariza umuntu gusura Musanze ngo abirebere; mu gusubiza avugamo umusozi wa Bisoke n’Ingagi zo mu Birunga.

Yashimiye Jolly kubera ukuntu yitwaye muri Miss Rwanda 2016 ubwo yabaga Nyampinga w’u Rwanda ndetse no muri Miss World avuga ko ari urugero rwiza rw’umukobwa wigiriye icyizere afatiraho urugero akaba yafatiranye umwanya yari abonye ngo abimubwire.

-  Uburanga bw’abakobwa biyamamarije mu Karere ka Musanze

18:00: Ishimwe Wivine w’imyaka 18 arangije amashuri yisumbuye mu ishami ry’ubukerarugendo.

Yabajijwe impamvu ikomeye ituma abona ko akwiriye Miss Rwanda 2020, mu gusubiza ati “Ni uko nshoboye, kandi nkaba naba ijwi rya bagenzi kandi nkaba numva ko twafatanya n’igihugu tukiteza imbere nk’urubyiruko. Nabafasha kwihangira imirimo bakiteza imbere. Mu rubyiruko harimo ikibazo cy’ubushomeri, kandi iyo gihari nibwo usanga abantu babashukisha utuntu tw’amafuti.”

17:58: Mukabashambo Phionah afite imyaka 19 wambaye nimero umunani, yiga mu mwaka wa mbere wa kaminuza mu ishami ry’amategeko.

Yavuze ko “Ikintu numva cyatuma mba nyampinga w’u Rwanda ni icyizere nifitiye. Icyizere kirava mu mutwe wanjye n’ibyo nize.’’

Ntabwo iki gisubizo cye cyanyuze akanama nkemurampaka yongera kubazwa ikintu gifatika azakora abaye nyampinga w’u Rwanda 2020.

Ati “Impamvu numva naba nyampinga w’u Rwanda 2020 ni uko hari icyo nshaka kumarira igihugu ku iterambere rusange ndetse nkaba mfite umushinga ujyanye no guhangana n’igwingira ry’abana bari munsi y’imyaka itanu.”

17:42: Umukobwa witwa Uzarama Tetero Marie Ange wambaye nimero zirindwi yageze imbere y’akanama nkemurampaka.

Afite umushinga ujyanye no ‘Gufasha abana b’abakene biga mu mashuri yisumbuye, bajya babura amafaranga yo kwishyura amafunguro.’

Yahawe ‘No’ eshatu n’abagize akanama nkemurampaka agenda ubona icyizere cyo gukomeza ari gike.

Yasabye akanama nkemurampaka kumugirira ibambe agakomeza, ariko bose bavuga ko batatwarwa n’amarangamutima ngo bamuhe ‘Yes’ kandi ntayo akwiye.

Mike Karangwa ati “Ni ubwa mbere bimbayeho, ni byiza kuba wafashe umwanya ukaza hano ariko ntabwo byakunda.”

17:32: Mukeshimana Yvette yageze imbere y’Akanama Nkemurampaka amurika umushinga we wo ‘Kudaheza abantu bafite ubumuga bw’uruhu.’

Yavuze ko impamvu yahisemo uyu mushinga ari uko yaganiriye n’abantu bafite ubumuga bakamubwira ko akenshi batisanga mu muryango Nyarwanda.

Ati “Mpagaze aha, nabashije kuganira nabo n’ubwo atari benshi ariko nasanze abenshi batigirira icyizere, ikindi twebwe muri sosiyete ntabwo tubafata nk’abantu basanzwe. “

Yabajijwe urugero yatanga rugaragaza ko koko iki ari ikibazo gikwiriye kuraza ishinga benshi, asubiza ko yaganiriye na benshi bafite ubu bumuga akabona ko bafite ibibazo byinshi.

Ati “Icyo kibazo kirahari, uwo twaganiriye yampaye amakuru amwe n’amwe. Hari ikibazo cy’uko sosiyete itabafata nk’abantu basanzwe ikindi ni ikibazo cy’imikorere.”

-  Miss Rwanda 2020 yatewe inkunga n’abafatanyabikorwa batandukanye

Miss Rwanda 2020 yatewe inkunga n’abaterankunga batandukanye barimo Sosiyete y’Ubucuruzi ya Multi Design Group Ltd itanga serivisi zitandukanye zirimo kugena agaciro k’imitungo, gucunga imitungo itimukanwa, gukora no gucunga imishinga n’ibindi; MTN Rwanda itanga serivisi z’itumanaho; Uruganda rurangajwe imbere no kugira impinduka mu mibereho y’abantu rwa Africa Improved Foods; Ecobank itanga serivisi z’imari; East African Promoters (EAP) itegura ibitaramo n’abandi.

MTN Rwanda iri mu baterankunga b'imena ba Miss Rwanda 2020
Banki y'Ubucuruzi ya Ecobank iri mu baterankunga bashya ba Miss Rwanda 2020
Imideli yahanzwe n’umunyamideli Shiny Abdallah yiswe ‘Mr. Endowed’ nayo iri mu bigo byaherekeje Miss Rwanda 2020

17:24: Umuhoza Doreen ureshya na metero 1.70, ibilo 43 na nimero eshatu. Imbere y’Akanama Nkemurampaka yagaragaje ko afite umushinga ujyanye n’urubohero kandi akaba ashaka kubihuza na ‘Made Rwanda’.

Yavuze ko ‘Icyo gukorwa kizajya kijyamo abakobwa bakiri bato. Ikibazo nshaka gukemura ni ubukene buri mu bana bato b’abakobwa bacikirije amashuri. Nshaka ko bakwibumbira hamwe bakajya bagafatanya.’

Akomeza yemeza ko bazivana mu bukene biciye muri urwo rubohero.

Uyu mukobwa yahawe ‘No’ ebyiri zirimo iya Mike Karangwa na Umurerwa Evelyne bavuze ko atari gusobanura umushinga we neza.

Mutesi Jolly we avuga ko n’ubwo afite ubwoba kandi akaba ari guhuzagurika asobanura umushinga we amwifuriza ibyiza ndetse amuha ‘Yes’.

-  Amazina y’abakobwa bemerewe kunyura imbere y’Akanama Nkemurampaka

1. Ishimwe Grace areshya na metero 1.70, afite ibilo 56 (No 2)

2. Mukangwije Rosine areshya na metero 1.70 akagira ibilo 61 (No 14)

3. Muteteri Joselyne, areshya na 1.77, afite ibilo 54 (No 12)

4. Mukabashambo Phionah afite metero 1.70, akagira ibilo 55 (No 8)

5. Urujeni Melissa areshya na metero 1.75 ibilo 64 (No 9)

6. Munezero Ella Irma Pierrine areshya na metero 1.75, afite ibilo 65 (No 4)

7. Umubyeyi Natacha afite uburebure bwa metero 1.71 n’ibilo 56 (No 1)

8. Tumuhorane Blaise ureshya na metero 1.71 n’ibilo 61 (No 13)

9. Mushimiyimana Sandra areshya na metero 1.71 n’ibilo 61 (No 11)

10. Ishimwe Vivine areshya na metero 1.70, ibilo 61.5 (No 10)

11. Zaninka Denise afite uburebure bwa metero 1.70, ibilo 48 (No 5)

12. Uzarama Tetero Marie Ange ureshya na metero 1.70, ibilo 62 (No 7)

13. Umuhoza Doreen areshya na metero 1.70, afite ibilo 43 (No 3)

14. Mukeshimana Yvette afite uburebure bwa 1.70, ibilo 56 (No 6)

17:03: Ishimwe Grace yatangiye avuga ibisekuru bye, kugeza nko ku gisekuru cya karindwi. Yize Ibinyabuzima, Ibinyabutabire n’Ubumenyi bw’Isi.

Uyu mukobwa w’imyaka 19, yavuze ko yigiriye icyizere nyuma yo kureba abamubanjirije agasanga nta kibazo kibirimo. Ati “Uburanga, ubwenge n’umuco nanjye ndabifite.’’

16:57: Umukobwa Umubyeyi Natasha w’imyaka 18 ni we wa mbere wakandagiye imbere y’Akanama Nkemurampaka.

Mike Karangwa yatangiye amubaza ururimi yahitamo gukoresha. Ahitamo gukoresha Ikinyarwanda.

Yavuze ko “Yahisemo kwiyandikisha mu Ntara y’Amajyaruguru. Nashishikariza urubyiruko kwihangira imirimo. Mbaye Nyampinga naharanira kujya inama yo kubabwira guhanga imirimo.

16:50: Abagize Akanama Nkemurampaka bageze mu cyumba kigiye kuberamo amajonjora

Martina Shami ukora KC2, Ishami rya kabiri rya Televiziyo y’u Rwanda ni we ugiye kuyobora igikorwa cyo guhitamo abazitabira Miss Rwanda 2020. Yakiriye abagize akanama nkemurampaka barimo Umurerwa Evelyne, Mike Karangwa na Miss Mutesi Jolly.

-  Abakobwa 14 ni bo banyura imbere y’Akanama Nkemurampaka

Mu Ntara y’Amajyaruguru hiyandikishije abakobwa 75, muri bo 23 ni bo bageze ahabereye ijonjora mu gihe 14 aribo bemerewe kunyura imbere y’akanama nkemurampaka, nyuma yo gusuzumwa bagasanga bujuje ibisabwa.

-  Ibisabwa umukobwa ngo abashe kwiyandikisha muri Miss Rwanda 2020

- Kuba ari Umunyarwandakazi

- Kuba afite imyaka hagati ya 18 na 24

- Kuba yararangije amashuri yisumbuye

- Kuba avuga neza Ikinyarwanda. (Kuba azi urundi rurimi rwiyongera ku rurimi kavukire mu zemewe n’amategeko mu Rwanda nabyo biremewe)

- Kuba afite uburebure guhera kuri 1,70 m

- Kuba afite BMI iri hagati ya 18.5 na 24.9

- Kuba atarigeze abyara

- Kuba yiteguye kuguma mu Rwanda byibuze mu gihe cy’umwaka nyuma yo gutorwa nka Nyampinga

- Ntagomba gushyingirwa cyangwa gushinga urugo mu gihe akiri Nyampinga

- Kuba yiteguye guhagararira u Rwanda ahantu hose n’igihe cyose abisabwe cyangwa biri ngombwa

- Kuba yiteguye gukurikiza no kubahiriza amahame yose n’amabwiriza agenga ba Nyampinga

-  Abakobwa bose banditswe bagomba kuba bitwaje indangamuntu igaragaza umwirondoro wabo n’indangamanota cyangwa ikindi cyangombwa kigaragaza ko basoje amashuri yisumbuye.

16:16: Abakobwa batangiye gupimwa uburebure n’ibilo mbere yo kwemererwa kwinjira mu banyura imbere y’akanama nkemurampaka.

Abakobwa batandukanye ubwo bari mu cyumba bategereje gutanga imyirindoro yabo

Urugendo rwo gushakisha umukobwa uzegukana ikamba rya Nyampinga w’u Rwanda 2020 rwatangiriye i Rubavu mu Burengerazuba bw’u Rwanda ku wa 21 Ukuboza 2019.

Abakobwa batandatu ni bo batoranyijwe guhagararira aka gace barimo Akaliza Hope (No 7), Uwamahoro Phoebe (No 11), Uwimana Joyeuse (No 6), Umutesi Denise (No 2 ), Umuratwa Anitha (No 10) na Uwase Aisha (No 1).

Abakobwa batandatu b'uburanga babonye itike yo gukomeza mu kindi cyiciro cyo guhatanira Miss Rwanda 2020

Nyuma ya Musanze biteganyijwe ko ibikorwa by’ijonjora ryo guhitamo Nyampinga w’u Rwanda bizabera mu Karere ka Huye mu Ntara y’Amajyepfo ku wa 4 Mutarama 2020. Rizava muri aka gace ryerekeza i Burasirazuba mu Karere ka Kayonza ku wa 11 Mutarama 2020 mbere yo gusorezwa i Kigali ku wa 18 Mutarama 2020.

Igikorwa cya Miss Rwanda kizasozwa tariki 22 Gashyantare 2020 aribwo hazamenyekana uwegukanye ikamba rya Nyampinga w’u Rwanda 2020 asimbuye Nimwiza Meghan ufite irya 2019.

-  Ibyo wamenya ku Ntara y’Amajyaruguru

Intara y’Amajyaruguru ni igicumbi cy’ahantu nyaburanga. Iza ku ruhembe rw’izisurwa cyane na ba mukerarugendo ikabafasha kwishimira ibihe bagirira mu Rwanda.

Amajyaruguru ari ku buso bwa 3293.3 km2, ahana imbibi na Repubulika Iharanira Demokarasi ya Congo na Uganda. Ni intara igizwe n’uturere dutanu, imirenge 89, utugari 414 n’imidugudu 2744.

Iyi ntara ikungahaye ku buhinzi n’ubworozi, uburobyi, ubukerarugendo n’ubucukuzi bw’amabuye y’agaciro arimo Zahabu iboneka muri Gicumbi na Burera, Coltan (Rulindo na Gakenke), Wolfram (Rulindo na Burera) na Gasegereti.

Ikundirwa ibirimo Pariki y’Ibirunga icumbikiye ingagi zo mu misozi miremire, Buhanga Eco– park ndetse n’Ibirunga bya Muhabura, Gahinga na Sabyinyo.

Akarere ka Musanze kabarizwamo hoteli zisaga 32, ziganjemo iz’abaturage bahavukiye, abapadiri, ababikira n’abandi.

Ijonjora ryo guhitamo Miss Rwanda 2020 ryakomereje mu Karere ka Musanze mu Ntara y'Amajyaruguru

-  Impumeko y’i Musanze ahatoranyirijwe abakobwa bahiga abandi mu Majyaruguru

Amafoto: Miss Rwanda

Interviewer: Nsengiyumva Emmy

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .