00:00:00 IGIHE NETWORK KN KINYARWANDA EN ENGLISH FR FRANCAIS

Ibitaravuzwe kuri Rose Muhando uri mu Rwanda

Yanditswe na Uwiduhaye Theos
Kuya 2 June 2022 saa 03:31
Yasuwe :

Rose Muhando ni umuramyi uzwi na benshi muri Afurika by’umwihariko iy’Uburasirazuba. Ni umwe mu bafite ibihangano bihembura imitima y’abatari bake kandi wakunzwe kuva ku b’imvi z’uruyenzi kugeza ku bana b’ibitambambuga bari kwiga gukambakamba.

Mu myaka 18 amaze ari icyamamare mu muziki wo kuramya no guhimbaza Imana, yamenyekanye mu bihangano birimo ‘‘Nipe Uvumilivu’’ iri mu zo yatangiriyemo, “Nibebe”, “Mteule Uwe Macho”, “Kitimutimu”, “Jipange Sawasawa”, “Nyota ya Ajabu”, “Utamu Wa Yesu”, “Nampenda Yesu” n’izindi zitandukanye.

Ikigaragaza ko ari umuhanzi w’umunyagikundiro na n’ubu aracyatumirwa mu bitaramo byinshi bitandukanye ndetse hari hashize amezi asaga abiri gusa avuye mu Rwanda ariko yongeye kuhatumirwa. Yaje mu giterane cyahawe inyito ya ‘Pentecost Celebration Week’ aho kigamije kwizihiza umunsi wa Pantekositi, aho Umwuka Wera yamanukiraga Intumwa.

Uyu muhanzikazi ategerejwe mu giterane cy’iminsi ine kizabera muri Citylight Foursquare Gospel Church Kimironko ya Bishop Dr. Masengo Fidele. Iki giterane cyatangiye kuri uyu wa Gatatu tariki 1 Kamena kugeza ku wa 5 uku kwezi muri uru rusengero. Kwinjira ni ubuntu.

Uyu mubyeyi w’imyaka 46 n’ubwo yagize igikundiro mu 2004 ubwo yatangiraga umuziki ntabwo yanyuze mu nzira iharuye ahubwo yagiye avugwa mu nkuru nyinshi ndetse hari abageze aho bavuga ko yaguye, akava mu nzira y’agakiza.

Mu kiganiro yagiranye n’abanyamakuru yatangaje byinshi ku buzima bwe ndetse anakura urujijo ku nkuru nyinshi zamuvuzweho.

Yameneshejwe n’umuryango kubera gushaka gukorera Imana

Muhando wavukiye mu muryango w’Aba-Islam ari bucura, iyo yivuga agaragaza ko akiri umwana muto yaje kugira uburwayi agakizwa n’Imana imusanze aryamye mu rugo iwabo baravuje bararushye.

Ati “Narwaye hafi umwaka wose sinabasha gukira n’amashuri ndayareka. Ababyeyi banjye baramvuje bacika intege. Umunsi umwe nari ndyamye mu cyumba gikinguye papa na mama bandeba. Nabonye umucyo unyura mu nkingi.”

“Uwo mucyo uramanuka kugera aho nari ndi mbona ukuboko nk’ukumuzungu harimo ikintu kirabagirana. Ikiganza kinkora mu mutwe ni naho nari ndwaye hava amazi menshi. Ijwi rivuye muri iyo nkingi riravuga riti ndi Yesu ndagukijije byuka unkorere. Iryo naryumvise gatatu. Wa mucyo uragenda kuva ubwo ndakira.”

Avuga ko yabibwiye iwabo bagatekereza ko yaba ari mu minota ya nyuma yo gupfa kwe, mu gihe bagitekereza gutyo arabyuka. Kuva ubwo ibikomere yari afite byatangiye gukira. Ababyeyi bahise bizera ko ibyo yababwiraga ari ukuri cyane ko nabo umucyo umanuka bawubonye ariko ikiganza cyamukijije n’ijwi ntibamenya ibya byo.

Avuga ko nyuma y’imyaka itatu akize rya jwi ryamusanze rikongera kumwibutsa isezerano bagiranye. Ati “ Rya jwi ryagarutse ndi mu ishuri nkajya ndyumva ahantu hose ndi nkaryumva.”

Se w’uyu muhanzikazi yari asanzwe ari umuhinzi, yari afite umuntu yahaye umurima wo guhingamo usenga aba ari we Muhando yifashisha.

Ati “Data hari umuntu w’umukirisito yari yarahaye imirima yo guhingamo. Umunsi umwe ndamwegera mubaza ibya Yesu. Ansaba kubatizwa , icyari ikizamini ni ukuntu nari kubatizwa data ari umu-Islam ariko byarabaye. Data yarabyemeye , ku munsi wa Pasika njya ku rusengero ndabatizwa.”

Nyuma y’umubatizo ngo inshuti z’ababyeyi be zasabye ko bamwirukana kuko ari we wari umaze gukizwa iwabo. Icyo gihe yari afite imyaka 12. Iki cyifuzo cy’inshuti cyashyigikiwe na basaza be cyane ko mu bwoko bw’iwabo abahungu bagira ijambo kurusha se, baramumenesha.

Ku myaka afite ubu ntarashaka umugabo, avuga ko impamvu ari uko atari ikintu cyo guhubukira kandi bishobora gutuma adakora umurimo w’Imana neza. Kuri we ngo ntabwo byoroshye kuba waba uri umugore ngo unakorere Imana bikorohere kubera inshingano z’urugo.

Rose Muhando ni umwe mu bahanzi bagiye bavugwa kenshi

Ibyo gukwepa ibitaramo yishyuwe byagenze gute ?

Uyu muhanzikazi mu myaka yashize yagiye avugwa mu bibazo byiganjemo ibyo gukwepa ibitaramo yishyuwe. Muri ibyo bitaramo harimo n’ibyo yagombaga gukorera mu Rwanda mu 2015 na 2017.

Yavuze ko nk’umuhanzikazi uririmba indirimbo zihimbaza Imana agenda ahura n’ibirushya byinshi ku buryo hari aho bigera agahitamo kuruca akarumira.

Ati “Iyo tuvuga abantu batekereza ko byoroshye. Twe intambara yacu nta gusinzira. Tunyura muri byinshi nkuko Yesu yabinyuzemo rimwe na rimwe tugahemukirwa ariko tugaceceka kuko dushobora gukomeretsa abo tubwiriza. Twaremwe twambaye inyama namaraso. Hari igihe nanyuze mu bigeragezo byo gukubitwa, kwakwa imitungo no gutukwa. Ikibabaza cyane bikorwa n’Abakirisitu batagaragara ko babikora abantu bavugaga ngo nahawe amafaranga sinjye mu bitaramo natumiwemo ntabwo babaga bazi ibyo nanyuzemo.”

Yakomeje ati “Umubiri warananiwe kubera ko niwo wababazwaga, ubwenge burananizwa nsigarana Imana gusa kuko ariyo yambwirije. Nasabye Imana kunkiza. Yobu ageragezwa nta cyaha yari yakoze (...) Nubwo ntageze ku rwego nk’urwa Yobu, ariko nanjye ntabwo norohewe abana banjye birukanwa mu ishuri, ndarwara... Imana yimanye ubugingo bwanjye. Kwizera kwanjye kwarazamutse.”

Bakubise icya semuhanuka ko anywa ibiyobyabwenge …

Muhando mu ntambara yarwanye avuga ko harimo n’inkuru zivuga ko anywa ibiyobyabwenge.

Yavuze ko atigeze n’umunsi umwe akoresha ibiyobyabwenge kandi kugeza igihe azava mu mubiri cyangwa se Yesu aje akazaba atarabikoza mu kanwa ke.

Ati “Ndashaka kuvuga ko kunywa ibiyobywenge bamvugagaho byari ikinyoma cyambaye ubusa. Uwankoreraga biriya byose yashakaga kunsebya. Nzi Imana yanjye ntabwo nasubira inyuma. Icyanditswe kiravuga ngo bazarwana ntibazatsinda. Nzi nizera Kandi ndamya. Sinigeze kandi sinzigera nywa ibiyobyabwenge kugeza igihe nzajya ku Uwiteka.”

Umushumba w’Itorero Foursquare Gospel Church mu Rwanda, Bishop Dr. Fidèle Masengo watumiye uyu muhanzikazi mu giterane cyatangiye kuwa Gatatu tariki 1 Kamena 2022, yavuze ko bafite abashumba bakorana nabo bo muri Tanzania ku buryo amakuru y’uyu muhanzikazi baba bayazi kandi ari umuntu ushimwa n’Imana n’abantu.

Reba indirimbo Rose Muhando yashyize hanze ari mu Rwanda

Rose Muhando yavuze ko yanyuze mu bigeragezo nk'ibya Yobu uvugwa muri Bibiliya
Umushumba w’Itorero Foursquare Gospel Church mu Rwanda, Bishop Dr. Fidèle Masengo watumiye uyu muhanzikazi yavuze ko nyuma y'intambara Muhando yanyuzemo ubu ashimwa n'Imana n'abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .