00:00:00 IGIHE NETWORK KN KINYARWANDA EN ENGLISH FR FRANCAIS

James na Daniella beretswe urukundo rudasanzwe mu gitaramo cyahariwe urubyiruko (Amafoto)

Yanditswe na Uwase Kevine
Kuya 1 May 2023 saa 11:46
Yasuwe :

Umuramyi James Rugamba n’umufasha we Daniella Rugamba beretswe urugwiro rudasanzwe n’abitabiriye igitaramo cy’urubyiruko, mu ndirimbo zabo zo kuramya no guhimbaza Imana zikunzwe n’abatari bake.

Byari mu gitaramo cyateguwe na Evangelical Restoration Church, ifatanyije n’abanyeshuri basoje inyigisho za Bible Communication Center (BCC), zigamije gukomeza umuntu no kumukuza mu rugendo rw’agakiza.

Ni inyigisho zitangwa mu bihugu bitandukanye ku Isi birimo bine byo muri Afurika nk’u Rwanda, Kenya, Repubulika Iharanira Demokarasi ya Congo n’u Burundi, muri Canada, muri za Kaminuza, amatorero atandukanye n’ahandi.

Iki gitaramo cyari kigamije guhembura urubyiruko no kurufasha gushira ubwoba ruterwa no kutamenya ejo hazaza, bigatuma rimwe na rimwe bafata ibyemezo bidahwitse byangiza ubuzima bwabo, agahinda gakabije n’ibindi.

Ni igitaramo cyabaye ku mugoroba wo ku Cyumweru Tariki 30 Mata 2023, muri Camp Kigali, cyitabirwa n’abakozi b’Imana barimo Umushumba Mukuru wa Evangelical Restoration Church, Apostle Joshua Ndagijimana Masasu, Umugore we Pasiteri Umulisa Lydia Masasu, abahanzi nka Arsène Tuyi, Christian Irimbere, Gaby Kamanzi na James na Daniella.

Saa cyenda n’igice z’umugoroba nibwo igitaramo cyari gitangiye, ubwo abahanzi nka Arsène Tuyi na Christian Irimbere babimburiraga abandi mu ndirimbo zirimo ’Yahweh’, Ukwiye amashimwe n’izindi.

Umuhanzi Gaby Kamanzi na we yanyujijemo afatanya na bo, mu ndirimbo zirimo iyo bise ‘Igituma ndirimba’ ya Apollainaire Habonimana yahagurukije benshi.

Urubyiruko rwigishijwe gushira ubwoba ruterwa n’impungenge z’ejo hazaza, habaho ivugabutumwa mu buryo bw’inyinamico, ubuhamya bwa bamwe mu rubyiruko bagize ibibazo by’agahinda gakabije, kwiheba no kutiyakira kubera ko ntaho baragera, n’ibindi.

Bigishijwe ko intandaro y’ibyo byose ari ukuba buri wese ahangayikishijwe n’ejo he hazaza, yareba bagenzi be akabona hari ahandi bageze bikamutera kwifuza, cyangwa akumva ntacyo ashoboye.

Buri muntu yibukijwe kwitondera ibyo abona byose cyane cyane ku mbuga nkoranyambaga bimutera kwifuza, guhubuka no gukora ibidakwiye kugirango akunde agere kucyo ashaka.

James na Daniella beretswe urukundo bidasanzwe

Saa Kumi n’ebyiri nibwo umuramyi James n’umugore we Daniella batangiye kuririmba, bakirizwa n’impundu nyinshi mu ndirimbo zirimo Narakijijwe, Umwami ni Mwiza, Amaraso n’izindi.

Indirimbo ‘Bari he?’ baherutse gushyira hanze niyo yahagurukije benshi nu bitabiriye, berekwa urukundo rudasanzwe n’abakunzi babo kubera ubuhanga buri mu ndirimbo zabo.

Nyuma w’umwanya muremure wo kuramya no guhimbaza Imana, Umushumba Mukuru w’Itorero rya Restoration Church, Apostle Joshua Ndagijimana Masasu yaganiriye n’urubyiruko rwari rwitabiriye ruturutse muri za Kaminuza, amatorero atandukanye n’ahandi.

Apostle Masasu yavuze ko ubwoba buba mu rubyiruko aribwo ntandaro yo gukora amafuti n’ibyaha birimo "ubusambanyi kubera ko bamwe batinya kugumirwa badashaka ko abakunzi babo babareka, abandi bakishora mu bujura n’ubuhemu kubera gutinya ubukene" n’ibindi.

Yakomeje avuga ko bidakwiye ko ibyo byose babyihererana kuko abenshi mu bakuze babinyuzemo, bityo batari bo nyine, ahubwo bakwiye guharanira gutsinda izo ntekerezo mbi, bakarinda ejo habo heza n’abazabakomokaho.

Mu nyigisho zijyanye no gushirika ubwoba buterwa no guhangayikishwa n’ejo hazaza, yabasangije no mu zikubiye mu gitabo yanditse yise "Delivery from all my fears", bisobanura ’kubohorwa ku bwoba bwanjye bwose’, gikubiyemo n’ubuhamya bw’ubuzima bwe bwa kera akiri umusore.

Nyuma y’inyigisho n’isengesho risoza igitaramo, James na Daniella n’abandi bongeye gusubira ku rubyiniro basusurutsa urubyiruko biratinda, bagera naho bava mu ntebe aho bari bicaye barabegera mu mudiho uremereye.

Bakoze muganzo baririmba indirimbo zabo ndetse n’iz’abandi bahanzi bo kuramya no guhimbaza Imana, zirimo ‘Yesu Arakora’, ‘Ndi hano’, ‘Mungu ni Yule Yule’ n’izindi.

Urubyiruko rwari rwabukereye
Abitabiriye iki gikorwa biganjemo urubyiruko
Urubyiruko rwigishijwe kubaho rufite intego n'icyizere cyo kuzazigeraho bafashijwe n'Imana
Urubyiruko rwagaragaje umukino w'ivugabutumwa wiganjemo ihumure n'ubutsinzi
Umuramyi Christian Irimbere yanyuze imitima ya benshi mu ndirimbo ze zo guhimbaza Imana
Umuramyi Arsène Tuyi yakoze mu nganzo biratinda
Umuhanzi Gaby Kamanzi na we yari mu gitaramo cyahariwe urubyiruko
Pasiteri Lydia Masasu yasabiye urubyiruko gukomezwa n'Imana kuko ibiri hanze aha bituma barangara, bibangiriza ubuzima
Abatanze ibiganiro bahurije ku gusaba urubyiruko kurushaho kwitwararika
Pasiteri John Faith uhagararaiye inyigisho za BCC mu Rwanda, yashimye abitabiriye igitaramo bateguye
James Rugamba yafatanyaga n'umugore we
Daniella Rugamba yishimiwe n'abitabiriye igitaramo kubera ubuhanga bwe mu kuririmba
Daniella ni umwe mu bahanzi b'Indirimbo z'Imana bakunzwe muri iyi minsi
Iki gikorwa cyitabiriwe ku rwego rukomeye
Wari umudiho ukomeye mu mahema ya Camp Kigali mu ndirimbo zo kuramya no guhimbaza Imana
Arsène Tuyi ni umwe mu bahanzi bakunzwe mu ndirimbo zo kuramya no guhimbaza Imana
Apostle Masasu yasabye urubyiruko kwirinda ibiboshya mu mafuti n'ibyaha kuko bibicira ejo habo heza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .