Abakobwa barindwi batoranyirijwe guhagararira Amajyepfo muri Miss Rwanda 2020 (Amafoto na Video)

Yanditswe na Ishimwe Israel, Nsengiyumva Emmy
Kuya 4 Mutarama 2020 saa 03:18
Yasuwe :
0 0

Intara y’Amajyepfo iheruka ikamba rya Nyampinga w’u Rwanda mu 2012! Icyo gihe ryegukanywe na Mutesi Aurore. Imyaka igera ku munani irirenze nta mukobwa wiyamamarije muri aka gace ngo yegukane ikamba.

Kuri uyu wa Gatandatu, tariki ya 4 Mutarama 2020, ijonjora ryo guhitamo Nyampinga w’u Rwanda 2020 ryakomereje mu Karere ka Huye ahatoranyirijwe abakobwa barindwi bazahagararira Intara y’Amajyepfo.

Iri jonjora ryabereye muri Credo Hotel hafi na Kaminuza y’u Rwanda, Ishami rya Huye ahazwi nk’i Ruhande.

Urugendo rwo guhitamo Nyampinga w’u Rwanda rwatangiriye mu Karere ka Rubavu ku wa 21 Ukuboza 2019, ahatoranyirijwe abakobwa batandatu; umunsi waryo wa kabiri ryagiye i Musanze mu Majyaruguru y’u Rwanda na ho hatorwa abakobwa batandatu ku wa 28 Ukuboza 2019.

I Rubavu hatoranyirijwe Akaliza Hope, Uwamahoro Phoebe, Uwimana Joyeuse, Umutesi Denise, Umuratwa Anitha na Uwase Aisha. I Musanze havuye Tumuhorane Blaise, Mukabashambo Phionah, Mukangwije Rosine, Umubyeyi Natacha, Urujeni Melissa na Umuhoza Doreen.

Ugereranyije n’utundi duce, Intara y’Amajyepfo ni yo yiyandikishijemo abakobwa benshi, 79; mu Majyaruguru bari 75 mu gihe Uburengerazuba bari 50.

Intara y’Amajyepfo muri iyi myaka ya vuba ntiyahiriwe n’ikamba rya Miss Rwanda kuko iriheruka muri 2012 ubwo Mutesi Aurore yaritsindiraga.

Mu 2014, ikamba ryegukanywe na Akiwacu Colombe wari uhagarariye Intara y’Iburasirazuba, mu 2015 ryegukanywe na Kundwa Doriane wari uhagarariye Intara y’Amajyaruguru, 2016 ryegukanywa na Mutesi Jolly wari uhagarariye intara y’Iburengerazuba kimwe na 2017 aho Miss Iradukunda Elsa nawe yaryegukanye yariyamamarije muri iyi ntara.

Mu 2018 Iradukunda Liliane yegukanye ikamba rya Miss Rwanda yariyamamarije mu ntara y’Iburengerazuba aba uwa gatatu uryegukanye yikurikiranya ahaturutse. Umwaka ushize iri kamba ryegukanywe na Nimwiza Meghan wiyamamarije mu Mujyi wa Kigali.

Nyuma y’ijonjora rya Rubavu, Musanze na Huye mu Ntara y’Amajyepfo, biteganyijwe ko rizakomereza mu Ntara y’Iburasirazuba mu Karere ka Kayonza ku wa 11 Mutarama 2020 mbere yo gusoreza mu Mujyi wa Kigali tariki 18 Mutarama 2020.

Igikorwa cya Miss Rwanda kizasozwa tariki 22 Gashyantare 2020 aribwo hazamenyekana uwegukanye ikamba rya Nyampinga w’u Rwanda 2020 asimbuye Nimwiza Meghan ufite irya 2019.

UKO IRUSHANWA RYAGENZE:

-  Amafoto y’abakobwa bazahagararira Amajyepfo muri Miss Rwanda 2020:

1. Imanishimwe Hope Joy (No 12)

2. Musana Teta Hense (No 4)

3. Umwaliwase Claudette (No 1)

4. Igihozo Diane (No 16)

5. Ingabire Jolie Ange (No 3)

6. Umutoniwase Nadia (No 10)

7. Mumporeze Josiane (No 6)

-  Video: Umunyeshuri wiga Itangazamakuru muri UR HUYE ashaka kuba Nyampinga w’u Rwanda

-  Ibyishimo imbere ya Credo Hotel ku bashyigikiye abakobwa bakomeje!

Abantu benshi bateraniye hanze ya Credo Hotel yabereye ijonjora rya Miss Rwanda mu Majyepfo banyuzwe nuko abakobwa bari bashyigikiye bakomeje mu kindi cyiciro. Bamwe kwiyumanganya byanze bakubitwa ibitwenge by’urumenesha mu kumvikanisha ko banyuzwe n’intambwe abo biyumvamo bateye.

Abakobwa bakomeje bakimara gutangazwa bagwanye mu byano, ndetse abatagize amahirwe na bo barahoberana mu gukomeza kugaragarizanya ko mu bibi n’ibyiza, ubuzima bukomeza.

Nyuma yo gutangazwa kw'abatsinze abakobwa berekanye urugwiro

19:02: Ijonjora ryo guhitamo abakobwa bazahagararira Intara y’Amajyepfo muri Nyampinga w’u Rwanda ryasojwe. Bitandukanye no mu tundi duce ryanyuzemo, mu Karere ka Huye hatoranyijwe abakobwa barindwi mu gihe ahandi bari batandatu.

Abakobwa barindwi batoranyirijwe guhagararira Amajyepfo muri Miss Rwanda 2020

-  Abakobwa batoranyirijwe guhagararira Amajyepfo muri Miss Rwanda 2020:

1. Imanishimwe Hope Joy (No 12)
2. Musana Teta Hense (No 4)
3. Umwaliwase Claudette (No 1)
4. Igihozo Diane (No 16)
5. Ingabire Jolie Ange (No 3)
6. Umutoniwase Nadia (No 10)
7. Mumporeze Josiane (No 6)

18:55: Abakobwa bose banyuze imbere y’Akanama Nkemurampaka bagarutse mu cyumba kiri kuberamo ijonjora muri Credo Hotel. Hagiye gutangazwa abakomeje mu kindi cyiciro.

Bamwe imitima yadihaga bategereje kumva niba amazina yabo arimo mu bakomeza.

-  Imishinga yibanzweho, ibiyobyabwenge n’inda zitateganyijwe ku isonga!

Kuva irushanwa rya Nyampinga w’u Rwanda ryatangirira mu Karere ka Rubavu ku wa 21 Ukuboza 2019, abakobwa benshi banyuze imbere y’abagize Akanama Nkemurampaka bagarutse ku mishinga itandukanye. Ku isonga hari ijyanye no kurwanya ibiyobyabwenge n’inda ziterwa abangavu nka bimwe mu bibazo by’ingutu byugarije urubyiruko rw’u Rwanda bikaba binahangayikishije inzego zitandukanye.

-  Ba Nyampinga b’u Rwanda mu baherekeza irushanwa mu duce dutandukanye tw’igihugu

Irushanwa ryabereye mu Karere ka Huye ryitabiriwe n’abantu batandukanye barimo n’abambaye ikamba rya Nyampinga w’u Rwanda mu myaka yahise.

Aba barimo Nyampinga w’u Rwanda wa 2019, Nimwiza Meghan; Miss Rwanda 2018, Iradukunda Liliane na Miss Rwanda 2017, Iradukunda Elsa. Aba bose bari mu cyumba cy’ijonjora ryabereye muri Credo Hotel.

Miss Nimwiza Meghan ni we ufite ikamba rya Nyampinga w'u Rwanda 2019
Miss Iradukunda Elsa na we yari ahari
Miss Iradukunda Liliane yari afite akanyamuneza

-  Ikinyarwanda ni cyo gusa cyakoreshejwe

Abakobwa bahawe amanota hashingiwe ku bashimwe ubwenge, umuco n’ubwiza batoranywamo abakomeza mu kindi cyiciro.

Mu bakobwa bose 17 banyuze imbere y’Akanama Nkemurampaka nta numwe wavuze mu rundi rurimi usibye Ikinyarwanda. Nubwo bahawe amahitamo atandukanye ariko bose bakoresheje ururimi rwabo kavukire mu kubafasha kwisanzura.

Ugereranyije n’indi myaka yabanje, ubu Ikinyarwanda cyitaweho cyane ku buryo ku buryo umukobwa asabwa kuba azi Ikinyarwanda mu gihe kumenya urundi rurimi byaba akarusho.

Ubusanzwe mu mategeko y’irushanwa bavugaga ko umukobwa agomba kuba azi Ikinyarwanda n’urundi rurimi muri eshatu z’amahanga zemewe mu Rwanda.

Mu minsi ishize umuyobozi wa Rwanda Inspiration Back Up, Ishimwe Dieudonné, yabwiye IGIHE ko aribyo koko iryo bwiriza ryahinduwe.

Ati “Ni mu rwego rwo guha agaciro ururimi rwacu ariko nanone no gufasha umukobwa kwisobanura uko ashaka mu gihe umushinga we waba uri mu rurimi kavukire. Indimi z’amahanga ntabwo tuzikuyeho ariko noneho ntabwo tubujije n’utazizi, abakobwa bose bahawe amahirwe. Ikinyarwanda ni cyo cy’ingenzi, izindi ndimi zizakoreshwa ku mahitamo y’uhatana.”

Yavuze ko mu gutanga amanota hazitabwa cyane ku byo umukobwa avuga, ubwiza n’umuco.

Ubusanzwe umukobwa yasabwaga kuba azi Ikinyarwanda n’urundi rurimi rumwe rw’amahanga, uburyo abahatana bitwaraga mu ndimi z’amahanga byatumye benshi bibaza impamvu abategura Miss Rwanda bazibandaho nyamara hashobora gukoreshwa ururimi kavukire, aha bagaraazaga ko icyingenzi ari ikiri mu muntu atari ururimi akivugamo.

Umwe mu bagize icyo bavuga ku ikoreshwa ry’indimi z’amahanga ni Ange Kagame,ubwo hasozwaga Miss Rwanda 2019 yagaragaje ko gukoresha Ikinyarwanda gusa muri iri rushanwa byaba bihagije.

Icyo gihe yagize ati ”Kuvuga mu Kinyarwanda byaba bihagije. Mu irushanwa rya Miss Universe baba bafite abasemuzi, basobanurira abatavuga Icyongereza, wakongeraho ibibazo ubwabyo bibajijwe mu Cyongereza cya ntacyo”.

Igitekerezo cya Ange Kagame cyakiriwe neza n’abamukurikira kuri Twitter, urebye uburyo abategura irushanwa babihinduye basa n’abemeranya neza n’ibitekerezo bya benshi bifuzaga ko Miss Rwanda yajya ikorwa mu Kinyarwanda gusa.

-  Abagize Akanama Nkemurampaka bagiye kwiherera

Nyuma yo kwakira abakobwa 17 no kumva ibisobanuro batanze, abagize Akanama Nkemurampaka bagiye kwiherera mu kanya gato, bateranye amanota mbere yo gutangaza abakobwa batoranyirijwe gukomeza mu kindi cyiciro cya Nyampinga w’u Rwanda 2020.

Video: Abakobwa bari bifitiye icyizere mbere yo kugera imbere y’akanama nkemurampaka

18:15: Atete Munaba Oretha (No 17) w’imyaka 18 yiga muri Koleji ya Siyansi n’Ikoranabuhanga [yahoze yitwa KIST]. Ni we mukobwa wa nyuma wanyuze imbere y’abagize Akanama Nkemurampaka.

Mike Karangwa, Mutesi Jolly na Umurerwa Evelyne bamuhaye “No” nyuma yo kutanyurwa n’umushinga we n’ibisobanuro yawuherekesheje.

18:08: Igihozo Diane (No 16) na we yageze imbere y’Akanama Nkemurampaka asobanura umushinga we wo guhangana n’ikibazo cy’inda ziterwa abangavu.

Yabajijwe impamvu abona itera icyo kibazo yasubije ati ‘‘Abana b’abakobwa hari igihe dushaka gusa n’abandi, ikindi ni ikigare, aho nko mu mashuri ushobora gukurikiza imico yabo nyamara mutari ku rwego rumwe.’’

Ibisobanuro bye byanyuze abagize akanama nkemurampaka.

17:59: Uwimana Louise (No 15) wize Amateka, Ubukungu n’Ubumenyi bw’Isi yageze imbere y’Akanama Nkemurampaka.

Miss Mutesi Jolly yamubajije icyo yakora mu kurwanya ibiyobyabwenge byugarije urubyiruko.

Ati “Najya mbabwira ibibi byo gukoresha ibiyobyabwenge. Nakwifashisha itangazamakuru, ababyeyi babo, abaturanyi n’inshuti bakajya babazana.’’

Yavuze ko aho yakuriye yahabonye ikibazo cy’abangavu baterwa inda. Usanga aho bakurira batabwirwa byimbitse ibijyanye n’ubuzima bw’imyororokere.

Abajijwe uko yafasha abana b’abakobwa kugana ku mashuri mu kwirinda ibishobora kubagusha yagize ati “Hari abantu benshi bakurikirana umushinga wanjye kandi iyo ufite igitekerezo kizima ntiwabura ugushyigikira.

-  Abakobwa ba mbere basanze inzira yabo iharuye!

Abakobwa batambutse imbere y’Akanama Nkemurampaka ku ikubitiro bagaragarijwe ko bakiriwe neza nyuma yo gutanga ibisubizo byanyuze Mike Karangwa, Umurerwa Evelyne na Mutesi Jolly.

Nta shiti ko mu bari butambuke, hashobora kuvamo benshi mu banyuze bwa mbere imbere y’Akanama Nkemurampaka.

17:49: Naruga Susan (No 14) w’imyaka 21. Yasobanuye ko Nyampinga w’u Rwanda ari umukobwa uhagararira abandi mu gihugu. Mu byo yabajijwe ntabwo ibisobanuro yatanze byemeje abagize Akanama Nkemurampaka, bituma bose bamuha “No.’’

17:42: Iradukunda Esther Faina (No 13) utuye mu Karere ka Kamonyi yavuze ko yahisemo kwiyamamariza mu Majyepfo yamureze, yiyumvamo kandi abonye ubushobozi yayiteza imbere.

Ati “Nafasha abana b’abakobwa batwaye inda zitateganyijwe, nababera umuvugizi, nkabafasha kwihangira imirimo.’’

17:35: Imanishimwe Hope Joy (No 12). Uyu mukobwa yakuze yifuza kuba Miss Rwanda cyane ko no mu muryango we yabaye “Miss Family’’ inshuro eshatu.

Ikibazo cy’abana baterwa inda zitateganyijwe. Ngiriwe amahirwe nafasha abakobwa bahuye n’ikibazo cyo kubyara. Nabafasha nte rero? Nakwifashisha umuryango mugari, tukigisha abo babyeyi ko bakeneye kwita ku bana babo. Icyo nakora ngo ikibazo cy’ubukene gikemuke ni ukubabwira kwibumbira mu mashyirahamwe.’’

Raporo y’Ikigo cy’Igihugu cy’Ibarurishamibare ku Miturire n’Ubuzima (RDHS) yerekanye ko abangavu baterwa inda bavuye kuri 6.1% mu 2010 bagera kuri 7.3% mu 2015. Nibura umwe mu bakobwa batanu abyara atarageza imyaka 19 y’amavuko. Abana b’abakobwa batewe inda bangana na 49.6% basamye bafite imyaka iri hagati ya 12 na 17.

Imibare yo mu 2016 ya Minisiteri y’Uburinganire n’Iterambere ry’Umuryango igaragaza ko abangavu 17,500 bari hagati y’imyaka 15-17 batewe inda, bivuze ko nibura abana 47 bavukaga buri munsi.

Mike Karangwa yavuze ko ‘Ni wowe mukobwa wa mbere unshimishije. Usobanura ibintu byawe neza, ugerageza no kudusekera neza.’’

17:30: Baraka Lucky Sabine (No 11). Afite umushinga wo kwita ku bana bafite ubumuga. Yavuze ko azafatanya n’inzego zibishinzwe mu kumvisha Abanyarwanda ko abana bafite ubumuga ari abana nk’abandi bakwiye uburenganzira bwabo.

17:24: Umutoniwase Nadia (No 10) wiga Itangazamakuru n’Itumanaho muri Kaminuza y’u Rwanda, Ishami rya Huye, yitabiriye irushanwa.

Yashimye ko Ikinyarwanda cyahawe intebe mu ndimi zikoreshwa mu irushanwa ndetse igaha abakobwa umwanya wo kugaragaza uruhare rwabo mu iterambere.

Yavuze ko Akarere ka Kamonyi avukamo azagafasha kuganiriza urubyiruko no kureba icyaruteza imbere.

Ati “Nzaganiriza urubyiruko ku kwirinda ibiyobyabwenge, inda zitateganyijwe no kudakora akazi ku bushake bwarwo.’’

Ubutumwa bwe yavuze ko “Nabinyuza mu biganiro n’inama zibera mu midugudu no mu itangazamakuru ndetse no ku mbuga nkoranyambaga.’’

17:14: Irakoze Kelly Mireille (No 9) w’imyaka 19, avuka mu Karere ka Huye.

Yavuze ko intego yari afite mu 2019 yayigezeho kuko yasoje amashuri yisumbuye, ubu akomerejeho iyo kuba Nyampinga.

Yavuze ko umushinga we uzibanda ku guteza imbere ubukerarugendo bushingiye ku muco n’amateka y’u Rwanda.

Ati “Nakoze ubushakashatsi. Ijuru rya Kamonyi hari aho Umwami Ruganzu Ndoli yarahatuye ariko nta gikorwa gihari cyatuma ba mukerarugendo bahasura.’’

Yavuze ko ko azafatanya n’Ikigo cy’Igihugu cy’Iterambere (RDB) n’ibigo bitwara ba mukerarugendo mu kuhamenyekanisha.

Ati “Nzafatanya n’abaturage cyangwa urubyiruko kuba bakwihuriza hamwe bakaba bashyiraho ibikorwa bizajya bibafasha kwakira abo ba mukerarugendo.’’

Amaze kubwirwa ko afite ubwoba, yasabwe guhabwa amahirwe ya nyuma.

Mike Karangwa ati "Genda ugaruke!’’

17:07: Uwase Latifa (No 8) yabajijwe impamvu akwiye kwambara ikamba rya Nyampinga w’u Rwanda.

Ati “Ngiriwe icyizere hari umusanzu natanga ushingiye ku mushinga wanjye w’uburyo ibicuruzwa bikorerwa mu Rwanda byagezwa ku isoko ry’amahanga. Iki bazo gihari ni uko Abanyarwanda bageza ibyo bakora ku rwego mpuzamahanga. Yavuze ko hakoreshwa website, turamutse tugize website ishyirwaho ibikorerwa mu Rwanda birimo imyenda, bikagurishwa hanze byakoroha.’’

17:02: Musabyemariya Stella Marthe (No 7) w’imyaka 21 waturutse mu Karere ka Kamonyi mu Ntara y’Amajyepfo.

Umushinga wanjye uvuga ku kurwanya ruswa. Burya kurwanya ibiyobyabwenge, inda zitateganyijwe ntibyagerwaho mu gihe hatanzwe ruswa.

Uburyo nakoresha ni ukongera ibitekerezo ku byo Transparency International Rwanda ikoresha mu guhashya ruswa.

Nashishikariza urubyiruko gufatanya n’igihugu kurwanya ruswa kuko ari zo mbaraga zacyo.

16:58: Mumporeze Josiane (No 6), yaturutse mu Karere ka Nyanza. Yiga ibijyanye n’Ubukerarugendo muri Kaminuza ya UTB ku Kicukiro.

Yabajijwe ahantu yatembereza umunyamahanga kugira ngo azarugarukemo.

Yavuze ko “Nabanza kumujyana mu Rukali, mu Birunga, ku Rutare ahantu Rukara rwa Bishingwe bamutwikiye [yabivuze ashidikanya],…’’

Miss Jolly yamubwiye ko “Uburyo yasobanuye ibintu harimo gushidikanya. Ati “Ugomba kumenya neza icyo ushaka kuvuga.’’

Mike Karangwa yamuhaye ‘Yes’ avuga ko ubwiza bumeze neza, ati “Ubutaha uzagaruke witeguye neza.’’

16:52: Munyaneza Yvette (No 5) yavuze ko yiyumvamo icyizere no kuba ashoboye.

Ati “Nzumvisha urubyiruko ko rushoboye, rushoboye kuyobora. Bizatuma bagira ibitekerezo bikomeye kandi barusheho kwiteza imbere birushijeho.

Yavuze ko azagendera ku ngero z’abakobwa bafashijwe na Madamu Jeannette Kagame. Yasoje ibibazo yabajijwe anaririmba, ataka ibyiza by’u Rwanda.

-  Ibyo wamenya ku bagize Akanama Nkemurampaka

Abanyamakuru Mike Karangwa, Evelyne Umurerwa na Miss Rwanda 2016 Mutesi Jolly bakomezanyije n’ijonjora ryo gushakisha umukobwa uzegukana ikamba rya Nyampinga w’u Rwanda 2020, aribo bagize akanama nkemurampaka.

Aba basimbuye akanama nkemurampaka kazengurutse umwaka ushize mu ijonjora ryanyuze mu ntara zitandukanye z’u Rwanda n’Umujyi wa Kigali. Mutesi Jolly ni we wenyine wakagarutsemo.

Aka kanama nkemurampaka katanze amanota mu majonjora umwaka ushize kari kagizwe n’Umunyamakuru Michelle Iradukunda, Jolly Mutesi wabaye Nyampinga w’u Rwanda mu 2016 na Uwase Marie France.

Umurerwa Evelyne amaze imyaka isaga 20 mu mwuga w’itangazamakuru, ari mu batoye ba Nyampinga muri Kaminuza y’Imari n’Ubukungu (SFB) mu gihe Mike Karangwa na we afite ubunararibonye bw’imyaka 12 mu bijyanye n’amarushanwa y’ubwiza.

Uhereye ibumoso: Mike Karangwa, Umurerwa Evelyne na Miss Mutesi Jolly ni bo bagize Akanama Nkemurampaka

16:42: Musana Teta Hense (No 4) yavuze ko asanga yujuje ibisabwa ngo abe Nyampinga w’u Rwanda kuko afite ubwenge, umuco n’ubwiza.

Yasabwe kuvuga imbwirwaruhame ngufi mu gihe yaba ari kuganiriza urubyiruko rwo muri Bweramvura. Yahise avuga ijambo rishingiye ku kwihangira imirimo.

Mike Karangwa yamusabye kwiha amanota na we yiha arindwi, amusubiza ko yihaye make.

16:39: Ingabire Jolie Ange (No 3) w’imyaka 19 yize ibijyanye n’Amateka, Ubukungu n’Ubuvanganzo muri Ste Bernadette.

Yavuze ko umushinga we ushingiye ku kwigisha kwizigamira. Ati “Kuva mu bibazo birimo abaturage babana n’amatungo n’ibindi bibazo bitandukanye. Nibanze ku kuzabashishikariza kwizigamira. Nahuye n’ikibazo cyo kutagira amafaranga ahagije nsoje amashuri yisumbuye ariko nsanga ngomba kubabwira ko bakwiye kwizigamira.’’

16:31: Muziranenge Alice (No 2) ukomoka mu Karere ka Nyarugenge afite imyaka 20. Yize ibijyanye n’Ubuhinzi mu Kigo cya Kabutare.

Muziranenge yatangiye yivuga nk’intore zo ku rugerero.
Yavuze ko iri ‘‘Ni irushanwa riha amahirwe umwana w’umukobwa mu kubaka igihugu kandi rikagaragaza ko ashoboye. Uru ni urubuga rwiza rwo kwereka Abanyarwanda ibyo nshoboye.’’

Yabajijwe ibyiza nyaburanga biri mu Karere ka Huye n’ibikorwa bigaragaza iterambere byahashyizwe arondora ibirimo Ibitaro bya Kabutare, Stade Mpuzamahanga ya Huye n’ibindi byubatswe muri aka gace.

-  Urutonde rw’abakobwa bemerewe kunyura imbere y’Akanama Nkemurampaka

-  Umwaliwase Claudette (No 1) afite metero 1.72

-  Muziranenge Alice (No 2) afite metero 1.77

-  Ingabire Jolie Ange (No 3) afite metero 1.75

-  Musana Teta Hense (No 4) afite metero 1.71

-  Munyaneza Yvette (No 5) afite metero 1.70

-  Mumporeze Josiane (No 6) afite metero 1.75

-  Musabyemariya Stella Marthe (No 7) afite metero 1.70

-  Uwase Latifa (No 8) afite metero 1.72

-  Irakoze Kelly Mireille (No 9) afite metero 1.78

-  Umutoniwase Nadia (No 10) afite metero 1.73

-  Baraka Lucky Sabine (No 11) afite metero 1.73

-  Imanishimwe Hope Joy (No 12) afite metero 1.70

-  Iradukunda Esther Faina (No 13) areshya na metero 1.71

-  Naruga Susan (No 14) areshya na metero 1.70

-  Uwimana Louise (No 15) areshya na metero 1.70

-  Igihozo Diane (No 16) areshya na metero 1.71

-  Atete Munaba Oretha (No 17) areshya na metero 1.70

16:26: Umwaliwase Claudette ni we mukobwa wa mbere wageze imbere y’akanama nkemurampaka. Uyu mukobwa w’imyaka 19 yasoje amashuri yisumbuye mu mwaka ushize.

Yavuze ko icyamuteye kurushanwa ari uko ashoboye kandi nawe hari icyo yageze ku gihugu nk’Umunyarwandakazi.

Ati “Nimba Nyampinga w’u Rwanda nzafasha igihugu kumvisha abaturage ko bakwiye kuva mu manegeka bakajya gutura aheza. mbaye Nyampinga nafatanya n’igihugu kujya gutura aheza.’’

-  Abagize Akanama Nkemurampaka barahasesekaye!

16:19: Abagize Akanama Nkemurampaka binjiye mu cyumba cya Hotel Credo kigiye kuberamo ijonjora. Aba ni Umurerwa Evelyne, Mike Karangwa na Miss Mutesi Jolly.

Bahawe ikaze na Martina Shami Abera ukora kuri KC2, Ishami rya kabiri rya Televiziyo y’u Rwanda uyobora igikorwa cyo guhitamo abazitabira Miss Rwanda 2020.

Abakobwa bemerewe kunyura imbere y’akanama nkemurampaka babanje kwiyerekana mbere y’abakagize mu masegonda make, bahita basubira mu cyumba bateguriwe kwicaramo.

-  Nyampinga ubereye u Rwanda agomba kuba yujuje ibi bikurikira:

Umukobwa wiyandikisha guhatanira ikamba rya Nyampinga w’u Rwanda asabwa ikimuranga nk’umunyarwanda (indangamuntu cyangwa pasiporo); afite imyaka hagati ya 18-24; yararangije amashuri yisumbuye; avuga neza Ikinyarwanda n’urundi rurimi nk’Igifaransa, Icyongereza n’Igiswahili.

Agomba kuba apima nibura ibilo 45 na metero 1.70 kuzamura; atarabyara; yemera kuzaguma mu Rwanda nibura umwaka umwe naramuka ahawe ikamba; yemera kutazashaka acyambaye ikamba; yemera kuzahagararira u Rwanda igihe cyose n’ahantu bikenewe no kuba yemera gukurikiza amategeko n’amabwiriza agenga Nyampinga w’u Rwanda.

-  HUYE iracyari ku isonga ku bwitabire bw’abakobwa bashaka ikamba!

Intara y’Amajyepfo ni yo yiyandikishijemo abakobwa benshi, ndetse ni naho hatoranyijwe benshi banyura imbere y’Akanama Nkemurampaka.

I Huye hiyandikishije abakobwa 79, ahabereye ijonjora hageze 28 mu gihe 17 aribo batoranyijwe nk’abujuje ibisabwa.

Mu Majyaruguru hiyandikishije abakobwa 75, muri bo 24 ni bo bageze aho igikorwa cyabereye mu gihe 14 ari bo banyuze imbere y’akanama nkemurampaka mu gihe mu Burengerazuba hiyandikishije 50, aho igikorwa cyabereye hagera 31 naho 13 banyura imbere y’akanama nkemurampaka.

Abakobwa babanje kunyura imbere y'Akanama Nkemurampaka

-  Abakobwa b’uburanga mu cyumba bapimiwemo

Abakobwa batandukanye biyandikishije guhagararira Intara y’Amajyepfo bari bafite akanyamuneza bategereje gupimwa ibilo n’uburebure harebwa niba bujuje ibisabwa bibemerera guhatana mu irushanwa rya Nyampinga w’u Rwanda 2020.

-  Ibisabwa umukobwa ngo abashe kwiyandikisha muri Miss Rwanda 2020

- Kuba ari Umunyarwandakazi
- Kuba afite imyaka hagati ya 18 na 24
- Kuba yararangije amashuri yisumbuye
- Kuba avuga neza Ikinyarwanda. (Kuba azi urundi rurimi rwiyongera ku rurimi kavukire mu zemewe n’amategeko mu Rwanda nabyo biremewe)
- Kuba afite uburebure guhera kuri 1,70 m
- Kuba afite BMI iri hagati ya 18.5 na 24.9
- Kuba atarigeze abyara
- Kuba yiteguye kuguma mu Rwanda byibuze mu gihe cy’umwaka nyuma yo gutorwa nka Nyampinga
- Ntagomba gushyingirwa cyangwa gushinga urugo mu gihe akiri Nyampinga
- Kuba yiteguye guhagararira u Rwanda ahantu hose n’igihe cyose abisabwe cyangwa biri ngombwa
- Kuba yiteguye gukurikiza no kubahiriza amahame yose n’amabwiriza agenga ba Nyampinga

-  Twibukiranye!

Mu mwaka ushize wa 2019. Mu Karere ka Huye havuye abakobwa barimo Mutoni Olive, Niyonsaba Josiane, Uwase Muyango Claudine, Umukundwa Clemence, Umurungi Sandrine, Uwicyeza Pamela, Teta Fabiola, Uwase Nadine, Uwihirwe Roselyne na Tuyishimire Cyiza Vanessa.

Uyu mujyi wakunze kugaragaramo impano nyinshi n’abakobwa b’uburanga, cyane ko ari igicumbi cya Kaminuza y’u Rwanda nyuma y’uko mu mwaka ushize amashami menshi yayo yasubijwe mu Mujyi wa Huye.

14:30: Abakobwa batangiye gupimwa ibilo n’uburebure mbere yo guhitamo abujuje ibisabwa bemererwa kunyura imbere y’abagize Akanama Nkemurampaka.

14:01: Abakobwa biyamamarije mu Ntara y’Amajyepfo mu Karere basesekaye kuri Credo Hotel mu Karere ka Huye, ahabereye ijonjora ry’abazavamo Nyampinga w’u Rwanda wa 2020 usimbura Nimwiza Meghan ufite ikamba rya 2019.

Uwiyandikisha asabwa ikimuranga nk’umunyarwanda (indangamuntu cyangwa pasiporo); afite imyaka hagati ya 18-24; yararangije amashuri yisumbuye; avuga neza Ikinyarwanda n’urundi rurimi nk’Igifaransa, Icyongereza n’Igiswahili.

Agomba kuba apima nibura ibilo 45 na metero 1.70 kuzamura; atarabyara; yemera kuzaguma mu Rwanda nibura umwaka umwe naramuka ahawe ikamba; yemera kutazashaka acyambaye ikamba; yemera kuzahagararira u Rwanda igihe cyose n’ahantu bikenewe no kuba yemera gukurikiza amategeko n’amabwiriza agenga Nyampinga w’u Rwanda.

Ingoro Ndangamurage y’Amateka y’Imibereho y’Abanyarwanda ibarizwa i Huye
Ijonjora ry'ibanze ryabereye hafi ya Kaminuza y'u Rwanda i Huye
Credo Hotel y'i Huye ni yo yakiriye ijonjora rya Nyampinga w'u Rwanda 2020

-  Ibyo wamenya kuri Huye

Huye ni kamwe mu turere umunani tugize Intara y’Amajyepfo. Igizwe n’imirenge 14, utugari 77 n’imidugudu 509 ku buso bwa kilometero kare 581.5.

Ibarura ryo mu 2012 ryagaragaje ko aka karere gatuwe n’abaturage 314,022 ku bucucike bw’abantu 540 kuri kilometero kare.

Aka karere ni ko kabarizwamo Kaminuza y’u Rwanda iri mu nkuru mu gihugu ndetse n’inzu Ndangamurage y’Amateka. Ibindi birangamateka biri muri aka gace birimo Ibisi bya Huye, Urutare rwa Nyirankoko, Iriba rya Nyagakecuru, ikawa ya Maraba, Arboretum n’ahandi.

Umujyi wa Huye ufatwa nk’igicumbi cy’intiti cyane ko ariwo washyizwemo iyari Kaminuza Nkuru y’u Rwanda yareze benshi mu Banyarwanda batangiye kwiga mu myaka yo hambere.

Umujyi wa Huye uri mu yunganira uwa Kigali unakungahaye ku muco kuko ufite Ingoro Ndangamurage y’Amateka y’Imibereho y’Abanyarwanda, ni nawo ubarizwamo icyicaro cy’Ikigo cy’Ingoro z’Igihugu z’Umurage w’u Rwanda (INMR) kuva ku wa 16 Ukuboza 2019.

INMR yoherejwe mu Karere ka Huye nka kimwe mu bigo bya Leta byoherejwe mu ntara. Ni umwanzuro wafashwe n’Inama y’Abaminisitiri yateranye ku wa 29 Nyakanga 2019 yayobowe na Perezida Kagame Paul.

-  Kaminuza yazamuye ubudahangarwa bwa Huye

Kaminuza Nkuru y’u Rwanda yashinzwe ku wa 3 Ugushyingo 1963 ku bufatanye bwa Guverinoma y’u Rwanda n’Umuryango w’Abafurere b’Abadominikani bo mu Ntara ya Quebec ho muri Canada. Yatangiranye n’abanyeshuri 51 n’abarimu 16 mu mashami atatu arimo iry’Ubuganga, iry’Imibanire rusange n’iryo Guhugura abarimu.

Kaminuza Nkuru y’u Rwanda yashinzwe kandi iyoborwa bwa mbere n’umufurere w’umudominikani w’Umunya-Canada witwaga Georges-Henri Lévesque. Frère Levesque ni na we kandi waje kwitirirwa kimwe mu byumba binini bigize inyubako y’iyahoze ari Kaminuza Nkuru y’u Rwanda [ubu yahindutse Kaminuza y’u Rwanda, Ishami rya Huye] yatangiriyemo Levesque cyangwa Audi Levesque.

Kuva yashingwa mu 1963 kugeza mu 1993, UNR nkuko yakunzwe kwitwa mu mpine z’Igifaransa, yari imaze gushyira ku isoko ry’umurimo abanyeshuri 1,962.

Nubwo yakomeje kugira iterambere mu bice bitandukanye kuva yashingwa, iterambere ryayo yakunze kwitwa imwe rukumbi, kubera ukuntu yabayeho ari imwe mu myaka irenga 30, ryagaragaye cyane cyane hagati y’umwaka wa 1995-2013; kuko muri iyi myaka 18 yari imaze gushyira ku isoko abanyeshuri barenga 18,000 mu mashami no mu byiciro bitandukanye.

Yari ifite amashami atatu Rusizi, Kigali na Huye ari nayo yakunze kumenyekana cyane nko “ku gicumbi cy’ubwenge” mu mujyi w’intiti.

Kaminuza Nkuru y’u Rwanda ntikiriho kuko yahindutse rimwe mu mashami ya Kaminuza y’u Rwanda, ikaba isigaye yitwa “Ishuri rikuru ry’Indimi, Ubuhanzi n’Ubumenyamuntu” (College of Arts and Social Sciences).

Amafoto: Miss Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .