Ni mu gitaramo cyabaye kuri iki Cyumweru tariki 12 Gicurasi 2024. Yahuriyemo n’abandi bahanzi batandukanye barimo Serge Rugamba wabimburiye abandi, Gaby Kamanzi, Bosco Nshuti ndetse na Adrien Misigaro.

Iki gitaramo cyabereye muri Camp Kigali yagikoze nyuma y’imyaka itanu, cyane ko yaherukaga gutegura ikindi nk’iki mu 2019 ubwo yamurika album yise ‘Sinzahwema’.

‘Nzakingura’ na ‘Nyigisha’ ni album ebyiri yamurikiye icyarimwe. ‘Nzakingura’ ni iya kabiri Prosper Nkomezi yakoze mu 2021 gusa ntiyagira amahirwe yo kuyimurika bitewe n’ibihe bya Covid-19 byari byarugarije Isi.

‘Nyigisha’ yo ni album nshya ya Prosper Nkomezi amaze iminsi akoraho iriho indirimbo nka ‘Nyigisha’ yayitiriye yanamaze kujya hanze.

Iyi album nshya ya Prosper Nkomezi kandi iriho indirimbo zasohotse nka ‘Usiogope’ na ‘Sinzamuvaho’.

Adrien Misigaro yatunguranye

Adrien Misigaro uri mu bahanzi bakomeye mu Rwanda, akaba aba muri Leta Zunze Ubumwe za Amerika, ntabwo yari ku rutonde rw’abahanzi baririmba muri iki gitaramo.

Gusa, ubwo Prosper Nkomezi yari ari ku rubyiniro yageze aho aririmba indirimbo ye imaze imyaka itanu igiye hanze yise ‘Nzagerayo’.

Iyi ndirimbo yayiririmbye uyu muhanzi amusanga ku rubyiniro, banahita baririmbana indirimbo aheruka guhuriramo na Meddy bise ‘Niyo Ndirimbo’ , imaze amezi atatu igiye hanze.

Nyuma yo kuririmbana izi ndirimbo zombie, Misigaro yahise ava ku rubyiniro asigaho Nkomezi, wakomeje gususurutsa abari bitabiriye iki gitaramo cye ndetse benshi bakomeza kwizihirwa.

Prosper Nkomezi yatanze ibyishimo bishyitse

Prosper Nkomezi yaririmbye yimara ipfa. Uyu muhanzi yaririmbye mu bice bibiri. Mu cya mbere yaririmbye igihe kirenga isaha yose, aririmba ibihangano bye byamenyekanye mu myaka ishize.

Mu ndirimbo ze yaririmbye zikishimirwa harimo “Ndaje’’ yahuriyemo na Gentil Misigaro, “Ibasha Gukora’’, “Nzakingura’’ n’izindi nyinshi.

Uyu muhanzi waririmbye izi ndirimbo ze zose mu buryo bwa ‘Live’ , yagaragaje ubuhanga bukomeye. Mu gice cya kabiri cyanasoje iki gitaramo nabwo yaririmbye indirimbo ziganjemo izizwi “Nzayivuga’’ n’izindi zirimo izitarajya hanze.

Muri iki gitaramo cya Prosper Nkomezi abantu batandukanye bazwi mu myidagaduro mu Rwanda bari bitabiriye, baje gushyigikira uyu musore.

Bamwe mu baje muri iki gitaramo bazwi harimo Umunyamakuru Uncle Austin, Miss Nshuti Muheto Divine, Alex Muyoboke, umunyarwenya Clapton Kibonge, Papi Clever n’umugore we, Aline Gahongayire, Victor Rukotana n’abandi batandukanye.

Iki gitaramo cyashyizweho akadomo saa tanu zishyira saa sita z’ijoro, ariko bamwe bari batangiye kwinyakura hakiri kare.

Abageraga ahabereye iki gitaramo bakirwaga, bamara kwishyura bakinjira

Abakunzi ba Prosper Nkomezi bari baturutse muri Uganda bamuhaye ibendera ry'iki gihugu

Aba bari baturutse muri Uganda baje gushyigikira uyu muhanzi

Abantu bari bizihiwe mu buryo butandukanye

Abantu bitabiriye bari bafashijwe n'ibihangano by'abahanzi batandukanye baririmbyemo

Abitabiriye banahembujwe ijambo ry'Imana

Adrien Misigaro yagaragaye muri iki gitaramo mu buryo butunguranye

Adrien Misigaro yatunguranye muri iki gitaramo

Aline Gahongayire ni umwe mu bitabiriye iki gitaramo

Bamwe bari bitwaje amafirimbi

Bosco Nshuti yaririmbye ibihangano bye bitandukanye byishimiwe

Christian Irimbere uri mu bahanzi bakunzwe mu muziki wo kuramya Imana ni umwe mu bitabiriye iki gitaramo

Gaby Kamanzi ni umwe mu bahanzi baririmbye muri iki gitaramo. Uyu muhanzikazi yishimiwe mu ndirimbo ze zirimo 'Amahoro' n'izindi

Iki gitaramo cyitabiriwe n'abantu batandukanye

M.Irene ni umwe mu bari bitabiriye. Uyu munyamakuru yagaragaje kwizihirwa

Ku nshuro ya mbere ni uku Prosper Nkomezi yaje yambaye

Merci Ndaruhutse uri ibumoso na Bahati Makaca uri hagati ni bamwe mu byamamare byitabiriye iki gitaramo

Miss Nshuti Muheto Divine ni umwe mu bari bitabiriye iki gitaramo

Prosper Nkomezi ku nshuro ya kabiri ni uku yaje ku rubyiniro yambaye

Prosper Nkomezi yaririmbye mu buryo bwa 'live'

Prosper Nkomezi yasabaga abantu kuririmbana na we

Prosper Nkomezi yashimiye abantu bifatanyije na we ubwo yamurikaga album ebyiri

Serge Rugamba ni we wabimburiye abandi ku rubyiniro

Lt Col Simon Kabera ni umwe mu bitabiriye iki gitaramo

Tracy Agasaro ni we wayoboye iki gitaramo. Uyu mugore yananyuzagamo akaririmba

Amafoto: Kasiro Claude